گىر سپورتى جانە ارمرەستلينگ فەدەراتسياسىنىڭ پرەزيدەنتى مارات اسايىنوۆتىڭ ايتۋىنشا وسىندا جەڭىمپاز اتانعاندار فرانتسيا جانە سەربيادا وتەتىن ەۋروپا, الەم بىرىنشىلىكتەرىنە قاتىسۋ قۇقىنا يە بولادى.
ايەلدەر اراسىندا ەلوردالىق اقمارال زۇپار 10 مينۋتتىڭ ىشىندە 24 كيلولىق گىردى 164 رەت كوتەرىپ, ءوز سالماق دارەجەسى بويىنشا جارىستىڭ ەڭ بيىك تۇعىرىنا كوتەرىلدى. حالىقارالىق دارەجەدەگى سپورت شەبەرى, پەتروپاۆلدىق ماريا ناۋمەنكو جۇلقي كوتەرۋدە رەكوردتىق كورسەتكىشتەن اسىپ ءتۇستى.
ەرلەر باسەكەسى اسا تارتىستى بولدى. قىزىلجار ءوڭىرىنىڭ وكىلى, حالىقارالىق دارەجەدەگى سپورت شەبەرى ارتەم گولوۆين 32 كيلولىق گىردى 129 رەت كوتەرىپ, قازاقستاننىڭ رەكوردىن جاڭارتتى. ونىڭ جەرلەسى, الەم چەمپيونى ۆيتالي ديدەنكو 95 كيلو سالماقتا ءابسوليۋتتى جەڭىمپاز اتاندى.
جالپىكوماندالىق ەسەپتە قوستانايلىقتار – ءبىرىنشى, الاڭ يەلەرى – ەكىنشى, شىعىسقازاقستاندىقتار ءۇشىنشى ورىندى يەلەندى.
