ارمەنيا پرەزيدەنتى قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ باسشىلىعىمەن قول جەتكىزگەن جەتىستىكتەرىن جوعارى باعالاپ, «ماڭىزدى شەشىمدەر قابىلداۋداعى ەلباسىنىڭ دانالىعى مەن ءوز حالقىن العا باستاۋداعى قارقىندى ىستەرىن» اتاپ ءوتتى.
د.نازارباەۆا استانا ەكونوميكالىق فورۋمىنا بەلسەندى قاتىسقانى جانە ەۋرازيالىق مەديا فورۋمعا تۇراقتى قولداۋ كورسەتكەنى ءۇشىن ا.ساركيسيانعا العىس ءبىلدىردى. «ەۋرازيالىق مەديا فورۋمعا سىزدەردىڭ قاتىسۋىڭىز بارشاعا ورتاق توسىن سىي بولادى. ءسىز «مەديا فورۋمنىڭ اكەسى» بولىپ تابىلاسىز جانە مەديا قوعامداستىعىنىڭ باتىس بولىگى اراسىندا ونى ىلگەرىلەتۋ ءۇشىن كوپتەگەن ءىس اتقاردىڭىز» دەدى پارلامەنتتىڭ جوعارعى پالاتاسىنىڭ باسشىسى.
ارمەنيا پرەزيدەنتى ءوز ەلىندەگى ىشكى ساياسي جاعداي تۋرالى سەنات باسشىسىنا ايتىپ بەرىپ, قازىرگى كۇردەلى ماسەلەلەردى ەڭسەرۋ جانە دامۋدىڭ جاڭا جولىنا شىعۋدا ارمەنيا حالقىنىڭ مۇمكىندىگى جەتكىلىكتى ەكەنىن اتاپ ءوتتى.
سەنات توراعاسى ارمەنيا ترانزيت كەزەڭىن ەڭسەرەتىنىنە سەنىم ءبىلدىردى جانە ەلدەگى ماڭىزدى ساياسي وقيعالار تۋرالى ا.ساركيسياندى حاباردار ەتىپ, قازاقستان حالقى بولاشاققا زور سەنىممەن قارايتىنىن اتاپ ءوتتى. «بەيبىتشىلىك پەن تۇراقتىلىقتى ساقتاۋ جانە ەلباسىنىڭ ستراتەگيالىق باعىتىن جالعاستىرۋ – باستى مىندەت», - دەدى سەنات باسشىسى.
سەنات توراعاسى ارمەنيانىڭ ۇلتتىق جينالىسىمەن ىنتىماقتاستىقتى ودان ءارى دامىتۋعا مۇددەلىلىك ءبىلدىردى. د.نازارباەۆانىڭ پىكىرىنشە, زاڭ شىعارۋ قىزمەتى بويىنشا تاجىريبە الماسۋ ءۇشىن جانە ەكىجاقتى قارىم-قاتىناستاردى كەڭەيتۋ جولدارى تۋرالى پىكىرلەسۋ ارقىلى پارلامەنتتىك دوستىق توپتارىنىڭ الەۋەتىن بەلسەندى پايدالانۋ قاجەت.
تاراپتار ىنتىماقتاستىقتىڭ كەلەشەگى زور سالالارىن تالقىلادى. ارمەنيا پرەزيدەنتى ەرەۆاننىڭ جاساندى ينتەللەكت پەن IT تەحنولوگيالاردى دامىتۋ, تاماق قاۋىپسىزدىگىن قامتاماسىز ەتۋدەگى تاجىريبەسىمەن بولىسۋگە دايىن ەكەنىن اتاپ ءوتتى.
سەنات توراعاسى شەتەلدەگى ارميان دياسپوراسىن قحر, رەسەي جانە باسقا دا ەلىمىزبەن شەكتەسەتىن ءۇشىنشى مەملەكەتتەرمەن ساۋدا جاساۋداعى ارتىقشىلىقتاردى پايدالانىپ, قازاقستانعا ينۆەستيتسيا سالۋعا شاقىردى.
