جاقىندا قىزىلورداداعى گاز بەكەتىنىڭ قىزمەتكەرى مەكەمەنىڭ قارجىسىن ءتۇن تورىعان قاراقشىلارعا الدىرىپ العان. ەشكىمنىڭ سەزىك الماۋىنا سەبەپ, الگى جۇمىسشى تۇندە بەتپەردە كيگەن ەكى قاراقشى قارۋمەن قورقىتىپ, كاسساداعى 263 مىڭ تەڭگەنى تارتىپ الىپ كەتكەنىن ايتقان. بەكەت باسشىلىعى قاق-سوعى جوق, كۇزەتشى ءارى وپەراتور بولىپ ىستەيتىن جىگىتتىڭ ءسوزىنە سەنىپ, پوليتسياعا ارىز ءتۇسىرەدى. وسىلايشا, قالالىق پوليتسيا باسقارماسى قىلمىستىق كودەكستىڭ 191-بابىنىڭ 2-بولىگىنىڭ 3-تارماعىمەن سوتقا دەيىنگى تەرگەپ-تەكسەرۋ امالدارىن قولعا الدى.
بۇل ازاماتتىڭ جالعان حابارلاما بەرۋ جاعدايى كەيىن تاعى جالعاسىپتى. ول تاڭعى ۋاقىتتا گاز قۇيۋ بەكەتىنىڭ الدىندا بەتپەردە كيگەن بەلگىسىز ەكى ازامات پىشاقپەن قورقىتقانىن ايتقان. ولار مەكەمەگە تيەسىلى 240 مىڭ تەڭگەنى «تارتىپ الىپ» كەتكەن. وسىلايشا گاز قۇيۋ بەكەتىنىڭ جۇمىسشىسى ءوزىن جابىرلەنۋشى رەتىندە كورسەتكەن. سوعان بايلانىستى 102 ارناسىنا حابارلاما تۇسكەن. اتالعان حابارلاما بويىنشا تەز ارادا وقيعا ورنىنا جەدەل تەرگەۋ توبى جىبەرىلىپتى.
«باقساق, باقا ەكەن» دەمەكشى, مەكەمەنىڭ اقشاسىن قۇمار ويىنعا تىگىپ جىبەرىپ, ابدەن داندەپ العان «توناۋشى» الگى جىگىتتىڭ ءوزى بولىپ شىعادى.
وسىعان بايلانىستى قىزىلوردا وبلىستىق ءىشكى ىستەر دەپارتامەنتىنىڭ باسپاسوز قىزمەتى: «پوليتسيا قىزمەتكەرلەرى بولعان وقيعانىڭ ءمان-جايىن جان-جاقتى, تولىق جانە وبەكتيۆتى تۇردە زەردەلەدى. ناتيجەسىندە ءوزىن جابىرلەنۋشى رەتىندە كورسەتكەن ازاماتتىڭ جالعان حابارلاما بەرگەنى انىقتالدى. ەكى دەرەككە قاتىستى قىلمىستىق قۇقىق بۇزۋشىلىق مۇلدەم ورىن الماعان. گاز بەكەتىنىڭ جۇمىسشىسى اقشانى قۇمار ويىندارعا سالىپ جىبەرگەن. زاڭسىز ءىس-ارەكەتىن جاسىرۋ ءۇشىن جالعان حابارلاما بەرگەن. ءوزىن جابىرلەنۋشى رەتىندە كورسەتكەن الگى ازامات سوعان بايلانىستى بەرگەن ارىزىنان باس تارتقان. ول وسى بەكەتتىڭ وپەراتورى مەن كۇزەتشىسى قىزمەتىن قوسا اتقارعان», دەپ حابارلايدى.
قازىرگى تاڭدا قىلمىستىق كودەكستىڭ 189-بابىنىڭ 1-ءبولىگىمەن سوتقا دەيىنگى تەرگەپ-تەكسەرۋ جۇرگىزىلىپ جاتىر. وندا سەنىپ تاپسىرىلعان ءبوتەن م ۇلىكتى يەمدەنىپ الۋ نەمەسە تالان-تاراجعا سالۋ جايى كورسەتىلگەن. سونداي-اق ول جالعان حابارلاما بەرۋ دەرەگى ورىن الۋىنا بايلانىستى 419-بابىنىڭ 3-بولىگىمەن پايداكۇنەمدiك نيەتپەن جاسالعان كوپە-كورiنەۋ جالعان ءسوز جەتكiزۋ بويىنشا جاۋاپ بەرەتىن بولادى.
كۇدىكتىگە قاتىستى «كەپىل» تۇرىندەگى بۇلتارتپاۋ شاراسى قولدانىلدى. كۇدىكتى تۇلعانىڭ كىناسى دالەلدەنگەن جاعدايدا سوت شەشىمىمەن ونىڭ ءۇش جىلدان جەتى جىلعا دەيىنگى مەرزىمگە باس بوستاندىعى شەكتەلەدى نەمەسە سول مەرزiمگە باس بوستاندىعىنان ايىرۋ جازاسى قولدانىلۋى مۇمكىن.
قۇمار ويىننىڭ قۇلقىنىنا ءتۇسىپ, ءوزى ناپاقاسىن ايىرىپ وتىرعان مەكەمەنىڭ قارجىسىن ۇرلاعان جىگىت بۇگىندە بارماعىن شايناپ وتىر.
قىزىلوردا وبلىسى
