2 ماۋسىمدا IAAF (حالىقارالىق جەڭىل اتلەتيكا فەدەراتسياسى) «IAAF Run 24:1» باستاماسى جۇزەگە اسىرىلادى. وعان التى قۇرلىقتان 24 قالا قاتىسادى دەپ كۇتىلۋدە. تاڭدالعان قالالاردىڭ ارقايسىسىندا ءبىر ميليا جۇگىرۋ وتەدى. ولار ساعات ايماعىنا سايكەس ءبىر ۋاقىتتا باستالادى. وسىلايشا, بۇكىل پلانەتا جۇگىرۋ كۇنىن «سينحروندى» تۇردە مەرەكەلەيدى.
قاتىسۋشى قالالاردا مەرەكە سپورت مينيسترلىكتەرىمەن, قالالىق بيلىك ۇيىمدارىمەن جانە ۇلتتىق فەدەراتسيالارمەن بىرلەسىپ ۇيىمداستىرىلادى.
«IAAF Run 24:1» وڭتۇستىك مۇحيتتاعى فيدجي ارالىنىڭ ەڭ ءىرى سۋۆا قالاسىندا باستاۋ الادى. بۇدان ءارى الەمدىك جۇگىرۋ تىزبەگى مەلبۋرن, توكيو, پەكين, سينگاپۋر جانە حانوي قالالارى بويىنشا جالعاسادى. ورتالىق ازيادا ءىس-شارا قازاقستاننىڭ استاناسى نۇر-سۇلتان قالاسىندا وتەدى.
سپورتتىق شارا بۇدان ءارى ىستامبۇل, كوپەنگاگەن, ميلان جانە بيرمينگەمد قالالارىنداعى توقتاۋ نۇكتەلەرىمەن ەۋروپاعا وتەدى. سودان سوڭ افريكاعا كەرى ورالىپ, گابورون, ياۋندە جانە رابات وڭىرلەرىندە جاندانادى. ودان ءارى دۇنيەجۇزىلىك جۇگىرىس اتلانتيكا, سان-پاۋلۋ, سانتياگو, گاۆان, بوگوتا, مەكسيكانى كەسىپ ءوتىپ, اقىرىندا اقش-قا جەتەدى.
موناكودا مەرەكەنىڭ نەگىزگى باستاماشىسى – IAAF ءىرى حالىقارالىق ۇيىمى ورنالاسقان قالادا تۋر ءوز مارەسىنە جەتەدى. جالپى «IAAF Run 24:1» بۇكىل الەمنەن مىڭداعان جەلاياقتى بىرىكتىرە وتىرىپ, 24 ەلدە ايالداما جاسايدى. جارىس نۇر-سۇلتان قالاسىنىڭ مادەنيەت جانە دەمالىس ساياباعىندا جەرگىلىكتى ۋاقىت بويىنشا ساعات 9:00-دە باستالادى.
ءار قالادا جۇگىرۋدى بۇرىنعى نەمەسە قازىرگى سپورتشى باسقاراتىن بولادى. وسى جوبانىڭ نۇر-سۇلتان قالاسىنداعى باستى قوناعى رەتىندە وليمپيادا چەمپيونى ولگا رىپاكوۆا ونەر كورسەتەدى. جارىسقا 1 مىڭنان 3 مىڭعا دەيىن ەلوردالىق قاتىسادى دەپ كۇتىلۋدە.
