جۋىردا كەزەكتى ەسكە الۋ ۆاحتاسىنان ورالعان كلۋبتىڭ جەتەكشىسى الەكساندر ازەگوۆپەن سۇحباتتاسۋدىڭ ءساتى ءتۇستى. رەسەيدىڭ نوۆگورود وبلىسى اۋماعىندا قازبا جۇمىستارىن جۇرگىزىپ, وتان ءۇشىن ەرلىكپەن قازا تاپقان مارقۇمداردىڭ دەنەلەرىن ىزدەستىرۋ, ارۋلاپ قويۋ – ءبىز ءۇشىن قالىپتاسقان سالت, قاسيەتتى بورىش. نوۆگورود باعىتىنداعى قاندى شايقاستار مەن كەسكىلەسكەن ۇرىستارعا قازاقستاندىقتاردىڭ, ونىڭ ىشىندە جەرلەستەرىمىزدىڭ كوپتەپ قاتىسقانى تاريحتان بەلگىلى. وسى سەبەپتى تاڭداۋدان قاتەلەسپەگەنىمىزدى جىلداعى ءار ساپارىمىز دالەلدەپ ءجۇر, دەيدى دەسانتشى, ينتەرناتسيوناليست-سارباز.
وسى جولى حالىقارالىق «دولينا» ەكسپەديتسياسىنا جەتى ەرىكتى اتتانىپ, پارفين اۋدانى توڭىرەگىندە شەيىت بولعان بوزداقتاردىڭ دەنەلەرىن ىزدەۋمەن اينالىسقان. ولجاسىز ەمەس. ون ادامنىڭ سۇيەگى, جارىلعىش زاتتار, ىدىستار, كاسكالار, ليستوۆكا پاراقشالارى تابىلعان. بىرنەشەۋىن وبلىس ورتالىعىنداعى مۋزەيگە الا كەلىپتى.
– اتى-ءجونى, تۇرعىلىقتى مەكەن-جايى جازىلعان مەدالون ساقتالماعاندىقتان, قاڭقاسى عانا قالعان سۇيەكتەردىڭ كىمگە تيەسىلى ەكەنىن انىقتاۋ مۇمكىن ەمەس. دەسەك تە وسى ساپارىمىز نوۆگورود قالاسىن جاۋدان ازات ەتۋدىڭ 75 جىلدىعىمەن ورايلاس كەلىپ, كەڭىنەن اتاپ ءوتۋ سالتاناتىنا قاتىسقانىمىزعا قۋانىشتىمىز. ءسوز اراسىندا كەيبىر قۇندى زاتتاردى كەزىكتىرگەنىمىزدى ايتا كەتەيىن. ماسەلەن, نەمىستىڭ كەرزى ەتىگى...تابانى تەمىرلەنگەن, شەگەلەرمەن بەكىتىلگەن. ساپالى ەتىپ جاسالعانى بىردەن بىلىنەدى. الەمگە ايگىلى «Nivea» كومپانياسى شىعارعان كرەم ىدىسىن دا جولىقتىردىق. شاماسى, نەمىس اسكەرى سۋىقتان قورعانۋ ءۇشىن پايدالانعان سەكىلدى, دەگەن ول ءبىزدىڭ مارقۇمداردىڭ دەنەسى قايدا جەرلەنەدى دەگەن سۇراعىمىزعا بىلاي جاۋاپ بەردى. – ءبىز رەسەي جاقتان كەلگەن 20-عا تارتا قىزىل ىزشىلدەر توبىمەن قويان-قولتىق جۇمىس ىستەدىك. مەندەگى مالىمەتتەر بويىنشا بارلىعى 30 مىڭعا جۋىق جاۋىنگەردىڭ سۇيەگى ياسنايا پوليانا سەلوسىنداعى باۋىرلاستار زيراتىنا قايتا جەرلەنىپ, 1500-ءنىڭ اتى-ءجونى جازىلىپ قويىلعان.
كەيبىرەۋلەر باردى, قايتتى, وندا تۇرعان نە بار دەسە, قاتتى قاتەلەسەدى. ەكسپەديتسيانىڭ وزىندىك ەرەكشەلىكتەرى مەن قيىندىقتارى از ەمەس. بىرىنشىدەن, قوعامدىق ۇيىم بولعاندىقتان قارجى تابۋ – ۇلكەن ماسەلە. ەكىنشىدەن, ءار ءمايىت ءۇشىن اكت تولتىرىلىپ, قاشان, قاي جەردەن, قانداي تەرەڭدىكتەن قازىلعانىنا دەيىن تاپتىشتەپ جازىلىپ, ءتيىستى ورىندارعا تاپسىرىلادى. سوسىن عانا باۋىرلاستار زيراتىنا اۋرۋلاپ قويىلادى. تاعى ءبىر ايتارىم, جىل وتكەن سايىن ىزدەستىرۋ شارالارى كۇردەلەنىپ كەلەدى. ويتكەنى, مايدان دالالارىن ءشوپ, جىڭعىل باسىپ كەتكەن. تۇرعىنداردىڭ كوپ كومەگى ءتيدى. مەتالل ىزدەگىش قۇرالداردى قولدانعاننىڭ وزىندە تىعىرىققا تىرەلەتىن جايتتار از ۇشىراسپايدى, دەيدى كلۋب جەتەكشىسى.
بۇگىندە «سالانگ» اسكەري-پاتريوتتىق كلۋب مۋزەيىندە زۇلمات سوعىستىڭ كۇندەي كۇركىرەگەن ەلەسىندەي ەكى مىڭنان استام جادىگەر ساقتاۋلى تۇر.
سولتۇستىك قازاقستان وبلىسى
