ايماقتار • 21 مامىر، 2019

«WorldSkills Shygys» جۇمىسشى ماماندىعىنىڭ مارتەبەسىن كوتەرەدى

754 رەت كورسەتىلدى

وسكەمەندە «رۋحاني جاڭعىرۋ» باعدارلاماسىن جۇزەگە اسىرۋ ءھام جاستار جىلى اياسىندا «WorldSkills Shygys – 2019» 4 ايماقتىق چەمپيوناتى ءوتتى. ءۇش جۇزگە جۋىق ستۋدەنتتىڭ باسىن قوسقان شارا شەڭبەرىندە جوعارى سىنىپ وقۋشىلارىنا كاسىبي باعىت-باعدار بەرەتىن «My PRO» ماماندىقتار فەستيۆالى مەن «Abilympics Shygys – 2019» I كاسىبي شەبەرلىك چەمپيوناتى دا ۇيىمداستىرىلدى.

قۇزىرەتتىلىك سانى 43-كە كوبەيدى

«WorldSkills Shygys» ايماق­تىق چەمپيوناتىنىڭ ماڭىزى نەدە؟ ستۋدەنتتەر ءۇشىن پايداسى قانداي؟ بايقاۋدىڭ نەگىزگى ۇيىم­داستىرۋشىسى وبلىستىق ءبىلىم باسقارماسىنىڭ بەرگەن مالىمەتتەرىنە جۇگىنسەك، بۇگىندە شىعىس قازاقستانداعى 86 كوللەدجدە 35 مىڭعا جۋىق ستۋدەنت وقىپ جاتىر ەكەن. ونىڭ 52 پايى­زى مەملەكەتتىك تاپسىرىسپەن ءبىلىم الىپ جاتقان كورىنەدى. «بيىل وبلىستىق بيۋدجەتتەن وڭىردەگى كوللەدجدەرگە 6200، ال ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى ارقىلى رەسپۋبليكالىق بيۋدجەتتەن 1730 ورىنعا مەملەكەتتىك تاپسى­رىس بەرىلەدى. بۇل دەگەنىڭىز – 8 مىڭعا جۋىق ستۋدەنتكە مەم­لەكەت ەسەبىنەن تەگىن وقۋ مۇمكىندىگى بەرىلىپ وتىر دەگەن ءسوز. ءبىز مەم­لەكەتتىك تاپسىرىس كولەمىن جىل سايىن ۇلعايتىپ وتىرامىز. وبلىستاعى مەكتەپ تۇلەكتەرىنىڭ 40 پايىزى كوللەدجدەردى تاڭ­دايدى. سوندىقتان ءبىز ولاردىڭ ساپالى ءبىلىم الۋىنا، بىلىكتى مامان بولۋىنا ءمان بەرۋىمىز كەرەك. بارلىق جاعدايدى جاساۋىمىز قاجەت»، دەدى وبلىس اكىمىنىڭ ورىنباسارى اسەم ءنۇسىپوۆا «WorldSkills Shygys» ايماقتىق چەمپيوناتىنىڭ اشىلۋ سالتاناتىنا وراي وتكىزگەن ءباسپاسوز ءماسليحاتىندا.

وبلىس اكىمى ورىنباسارىنىڭ ايتۋىنشا، بۇل بايقاۋدى ۇيىم­داستىرۋداعى باستى ماقسات – سوڭ­عى جىلدارى قوعامدا بەدە­لى تومەندەپ كەتكەن جۇمىسشى ماماندىقتارىنىڭ مارتەبەسىن كوتەرۋ جانە نارىقتا سۇرانىس­قا يە ماماندار دايارلاۋ. «ايماق­تاعى كوللەدجدەردە مامانداردى دايىنداۋ 115 مامان­دىق بويىنشا جۇرگىزىلۋدە. بۇگىندە وبلىستاعى 56 كوللەدج 560 كاسىپ­ورىنمەن بىرلەسە دۋالدى وقىتۋ تەحنولوگياسىن جۇزەگە اسىرىپ جاتىر. وبلىستىق ءبىلىم باسقارماسى كادرلاردى دايىنداۋ بويىنشا 2017 جىلى «قازتسينك» جشس-مەن، بيىل «KAZ Minerals» جشس-مەن مەموراندۋمعا قول قويدى. وسى مەموراندۋم اياسىندا اياگوزدەگى پوليتەحنيكالىق كوللەدج بەن وسكەمەندەگى كوپسالالى تەحنولوگيالىق كوللەدجگە زاماناۋي قۇرىلعىلار ورناتىلادى. وبلىس اكىمدىگى عيماراتتى كۇردەلى جوندەۋدەن وتكىزۋگە كو­مەك­تەسەدى»، دەيدى ءا.ءنۇسىپوۆا.

«WorldSkills» بايقاۋىنىڭ ءبىر تيىمدىلىگى، جاستاردىڭ جۇ­مىسقا ورنالاسۋىنا مۇمكىندىك بەرەدى. «KAZ Minerals Aktoqay» كوم­پانياسىنىڭ باسقارما باسشىسى باۋىرجان ابىلقاسىم ۇلىنىڭ ايتۋىنشا، جۋىردا اياگوزدەگى جانە وبلىس ورتالىعىنداعى ءبىر­نەشە كوللەدجدىڭ ماتەريال­دىق-تەحنيكالىق بازاسى جاڭ­عىرتىلادى. د.سەرىكباەۆ اتىن­داعى شقمتۋ جانىنداعى جوعارى تەحنيكالىق كوللەدج، ءوس­كەمەن كوپسالالى تەحنو­لو­گيالىق كوللەدجى، س.امان­جو­لوۆ اتىنداعى شقمۋ-ءدىڭ جو­عارى كوللەدجى جانە اياگوز پوليتەحنيكالىق كوللەدجىن زاماناۋي وقۋ قۇرالدارىمەن جابدىقتاۋ ءۇشىن كومپانيا 380 ميلليون تەڭگە قاراجات بولمەك. نەگىزگى ينۆەستيتسيا وسكەمەن كوپ­سالالى تەحنولوگيالىق كول­لەدجىندە بەس ماماندىق بويىن­شا اشىلاتىن قۇزىرەتتىلىك ورتالىعىنا جۇمسالادى.

«WorldSkills Shygys» ايماقتىق چەمپيوناتىندا ستۋدەنتتەر بىلتىر 31 قۇزىرەتتىلىك (ماماندىق) بويىنشا سىنعا تۇسسە، بيىل 43-كە كوبەيىپتى. وب­لىستىق ءبىلىم باسقارماسى باسشى­سىنىڭ ورىنباسارى قا­­جىمقان وسپانعاليەۆ «WorldSkills» بايقاۋى رەسپۋبليكادا 5-رەت، ال «Abilympics» كاسىبي شەبەرلىك چەمپيوناتى 2-مارتە ۇيىم­داستىرىلىپ جاتقانىن ايتادى. «بيىل مۇمكىندىگى شەكتەۋلى بالالار اراسىنداعى «Abilympics» چەمپيوناتىن وزىمىزدە وتكىزۋدى ۇيعاردىق. ويتكەنى وبلىس­تا ينكليۋزيۆتى ءبىلىم بەرىپ وتىر­عان بازالىق كوللەدجدەر بار. بۇل – وسكەمەندەگى قىزمەت كور­سەتۋ سالاسى مەن كوپسالالى تەح­نولوگيالىق كوللەدجدەرى جانە سەمەيدەگى شىعىس قازاقستان تەحنولوگيا كوللەدجى. بۇل قاتارعا گلۋبوكوە تەحنيكالىق كوللەدجى دە قوسىلىپ جاتىر. وبلىستا 400-دەن استام ستۋدەنت ينكليۋزيۆتى بىلىممەن قامتىلعان. 2019 جىلى «Abilympics» چەمپيوناتىن ءۇش قۇزىرەتتىلىك («شاشتاراز ءىسى»، «اقپاراتتىق تەحنولوگيا­لار» جانە «ءسان تەحنولوگياسى») بويىن­شا وتكىزۋگە شەشىم قابىل­دا­دىق. كەلەسى جىلى قۇزىرەتتىلىك اياسىن كەڭەيتەتىن بولا­مىز»، دەيدى باسقارما باسشى­سىنىڭ ورىنباسارى.

مۇمكىندىگى شەكتەۋلى جاندارعا مۇمكىندىك بەرگەن بايقاۋ

«Abilympics Shygys – 2019» كاسىبي شەبەرلىك چەمپيو­ناتى وڭىردە العاش رەت ۇيىمداس­تى­رىلعاندىقتان بولار، بيىل بۇل سايىسقا وڭىردەگى 8 كوللەدجدەن 13 مۇمكىندىگى شەكتەۋلى ستۋدەنت قاتىستى. وسكەمەندەگى قىزمەت كورسەتۋ سالاسى كوللەدجىندە وتكەن جارىسقا ءوزىمىز دە ارنايى بارىپ، قاتىسۋشىلارمەن، ولارعا باعا بەرگەن ساراپشىلارمەن پىكىرلەسىپ قايتتىق. ماسەلەن، «شاشتاراز ءىسى» قۇزىرەتتىلىگى بويىنشا ەكى ستۋدەنت سىنعا ءتۇستى. «ەكەۋى دە جاقسى جۇمىس ىستەدى. شاش ۇلگىلەرىن جاسادى. قولدارى دا يكەمدى. جىلدامدىقتارى دا جاقسى. ەڭبەكتەنگەندەرى كورىنىپ تۇر. مۇمكىندىگى شەكتەۋلى دەمەسەڭىز، ون ەكى مۇشەسى ساۋ ستۋدەنتتەردەن جاقسى ونەر كورسەتتى. ولار كەز كەلگەن شاشتارازدا جۇمىس ىستەۋگە دايىن دەپ ايتا الامىن»، دەيدى ەكى ستۋدەنتتىڭ جۇمىسىنا باعا بەرگەن قازىلار القاسىنىڭ مۇشەسى تايىربەك تاسىلباەۆ.

«ءسان تەحنولوگياسى» قۇزىرەت­تىلىگى بويىنشا 8 ستۋدەنت باق سىنادى. «ايەل ادامنىڭ جەي­دەسىن (بلۋزكا) تىكتىك. 6 ساعات ۋاقىت بەرىلدى. 1 ساعات ءۇزىلىس بول­دى. ءوزىم ساعات 9-دا باستاپ، 2-دە ءبىتىردىم. كيىم تىككەن­دى جاق­سى كورەمىن»، دەيدى وسكەمەن­دەگى قىزمەت كورسەتۋ سالاسى كول­لەدجى­نىڭ 3-كۋرس ستۋدەنتى ءاي­گەرىم بايبوسىنوۆا. ولاردىڭ جۇمىسى قازىلار القاسىنىڭ دا كوڭىلىنەن شىققان سەكىلدى. «جاندارى شىعارماشىلىققا جاقىن ەكەندىكتەرى كورىنىپ تۇر. بارىن سالا جۇمىس ىستەپ جاتىر. بايقاۋعا قىزدارمەن بىرگە ءبىر ەر بالا دا قاتىستى. قازىلار لايىقتى باعاسىن بەرەدى دەپ ويلايمىن. ءبىزدىڭ تىلەك – وسىنداي بايقاۋلار كوبىرەك بولسا»، دەيدى قالاداعى «سيلۋەت» اتەلەسىنىڭ قىزمەتكەرى ناتاليا گازەەۆا.

سايىسقا قاتىسۋعا اقسۋات اۋىلىنداعى تارباعاتاي كول­لەدجىن­دە «ديزاينەر» ماماندىعى بويىنشا وقىپ جاتقان قۋانىش قانيبەكوۆ تە كەلىپتى. «بايقاۋ ۇنادى. ءبىرىنشى رەت قاتىسىپ تۇرمىن. كەلەشەكتە اتەلەدە جۇمىس ىستەگىم كەلەدى»، دەيدى ول. قىزمەت كورسەتۋ سالاسى كوللەدجىنىڭ قىزمەتكەرى دينارا ما­قۇلبەكوۆا «اقپاراتتىق تەح­نولوگيالار»، ياعني ءۇشىنشى قۇزىرەتتىلىك بويىنشا وسكەمەن، سەمەي، التاي قالالارىنىڭ ستۋدەنتتەرى ونەر كورسەتكەنىن جەتكىزدى. «مۇمكىندىگى شەكتەۋلى بالالار بولسا دا «WorldSkills» تاپسىرمالارىن الىپ، شامامىز كەلگەنشە جەڭىلدەتىپ ۇسىندىق. ولار ەكى مودۋل بويىنشا جۇمىس ىستەدى. ءبىرىنشى مودۋل بويىنشا جارنامالىق بۋكلەت جاساسا، ەكىنشى مودۋلدە ءار بالا ءوزىنىڭ وقيتىن وقۋ ورنى تۋرالى ەكى-ءۇش مينۋتتىق بەينەروليك دايىندادى. دەنساۋلىقتارىنا بايلانىس­تى جارتى ساعات سايىن دەمالدىرىپ وتىردىق. بارلىعى دا جاقسى جۇمىس ىستەدى»، دەيدى ول.

«Abilympics Shygys» كاسىبي شەبەرلىك چەمپيوناتىنا وبلىس اكىمى دانيال احمەتوۆتىڭ باستاماسىمەن وسكەمەندە بىلتىر اشىلعان «اق نيەت» مەكتەپ-ينتەرناتىنىڭ وقۋشىلارى مەن تۇلەكتەرى دە قاتىستى.

ءۇش كۇنگە سوزىلعان ايماق­تىق چەمپيونات اياسىندا 7-11 سىنىپتىڭ وقۋشىلارىنا ج­ۇ­مىسشى ماماندىقتارىن ءدا­رىپ­تەۋ ماقساتىندا شىعىس قا­زاق­ستان گۋمانيتارلىق كوللەدجىنىڭ بازاسىندا «My PRO» ماماندىقتار فەستيۆالى وتكەنىن دە ايتا كەتەيىك. فەس­تيۆالعا وبلىسىمىزدىڭ تۇك­پىر-تۇكپىرىنەن شاقىرىلعان ءتورت مىڭعا جۋىق وقۋشى ارنايى جابدىقتالعان الاڭداردا ءوڭىردىڭ كوللەدجدەرىندەگى مامان­دىقتارمەن كەڭىرەك تانىسىپ، كوپ بالالى جانە الەۋمەتتىك جاعىنان از قامتىلعان وتباسىنىڭ بالالارىنا بەرىلەتىن جەڭىلدىكتەر، ستيپەنديا كولەمى، جاتاقحانامەن قامتىلۋى، تۇلەكتەردىڭ جۇمىسقا ورنالاسۋى جايىندا ماعلۇماتتار الدى.

بايقاۋ قورىتىندىسىندا سەمەي ەلەكتروتەحنيكا كوللەدجى 8 التىن، 4 كۇمىسپەن كوماندالىق ەسەپتە كوش باستاسا، وسى شاھار­دىڭ بيزنەس جانە سەرۆيس، را­ديو­تەحنيكا جانە بايلانىس كوللەدجدەرى ەكىنشى، ءۇشىنشى ورىنداردى ءوزارا ءبولىستى. «بيىل بۇل چەمپيوناتقا 12 ستۋدەنتىمىز قاتىسىپ، بارلىعى دا جۇلدەلى بولدى. بىلتىر تەك ءبىر نوميناتسيا بويىنشا سىنعا ءتۇسىپ، باس جۇلدە العانبىز. وبلىستا جەڭىمپاز بولعان ستۋدەنتىمىز يساجان رايىسوۆ كەيىن رەسپۋب­ليكالىق سايىستا دا 1 ورىن الدى. ەندى تاتارستاندا وتەتىن الەمدىك جارىسقا بارادى. ءبىز تاتارستان، گەرمانيا، برازيليا ەلدەرىمەن تاجىريبە الماسىپ، بىرلەسە جۇمىس ىستەيمىز. بۇگىنگى جەتىستىگىمىزگە مۇنىڭ دا ۇلكەن اسەرى بولعانى انىق»، دەيدى سەمەي ەلەكتروتەحنيكا كوللەدجىنىڭ ديرەكتورى ازات سارپەكوۆ.

جەڭىمپازداردىڭ بارلى­عىنا «قازتسينك» جشس، «ۆوستوك­تەحنوسەرۆيس» جشس، «وتەل نوماد-سەمەي»، «سەمەي كور­كەم»، «تاسكرەديت»، «شىعىس اجار تورگ»، «پينەگينا ە. ۆ»، «ۆوستوكەليت-ە»، «توپاز»، «فەكليستوۆا ا.ف.»، «Dedeman Oskemen Tavros»، «Welding Company»، «گلۋبوچانكا»، «سيلۋەت» اتەلەسى، «مەرەكە»، «كاراۆاي» كاسىپورىندارىنىڭ دەمەۋشىلىگىمەن اقشالاي جانە باعالى سىيلىقتار تاپسىرىلدى. وڭىرلىك بايقاۋ جەڭىمپازدارى الداعى ۋاقىتتا نۇر-سۇلتان قالاسىندا وتەتىن رەسپۋبليكالىق چەمپيوناتتا وبلىس نامىسىن قورعايتىن بولادى.


وسكەمەن


سوڭعى جاڭالىقتار

نار نارىمبەتوۆ ەدى...

قازاقستان • كەشە

«وميكرون» شتامى وقشاۋلايدى

كوروناۆيرۋس • كەشە

پورترەتتەگى پاراسات

ەلباسى • كەشە

ۇقساس جاڭالىقتار