ساياسات • 20 مامىر، 2019

ينۆەستيتسيالار اعىنى تولاستامايدى

737 رەت كورسەتىلدى

ءحىى استانا ەكونوميكالىق فورۋمى اياسىندا قازاقستان پرەمەر-ءمينيسترى اسقار ءماميننىڭ قاتىسۋىمەن جاھاندىق ينۆەستيتسيا­لار جونىندەگى ءۇشىنشى قازاقستاندىق دوڭگەلەك ۇستەل ءوتتى. وعان الەمنىڭ 41 ەلىنەن 600-گە جۋىق شەتەلدىك مامان جينالدى.

پلەنارلىق سەسسيادا باسەكەگە قابىلەتتىلىكتى ارتتىرۋ، كولىك-لو­گيستيكا، اگروونەركاسىپ الەۋەتىن، قارجى نارىقتارى مەن تەحنولوگيالاردى دامىتۋ، مەملەكەتتىك اكتيۆتەردى جەكەشەلەندىرۋ ماسە­لەلەرى تالقىلاندى. سەسسيانى Global China جۋرنالىنىڭ باس رەداكتورى جانە Financial Times دامۋشى نارىقتار جونىندەگى رەداكتورى دجەيمس كين جۇرگىزدى.

«ينۆەستيتسيالار – ءبىزدىڭ ەكونوميكانىڭ دامۋى مەن ءوسىمىنىڭ ىرگەلى فاكتورى بولىپ قالا بەرەدى. تاۋەلسىزدىك العان جىلداردان بەرى قازاقستان ەكونوميكاسىنا 300 ملرد دوللار ينۆەستيتسيا تار­تىل­دى. بۇل جەتىستىكتەرىمىز ايماق­تاعى باسەكەگە قابىلەتتى ءارى ءىرى ەكو­نوميكاعا يە بولۋعا مۇمكىندىك بەردى. ءىجو وتكەن جىلى 4 پايىزعا ءوستى. سىرتقى ساۋدا 20 پايىزعا ارتىپ، ونىڭ اسەرى ەكسپورت كولەمىن 26 پايىزعا ارتتىرۋعا سەپتىگىن تيگىزدى. وسى قارقىندى ساقتاي الساق، جىلدىڭ سوڭىنا دەيىن ەكونوميكالىق اينالىم 100 ملرد دوللارعا جەتىپ قالۋى كەرەك»، دەدى ا.مامين.

ۇكىمەت باسشىسىنىڭ ايتۋىنشا، ينۆەستيتسيالار – قازاقستان ەكونوميكاسىنىڭ ءوسىمى مەن دا­مۋىنىڭ ىرگەلى فاكتورى. 2018 جى­لى قازاقستانعا 24 ملرد اقش دوللارىنان استام تىكەلەي شەتەل­دىك ينۆەستيتسيا سالىندى. بۇل كورسەتكىش ورتالىق ازيا­داعى تىكەلەي شە­تەل­دىك ينۆەس­تيتسيالاردىڭ جالپى كولەمىنىڭ 90 پايىزدان استامىن قۇرايدى.

حالىقارالىق كاپيتال اعىنىن ودان ءارى كۇشەيتۋ ماقساتىندا ۇكىمەت ينۆەستورلاردى جان-جاق­تى قولداۋدى قامتاماسىز ەتەتىن جاڭا تاسىلدەردى ەنگىزىپ جاتىر. ماسەلەن، ۇكىمەت باسشىسى «استانا» حالىقارالىق قارجى ورتالىعى شەتەلدىك تىكەلەي ينۆەستيتسيالاردى تارتۋدا شەشۋشى رولگە يە بولاتىنىن ايتتى. «ءبىز قالىپتاستىرىپ وتىرعان قارجىلىق جانە ينۆەستيتسيالىق ەكوجۇيە قازاقستاندى ايماقتىق جانە حالىقارالىق قارجىلىق ورتالىق ەتۋگە جول اشارى داۋسىز. شيكىزاتتىق ەمەس سەكتورعا ينۆەس­تيتسيا سالۋ جۇيەسىن جەڭىلدەتۋ ءۇشىن ءبىز شەتەلدىك تىكەلەي ينۆەس­تيتسيالار قورىن قۇردىق. 1 ملرد دوللار كولەمىندەگى كاپيتالدانۋ مۇمكىندىگىنە يە بولعان قور قار­جىلىق رەسۋرستاردى كەلەشەگى مول ەكسپورتتىق سالالارعا باعىتتاي وتىرىپ، جەرگىلىكتى نارىقتاعى اكتسيالاردىڭ دامۋىنا نەگىز بولۋى ءتيىس»، دەدى ا.مامين.

ۇكىمەت باسشىسى قاتىسۋ­شى­لاردى قازاقستاندا بيزنەس ءجۇر­گىزۋگە جانە ينۆەستيتسيا سالۋعا، سو­نىڭ ىشىندە جەكەشەلەندىرۋ باع­دارلاماسى اياسىنداعى ءتيىمدى ءمۇم­كىندىكتەردى قاراستىرۋعا شا­قىردى. 

پلەنارلىق وتىرىستا ساياساتكەر جانە ەكونوميست، تۇركيانىڭ ەكس ۆيتسە-پرەمەرى مەحمەت ءشىم­شەك، ەدققب بانكتىك وپەراتسيا­لار بويىنشا ۆيتسە-پرەزيدەنتى الان پيۋ، BCG-نىڭ توراعاسى حانس-پول بيۋركنەر، ازيالىق ين­فرا­قۇرىلىمدىق ينۆەستيتسيا­لار بانكىنىڭ ساياسات پەن ستراتەگيا جونىندەگى ۆيتسە-پرەزيدەنتى يواxيم فون امسبەرگ، China CITIC Bank Corporation Limi­ted ديرەكتورلار كەڭەسىنىڭ ءتورا­يىمى لي تسينپين، Bitfury Group كوپسالالى بلوكچەين كومپا­نياسىنىڭ باس ديرەكتورى جانە نەگىزىن قالاۋشىلاردىڭ ءبىرى ۆالەري ۆاۆيلوۆ ءسوز الدى.

فورۋم قورىتىندىسى بويىن­شا ەلەۋلى ينۆەستيتسيالىق كە­لىسىمدەرگە قول جەتكىزىلىپ، جالپى قۇنى 8،3 ملرد اقش دوللارىن قۇرايتىن 43 كوممەرتسيالىق كەلىسىمگە قول قويىلدى.

سوڭعى جاڭالىقتار

شىرقاۋ شىڭى شوقاننىڭ

رۋحانيات • كەشە

ۇقساس جاڭالىقتار