رۋحانيات • 20 مامىر، 2019

«باتىر اسا ۇستامدىلىعىمەن تاڭداندىردى»

864 رەت كورسەتىلدى

ەكى مارتە كەڭەس وداعىنىڭ باتىرى تالعات بيگەلدينوۆتىڭ ۇلى وتان سوعىسى جىلدارىندا 305 رەت اسكەري تاپسىرمامەن اۋەگە كوتەرىلىپ، 305 رەت ولىممەن بەتپە-بەت كەزدەسكەنى كوزى تىرىسىندە-اق اڭىز بولىپ تارادى.

ايناش ەسالى

«اسپان ادامى» اتانعان عاجايىپ باتىردىڭ مايدانداعى ەرلىكتەرىنە شولۋ جاساساڭىز، ادام اقىلىنا سىيمايتىن ميستيكالىق وقيعالارعا دا تاپ كەلەسىز.

«ءمىنسىز ۇشاق دەگەن بولمايدى. بىراق سەن ءوز ۇشاعىڭدى جاقسى كورۋىڭ كەرەك. ول جانسىز زات بولسا دا، ءوز سۇيىسپەنشىلىگىمەن ساعان جاۋاپ بەرەدى. ماشينانىڭ جانى ءسىرى بولدى. كەيدە قايتا بەرگەندە – ونىڭ ءبۇتىن، امان قالعان ءبىر جەرى جوق، شۇرق-تەسىك جىرتىلعانىن كورەسىڭ. ال بىراق ۇشاق جۇمىس ىستەپ تۇرادى...» دەيتىن باتىردىڭ اسپانمەن تالاسقان تاعدىرىندا قانشاما تىلسىم جاتىر.

ال بۇگىنگى سۋرەت ءبىزدى تالعات بيگەلدينوۆ سىندى ءبىرتۋار قازاقپەن قايتا قاۋىشتىرىپ وتىر.

– بۇل سۋرەتتى 2000 جىلدارى ءتۇسىردىم. مەن ول كەزدە وبلىستىق «سىر بويى» گازەتىنىڭ فوتوتىلشىسىمىن. وبلىس اكىمى وتكىزەتىن جينالىستاردىڭ بىرىنەن قالمايمىن. گازەت نومىرىنە كۇندەلىكتى سۋرەت بەرەمىن. وبلىس اكىمى كەزەكتى جيىن وتكىزىپ جاتقان بولاتىن، سول ارادا جۋرناليستەر ءوزارا سىبىرلاسىپ جاتتى. سوزدەرىنەن ۇققانىم، ءبىرىنشى قاباتتاعى كىشى زالدا كەڭەس وداعىنىڭ ەكى مارتە باتىرى تالعات بيگەلدينوۆ وتىر.

مۇندا وبلىس اكىمىنىڭ پارلامەنت دەپۋتاتتارىمەن كەزدەسۋى ءجۇرىپ جاتقان بولاتىن. سول جينالىستان شىعىپ 5-6 جۋرناليسپەن ءبىرىنشى قاباتقا كەلسەك، تالعات اعامىز سويلەپ جاتىر ەكەن. بىراق باتىر قاتىسىپ جاتقان جيىندا ادام از. قوعامدىق وتىرىس پا ەكەن، الدە دوسااف-تىڭ جينالىسى ما، انىعى ەسىمدە جوق. مەنىڭ ءمىندەتىم – داڭقتى باتىردىڭ ءوزى كەلىپ تۇرعاندا، كادر ءتۇسىرىپ الىپ قالۋ.

بۇل ءساتتى مەن ماڭگىلىك ەسىمە ساقتاپ قالدىم. تالعات اعامىز ءبىزدى مىنەزىنىڭ بايلىعىمەن تاڭ قالدىردى. مەنىڭ قاسىمدا تۇرعان ورىس گازەتىنىڭ شالا قازاعى تالعات اعامىزعا توتەسىنەن سۇراق قويىپ: «ءسىز كەڭەس وداعىنىڭ ەكى مارتە باتىرى اتاعىن قالاي الدىڭىز؟» – دەگەندە، قاسىندا تۇرعان بىزدەر دە ىڭعايسىزدانىپ قالدىق.

الايدا تالعات اعامىز اشۋلانعان دا، كۇلگەندە جوق. ەكى مارتە قالاي «گەروي» بولعانىن ءتۇسىندىرىپ ايتىپ بەردى. باسقا ادام بولسا سول ءجۋرناليستى قۋىپ ءجىبەرەر مە ەدى. وسى وقيعادان كەيىن باتىردىڭ وتە مادەنيەتتى، اسا سابىرلى كىسى ەكەنىن بىلدىك، – دەيدى قىزىلوردالىق ءفوتوتىلشى بولات وماراليەۆ.

الماتى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز