وعان 150 تۇرعىن ءوز وتىنىشتەرىن ايتا كەلدى. 32 ادامدى ايماق باسشىسى قۇمار اقساقالوۆ قابىلدادى.
بەرەكە اۋدانىنىڭ تۇرعىندارى سەۆەرنايا كوشەسى جولىنىڭ ساپاسىزدىعى جانە ءا.دوسمۇحامبەتوۆ كوشەسىندەگى جارىق شامدارىنىڭ جوقتىعى تۋرالى ارىزداندى. قۇمار ىرگەباي ۇلى كوشەگە قيىرشىق تاس توسەۋ, جارىقتاندىرۋ اعىمدىق جوسپارعا ەنگەنىن جەتكىزدى. ءوز مۇڭدارىن جەتكىزە كەلگەن ساتپاەۆ كوشەسىنىڭ تۇرعىندارى اۋلالاردى جوندەۋگە جارتى ميلليارد تەڭگە بولىنگەنىن, 60 اۋلا جوندەلەتىنىن, ونىڭ ىشىندە وزدەرىنىڭ دە پروبلەماسى شەشىم تاباتىنىن ەستىپ, جاڭالىقتى ءبولىسۋ ءۇشىن ۇيلەرىنە قاراي اسىقتى.
«سەنسيتيۆ» بي ءانسامبلىنىڭ جەتەكشىسى ولگا روستوۆششيكوۆا ءوڭىر باسشىسىنا بي تەاترىن اشۋ ۇسىنىسىمەن كەلدى. وسىدان 13 جىل بۇرىن مىلقاۋ بالالارعا ارنالعان مەكتەپ-ينتەرنات جانىنان قۇرىلعان سپورتتىق بالدىق بي ۇجىمى رەسپۋبليكادا بىرەۋ عانا. اقش-تىڭ كاليفورنيا قالاسىندا وتەتىن الەمدىك چەمپيوناتقا قاتىسۋ قۇرمەتىنە يە بولىپتى. باستاما بىردەن قولداۋ تاۋىپ, قارجىلىق جايى دا قاناعاتتاندىرىلدى.
قوعامدىق قابىلداۋ كورسەتكەندەي, جۇرتشىلىقتى اباتتاندىرۋ, سۋ, جول, باسپانا ماسەلەلەرى دە از تولعاندىرمايتىن بولىپ شىقتى. ماسەلەن, 7 بالانىڭ اناسى تاتيانا پيپۋس تۇرىپ جاتقان باسپانا اپاتتىق جاعدايدا دەپ تانىلىپتى. بيىل قارعىن سۋ شايىپ كەتىپ, جاعداي ءتىپتى قيىنداپ كەتكەن كورىنەدى. پاتەر كەزەگىندە 3058 بولىپ تۇر. وعان جالدامالى باسپاناعا قول جەتكىزگەنشە قوناق ءۇي تۇرىندەگى پاتەرگە كوشۋ ۇسىنىلدى. ءسوز اراسىندا تىركەۋگە الىنعان كوپبالالى وتباسىلاردىڭ ۇشتەن ءبىرىن بيىل پاتەرمەن قامتاماسىز ەتۋ ءۇشىن قاراجات بولىنگەنىن ايتا كەتكەن ءجون.
سول سياقتى نادەجدا حلوپتسەۆا, يرينا گوردەەۆا سەكىلدى كوپ بالالى انالار قالا اكىمى بولات جۇمابەكوۆتىڭ قابىلداۋىندا بولىپ, وزدەرىن تولعانتقان الەۋمەتتىك ماسەلەلەردى ورتاعا سالدى.
«اشىق قوعامدىق قابىلداۋ – حالىقپەن كەرى بايلانىس جاساۋدىڭ بىردەن-ءبىر ءتيىمدى جولى. ءبىز تۇرعىنداردىڭ جاعدايلارىن شەشۋمەن قاتار اتقارىلىپ جاتقان جۇمىستار جايلى دا حاباردار ەتەمىز. وسى ۋاقىتتا دەيىن بارلىعى 700-دەن اسا ادام قايرىلدى. مەن ءوزىم 146 سولتۇستىكقازاقستاندىقتى قابىلدادىم. مامليۋت اۋدانى لەدەنەۆو سەلوسىنىڭ تۇرعىندارى اۋىلدىڭ ىشىنە سۋ تاراتۋ جۇيەسىن سالۋدى سۇراعان ەدى. بيىل 40 اۋىلعا 400 كولونكا قويىلادى. وبلىس ورتالىعىنداعى پەرۆوماي كوشەسىندە 4 اپاتتى ءۇي ءسۇرىلىپ, تۇرعىندارعا باسپانا بەرىلەدى. كەيبىر ماسەلەلەر ۋاقىتتى تالاپ ەتەدى», دەدى قۇمار اقساقالوۆ باق وكىلدەرىنە بەرگەن سۇحباتىندا.
