ولاردىڭ سوزىنە قاراعاندا, ءاربىر سايلاۋ ۋچاسكەسى بويىنشا سايلاۋشىلار تىزىمدەرىن سايلاۋ كوميسسيالارىنا ءتيىستى اكىمدىكتەر داۋىس بەرۋ باستالاردان جيىرما كۇن بۇرىن, ياعني 2019 جىلعى 20 مامىردا بەرگەن. مىنە, وسى تىزىمدەرگە ساي قازىر سايلاۋشىلاردىڭ جالپى سانى 11 947 995-ءتى قۇراپ وتىر. ال سايلاۋشىلار تۇرعىلىقتى جەرى بويىنشا قۇرىلعان سايلاۋ ۋچاسكەلەرىندە ون بەس كۇن ىشىندە وزدەرىنىڭ تىزىمدە بار-جوعىن بىلە الادى. دەرەكتەرىنىڭ انىق ەمەستىگىنە جول بەرىلگەن, تىزىمگە ەنگىزىلمەگەن, دۇرىس ەنگىزىلمەگەن نەمەسە شىعارىلعاندىعىنا بايلانىستى شاعىمدانۋ مۇمكىندىگى قامتاماسىز ەتىلەدى.
بۇدان كەيىن ءسوز العان ورتالىق سايلاۋ كوميسسياسىنىڭ حاتشىسى ءسابيلا مۇستافينا 2019 جىلعى 20 مامىردا سايلاۋ ۋچاسكەلەرىنە ءتيىستى اكىمدەر قول قويعان سايلاۋشىلاردىڭ ءتىزىمدەرى جەتكىزىلگەنىن حابارلادى. ال سايلاۋ بيۋللەتەندەرى «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 37-بابى 2-تارماعىنا سايكەس سايلاۋشىلاردىڭ جالپى سانىنىڭ 1 پايىزى رەزەرۆiمەن سايلاۋشىلاردىڭ سانىنا تەڭ مولشەردە دايىندالادى. دەمەك, 12 067 475 سايلاۋ بيۋللەتەنىن دايىنداۋ قاجەت.
سونىمەن قاتار, بيۋللەتەندەردى قولدان جاساۋدان جانە ءتيىسىنشە ولاردى بۇرمالاۋدان قورعاۋدى قامتاماسىز ەتۋ ماقساتىندا سايلاۋ بيۋللەتەندەرىنىڭ قورعالۋ دارەجەسى بەلگىلەنگەن. سايلاۋ بيۋللەتەندەرىن وبلىستىق, رەسپۋبليكالىق ماڭىزى بار قالالاردىڭ, استانانىڭ سايلاۋ كوميسسيالارىنا جەتكىزۋ ارنايى بايلانىسپەن جۇزەگە اسىرىلادى. وبلىستىق, رەسپۋبليكالىق ماڭىزى بار قالالار مەن استانانىڭ سايلاۋ كوميسسيالارىنا سايلاۋ بيۋللەتەندەرىن ءۇش كۇننەن, ياعني 6 ماۋسىمنان ەرتە ەمەس جانە سايلاۋعا دەيىن ءبىر كۇننەن, ياعني 8 ماۋسىمنان كەشىكتىرمەي جەتكىزۋدى قامتاماسىز ەتۋ قاجەت, دەدى بايانداماشى.
ال «2019 جىلعى 9 ماۋسىمعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا حالىقارالىق ۇيىم بايقاۋشىسىن اككرەديتتەۋدىڭ كۇشىن جويۋ تۋرالى» ماسەلە بويىنشا ورتالىق سايلاۋ كوميسسياسىنىڭ مۇشەسى زاۋرەش بايمولدينا شەت مەملەكەتتەردىڭ جانە حالىقارالىق ۇيىمداردىڭ بايقاۋشىلارىن اككرەديتتەۋدىڭ كۇشىن جويۋدى سىرتقى ىستەر مينيسترلىگىنىڭ ۇسىنۋى بويىنشا ورتالىق سايلاۋ كوميسسياسى جۇزەگە اسىراتىنىن ايتتى. سوعان سايكەس ەقىۇ/دياقب-نىڭ سايلاۋدى بايقاۋ جونىندەگى ميسسياسى حاتىنىڭ جانە قازاقستان رەسپۋبليكاسى سىرتقى ىستەر مينيسترلىگىنىڭ ۇسىنىمى نەگىزىندە ەقىۇ/دياقب-نىڭ سايلاۋدى بايقاۋ جونىندەگى ميسسياسىنىڭ بايقاۋشىسى الەكساندر دجون فولكستى اككرەديتتەۋدىڭ كۇشىن جويۋ جانە كۋالىگىن كەرى قايتارىپ الۋ تۋرالى قاۋلى قابىلدانعان.
مىنە, وسىعان بايلانىستى بايقاۋشىلار تىزىمىنەن «ەقىۇ/دياقب-نىڭ سايلاۋدى بايقاۋ ءجونىندەگى ميسسياسى» بولىمىندە رەتتىك ءنومىرى 40 «7. Alexander Jonh Folkes» دەگەن جول الىنىپ تاستالعان.
بۇدان ءارى زاۋرەش بايمولدينا حالىقارالىق ۇيىمدار مەن شەت مەملەكەتتەردىڭ بايقاۋشىلارىن اككرەديتتەۋ تۋرالى ايتا كەلىپ, سىرتقى ىستەر مينيسترلىگىنەن ءبىرقاتار ميسسيانىڭ بايقاۋشىلارىن اككرەديتتەۋگە ۇسىنىستار (43) تۇسكەنىن جەتكىزدى. سونىمەن قاتار ارمەنيا, بولگاريا, گرۋزيا, مالايزيا, مولدوۆا, لاتۆيا, رەسەي فەدەراتسياسى جانە تۇركيانىڭ ورتالىق سايلاۋ ورگاندارىنىڭ وكىلدەرى بولىپ تابىلاتىن 16 بايقاۋشى ۇسىنىلعانىن كولدەنەڭ تارتتى. بارلىعى 59 بايقاۋشى اككرەديتتەۋگە ۇسىنىلىپ وتىر ەكەن. اككرەديتتەۋگە ۇسىنىمداردىڭ ءتۇسۋىنە قاراي بايقاۋشىلار ءجونىندەگى دەرەكتەر جاڭارتىلادى, دەيدى ز.بايمولدينا. شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋدى ورتسايلاۋكوم 2019 جىلعى 3 ماۋسىم كۇنگى ساعات 18.00-گە دەيىن جۇزەگە اسىرادى.
