شىمكەنتتىڭ 2020 جىلى تمد-نىڭ مادەني استاناسى بولىپ جاريالانۋى ۇلكەن مارتەبە ەكەنىن ايرىقشا اتاپ وتكەن قالا اكىمى عابيدوللا ءابدىراحىموۆ جىل بويى ءۇشىنشى مەگاپوليس اۋقىمدى مادەني باعدارلامالار مەن كەزدەسۋلەر وتەتىن اشىق الاڭعا اينالاتىنىن جەتكىزدى.
«تۇرىكمەنستانعا جاساعان ساپار بارىسىندا وسى ەل ۇكىمەت توراعاسىنىڭ ورىنباسارى – سىرتقى ىستەر ءمينيسترى راشيد مەرەدوۆپەن, اشعاباد قالاسىنىڭ اكىمى شامۋxاممەت دۋردىلىەۆپەن, تۇرىكمەنستاننىڭ ساۋدا-ونەركاسىپ پالاتاسىنىڭ وكىلدەرىمەن جانە تمد ەلدەرىنەن كەلگەن باسقا دا ارىپتەستەرىمىزبەن ىسكەرلىك كەزدەسۋلەر وتكىزدىك. بۇل ساپارىمىزدىڭ باستى ماقساتى – شىمكەنت قالاسىنىڭ تانىستىرىلىمىن وتكىزۋ جانە شەتەلدەرمەن مادەني-ىسكەرلىك بايلانىستاردى نىعايتۋ بولدى», دەيدى عابيدوللا ءابدىراحىموۆ.
اتالعان فورۋمدا شاھار باسشىسى شىمكەنت قالاسىندا جۇزەگە اسىپ جاتقان جوبالارعا توقتالىپ, مادەنيەت سالاسىنداعى اۋقىمدى جۇمىستاردى ايتىپ ءوتتى.
«2200 جىلدىق تاريحى بار شاھاردا «ەسكى قالاشىق – تسيتادەلدى» قايتا جاڭارتۋ مەن قوشقار اتا وزەنىنىڭ جاعالاۋىن اباتتاندىرۋ جۇمىستارى باستالدى. «تسيتادەل» – شىمكەنتتىڭ بىرەگەي مادەني-تاريحي ايماعى. قالپىنا كەلتىرۋ جۇمىستارى اياقتالعاننان كەيىن بۇل نىسان مەگاپوليستىڭ عانا ەمەس, بۇكىل قازاقستاننىڭ جارقىن تۋريستىك برەندىنە اينالاتىن بولادى», دەدى اكىم ءوز سوزىندە.
قالا اكىمىنىڭ ايتۋىنشا, شىمكەنتتە 3 مىڭ ورىندى زاماناۋي «كونگرەسس-ورتالىق» سالۋ مەن 20 مىڭ ورىندىق ورتالىق ستاديوندى قايتا جاڭعىرتۋ جوسپارلانۋدا. جانە دە شىمكەنت قالاسى əۋەجايىندا جاڭا جولاۋشىلار تەرمينالىنىڭ قۇرىلىسى باستالعان. جوبانىڭ ينۆەستيتسيالىق قۇنى 50 ميلليون اقش دوللارىن قۇرايدى. جاڭا تەرمينالدىڭ ىسكە قوسىلۋى ءناتيجەسىندە اۋەجايداعى جولاۋشىلار اعىمى 10 ەسەگە ارتاتىن بولادى. سونىمەن قاتار قالاداعى تەمىر جول ۆوكزالىنا جاڭعىرتۋ جۇمىستارى جۇرگىزىلۋدە. ءناتيجەسىندە قىزمەت كورسەتۋدىڭ حالىقارالىق ستاندارتتارىنا ءسايكەس كۇنىنە 9 مىڭعا جۋىق جولاۋشىنى قابىلداي الادى.
زاماناۋي ينفراقۇرىلىمنىڭ جوعارى حالىقارالىق ستاندارتتارىنا ساي 400 گەكتار اۋماقتا سالىنىپ جاتقان «Shymkent City» قالاشىعى تۋرالى ايتقان قالا اكىمى «حەپپيلەند» وتباسىلىق ويىن-ساۋىق كەشەنى دە بوي كوتەرەتىنىن مالىمدەدى.
ءسوز سوڭىندا عابيدوللا ءابدىراحىموۆ شىمكەنتتىڭ كەلىستى كەلبەتىمەن, ەجەلگى تاريحىمەن, جانعا جايلى كليماتىمەن, قوناقجاي قالپىمەن, ۇلتتىق سالت-ءداستۇرىمەن ماقتانا الاتىنىن جەتكىزدى. ءارى شەتەلدىك ازاماتتاردى قازاقستاننىڭ ءوڭتۇستىگىندەگى شىرايلى قالاعا قوناققا شاقىردى.
شىمكەنت
