بيىل قىزىلوردا وبلىسىنىڭ ديقاندارى العاش رەت سويا داقىلىن ەكتى. ونىڭ سەبەبى دە جوق ەمەس. سىر ءوڭىرىنىڭ داڭقىن شىعارعان اق كۇرىش كىرپياز داقىلداردىڭ ءبىرى. ءۇش اي تولارساعىنان سۋ كەشىپ تۇرىپ پىسەتىن كۇرىشتىككە سۋ شىعارۋ قىمباتقا ءتۇسىپ جاتىر. «سۋ باسىندا وتىرعاندار بال, اياعىندا وتىرعاندار ۋ ىشەدى» دەگەندەي, وزىڭدە اقتارىلىپ جاتقان وزەن, كولدەر جوققا ءتان بولعاننان كەيىن جىل سايىن سۋ تاپشىلىعى سەزىلىپ قالادى. سىرداريانىڭ قورەگى نەگىزىنەن قىرعىز الاتاۋىنان شاردارا سۋ قويماسىنا اقتارىلاتىن سۋ. ءتاجىكستاننىڭ پامير تاۋلارىنداعى مۇزداقتار دا ءوزبەكستاندى باسىپ, «دوستىق» كانالى ارقىلى كەلەدى. الايدا, وزىنىكى بولعاندىقتان قونىشىنان باساتىن اعايىندار ءنوپىر سۋ ناق كەرەك كەزىندە كەنەزەڭدى كەپتىرەدى دە قويادى. وسىنى باعامداعان وبلىس اكىمى قىرىمبەك كوشەرباەۆ وبلىس شارۋالارىنا كۇرىش القاپتارىن ازايتۋ جونىندە تاپسىرما بەرگەن.
ويتكەنى جارلاۋىت جەرلەردەگى القاپتارعا سۋ شىعارۋدىڭ مۇمكىندىگى از ءارى قۋراپ كەتەدى. بيىل ايماقتاعى كۇرىش داقىلىن ەگۋ ءۇش مىڭ گەكتارعا ازايدى. الايدا, جاڭا تەحنولوگيا جەتىستىكتەرىن پايدالانۋ داقىلدىڭ ءونىم كولەمىنە اسەر ەتكەن جوق.
وبلىستا سۋدى ۇنەمدەۋ, جەر قۇنارىن ساقتاۋ, ارتتىرۋ جانە ءونىمدى كوبەيتۋ ماقساتىندا توعىز جوبا قولعا الىنعان بولاتىن. سويا – سول داقىلداردىڭ بىرەگەيى. العاش رەت قولعا العاندىقتان ازىرگە 20 گەكتارعا ەگىلىپتى. جەر قۇنارىن ارتتىرۋعا سەپتىگى دە كوپ ەكەن.
– بۇل داقىلدىڭ تۇزدى, سورتاڭدانعان جەرگە وسكەنى وتە ءتيىمدى. مىسالى, 1 گەكتارعا ەگىلگەن قانت قۇمايى 5-6 تونناعا دەيىن سول 1 گەكتار جەردىڭ تۇزىن وزىمەن بىرگە الىپ كەتەدى. تۇزىن ءسىڭىرىپ, سول جەرلەردىڭ تۇزىن ازايتۋعا, ءارى قاراي قۇنارلىعىن جوعارىلاتۋعا ءمۇمكىندىك بەرەدى. مال شارۋاشىلىعىنا قۇنارلى مال ازىعى بولىپ ەسەپتەلەدى, – دەيدى وبلىستىق اۋىل شارۋاشىلىعى باسقارماسى باسشىسىنىڭ ورىنباسارى سەيىلبەك نۇرىمبەتوۆ.
اۋىل شارۋاشىلىعىندا جاڭادان قولعا الىنعان تىڭ توعىز جوبا ايماقتاعى قازاق كۇرىش عىلىمي-زەرتتەۋ ينستيتۋتى عالىمدارىنىڭ ساراپتاماسىنان وتەدى. قىزىلوردا وبلىسىنىڭ جەرى شىبىق شانشىسا دا تامىر الاتىن كەيبىر تابيعاتى مىقتى ايماقتاردىڭ ساناتىنان ەمەس. جەرىنىڭ تۇزدىلىعى جوعارى بولعاندىقتان اناۋ-مىناۋ كوشەتتەر, داقىلدار جەرسىنە بەرمەيدى. سوندىقتان دا جەر جاعدايىنا بەيىم, سىناقتان وتكەن داقىلدارعا باسىمدىق بەرىلىپ وتىر. سونىڭ ءبىرى, سويا بابىن كەلتىرسە, اۋىزدى اققا تيگىزەتىن داقىلداردىڭ ءبىرى.
قىزىلوردا وبلىسى
