باس قالادا 12-ءشى رەت وتكەن اۋقىمدى فورۋمعا احقو وكىلدەرى, ۇكىمەت ءمۇشەلەرى مەن فورۋم سپيكەرلەرى قاتىستى. فورۋمدا ءسوز العان «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ وڭىرلىك قارجىلىق حابتىڭ ارتىقشىلىقتارىن اتاپ كورسەتتى. سونداي-اق ول قارجى ورتالىعىنىڭ الداعى جوسپارىنا توقتالدى.
– احقو-نىڭ باستى ەرەكشەلىگى, اعىلشىن قۇقىعى نەگىزىندە جۇمىس جاسايدى. قازاقستان ورتالىق ازيادا جالپى اعىلشىن قۇقىعى قولدانىسقا ەنگەن بىردەن-ءبىر مەملەكەت. تاعى ءبىر ماڭىزدى قادامداردىڭ ءبىرى – رەتتەۋشى ورگاننىڭ دامۋى بولىپ وتىر. بيىل ءبىز «قازاقتەلەكوم», «Air Astana», «قازمۇنايگاز» كومپانيالارى IPO-عا قاتىسادى دەپ جوسپارلاپ وتىرمىز. احقو بيرجاسىنا قىزىعۋشىلىق تانىتىپ وتىرعان جەكەمەنشىك كومپانيالار دا جەتەرلىك. سولاردىڭ العاشقىلارىنىڭ ءبىرى – رەسەيدىڭ «Polymetal» كومپانياسى. وسىعان دەيىنگى قادامداردى سارالاي كەلە, الداعى ۋاقىتتا جەكەمەنشىك كومپانيالاردىڭ سانى ودان دا ارتا تۇسەتىنىنە سەنىمدىمىز. احقو Fintech, Green Finance جانە يسلامدىق قارجىلاندىرۋ سالاسىن دامىتۋ ءىسىن ودان ارى جالعاستىراتىن بولادى, – دەدى ق.كەلىمبەتوۆ.
القالى جيىندا سونداي-اق احقو بيرجاسى باسقارۋشىسى تيموتي بەننەت ءسوز الدى.
– ءبىز قارقىندى دامىپ كەلە جاتقان جاھاندىق بيرجا قۇرا بىلدىك. «قازاتومونەركاسىپتىڭ» قۇندى قاعازدارىنىڭ وتىمدىلىگى ءبىز جوسپارلاعاننان 3-4 ەسەگە ارتىق بولىپ شىقتى. وسىعان دەيىن ءبىز قازاقستاندا كاپيتال نارىعىن دامىتۋدىڭ بولاشاعى زور ەكەنىن كورسەتە بىلدىك. احقو بيرجاسى ينۆەستورلار بازاسىن كەڭەيتۋ ءىسىن ودان ارى دامىتاتىن بولادى. سەبەبى نارىق كاپيتالىنىڭ جۇرەگى – ينۆەستورلار ەكەنى بارشاعا ايان. AIX يننوۆاتسيالار مەن حالىقارالىق ىنتىماقتاستىقتى دامىتۋعا باسا ءمان بەرىپ وتىر. بۇعان دالەل, AIX وسىدان ءبىر اي بۇرىن قۇندى قاعازدار جانە نارىق جونىندەگى ەۋروپالىق باسقارمامەن (ESMA) سەرىكتەس اتاندى. بۇل ءوز كەزەگىندە, قارجى نارىعىنىڭ تۇراقتى جۇمىسىن قامتاماسىز ەتەتىن بولادى, – دەدى تيموتي بەننەت.
ەسكە سالار جايت, استانا ەكونوميكالىق فورۋمى بيىل «شابىتتاندىرۋشى ءوسىم: ادامدار, قالالار, ەكونوميكا» تاقىرىبىندا ءوتتى. فورۋمدا الەمنىڭ تۇكپىر-تۇكپىرىنەن كەلگەن بەلدى ساراپشىلار مەن جاھاندىق كوشباسشىلار, بيزنەس-قاۋىمداستىق وكىلدەرى ادامزاتتىڭ دامۋىنا قاجەت ماڭىزدى ماسەلەلەرگە قاتىستى ويلارىن ورتاعا سالدى. شەتەلدىك مەيماندار كەڭ كولەمدى شارادا تۇراقتى ءوسۋدىڭ جاڭا جولدارى, ادامي كاپيتالدى دامىتۋ, قالالار الەۋەتىن كەڭەيتۋ سىندى ءتۇرلى تاقىرىپتاردى تالقىلادى.
بۇل رەتتە «استانا» حالىقارالىق قارجى ورتالىعىنىڭ ەلوردانىڭ ەكونوميكالىق جانە قارجىلىق ينفراقۇرىلىمىنىڭ دامۋىنا قوسقان ۇلەسىن اتاپ وتكەن ءجون. قازىردىڭ وزىندە احقو-دا قازاقستان, اقش, ءباا, سينگاپۋر, قىتاي, ۇلىبريتانيا, گەرمانيا جانە فرانتسيا ەلدەرىنەن جۇزدەن استام كومپانيا تىركەلىپ ۇلگەردى. تەك ءبىر جىلدىڭ ىشىندە ءوڭىرلىك قارجىلىق حاب سبەربانك, Master Card, Visa, Euroclear, ERG, SAP, «دامۋ» قورى سىندى ءىرى كومپانيالارمەن ىنتىماقتاستىق جونىندەگى مەموراندۋمعا قول جەتكىزدى. احقو 2020 جىلى تىركەلەتىن كومپانيالار سانىن 500-گە دەيىن جەتكىزۋدى ماقسات ەتىپ وتىر.
كۇنى كەشە عانا احقو باسقارۋشىسى قايرات كەلىمبەتوۆتى قابىلداعان ەلباسى نۇرسۇلتان نازارباەۆ قارجىلىق حابقا زور سەنىم ارتىپ وتىرعانىن مالىمدەگەن بولاتىن. وسى ورايدا, احقو الداعى ۋاقىتتا جاڭا جۇمىس ورىندارىن اشۋ, قارجىلىق جانە قۇقىقتىق قىزمەت كورسەتۋ ساپاسىن ارتتىرۋ, قازاقستاننىڭ عانا ەمەس, جالپى وسى ءوڭىردىڭ الەۋمەتتىك-ەكونوميكالىق جاعدايىن جاقسارتۋعا مول ۇلەس قوسادى دەپ كۇتىلىپ وتىر.
