ش.ايمانوۆ بۇكىل سانالى عۇمىرىن تەاتر ونەرى مەن كينو سالاسىن قالىپتاستىرۋ مەن دامىتۋعا ارنادى. ول – سان قىرلى تالانت يەسى. اكتەر رەتىندە كەيىپكەرىنىڭ جان دۇنيەسىن اشۋعا جانە سوعان لايىقتى ۇتىمدى قيمىل-ارەكەتتەر جاساۋ شەبەرلىگىمەن ەرەكشەلەنسە, رەجيسسەر رەتىندە شىعارماعا يدەيالىق مازمۇن دارىتۋعا, ۇلتتىق بولمىسىمىزدىڭ بوياۋىن قانىق ەتۋگە, زامان مەن قوعام تۋرالى فيلوسوفيالىق وي-تولعام جاساۋعا ايىرىقشا ءمان بەرۋىمەن دارالاندى. ش.ايمانوۆتىڭ رەجيسسەرلىگىمەن تۇسىرىلگەن ء«بىزدىڭ سۇيىكتى دارىگەر», «اتامەكەن», «الدار كوسە», «تاقيالى پەرىشتە», «اتاماننىڭ اقىرى» سەكىلدى كارتينالار ۇلتتىق كينونىڭ ۇزدىك ۇلگىلەرىنە اينالدى. بۇل فيلمدەر ءالى كۇنگە دەيىن قالىڭ كورەرمەننىڭ ءسۇيىپ كورەتىن كينولارى قاتارىندا.
ءمۇسىننىڭ اشىلۋ سالتاناتىنا الماتى قالاسى اكىمى باۋىرجان بايبەك, ورىنباسارى ارمان قىرىقباەۆ, كسرو حالىق ءارتىسى, قازاقستاننىڭ ەڭبەك ەرى ءاسانالى ءاشىموۆ, قازاقستاننىڭ حالىق ءارتىسى, ەڭبەك ەرى يۋري پومەرانتسەۆ, اقىن, مەملەكەت جانە قوعام قايراتكەرى ولجاس سۇلەيمەنوۆ, كسرو حالىق ءارتىسى, سوتسياليستىك ەڭبەك ەرى بيبىگۇل تولەگەنوۆا, «تاقيالى پەرىشتە» ءفيلمىنىڭ باستى كەيىپكەرلەرى الىمعازى رايىمبەكوۆ, شولپان التايباەۆا جانە وزگە دە تەاتر مەن كينو ونەرىنىڭ تارلاندارى, ش.ايمانوۆتىڭ ۇرپاقتارى مەن تۋعان-تۋىستارى قاتىستى. قوناقۇي الدىنا جينالعان قاۋىمدى ش.ايمانوۆ ءمۇسىنىنىڭ اشىلۋىمەن قۇتتىقتاپ, ءسوز العان الماتى قالاسىنىڭ اكىمى باۋىرجان بايبەك دارا تۇلعانىڭ بىرەگەي قاسيەتتەرى تۋرالى جان-جاقتى اڭگىمەلەدى.
– ەلباسى ن.نازارباەۆ « ۇلى دالانىڭ جەتى قىرى» اتتى باعدارلامالىق ماقالاسىندا ەلگە ەڭبەگى سىڭگەن, اتاقتى تاريحي تۇلعالارىمىز بەن ولاردىڭ جەتىستىكتەرىن وسكەلەڭ ۇرپاققا ۇلگى ەتىپ دارىپتەۋ ءۇشىن ەسكەرتكىش-مۇسىندەر ورناتۋ قاجەتتىگىن اتاپ كورسەتكەن بولاتىن. سوڭعى جىلداردىڭ وزىندە ەلباسى تاپسىرماسىمەن قالامىزدىڭ تاريحىنان سىر شەرتەتىن كوپتەگەن ەسكەرتكىشتەر بوي كوتەردى, 60-تان استام ەلەۋلى تۇلعالار ءومىر سۇرگەن ۇيگە تاقتالار ورناتىلدى. الداعى ۋاقىتتى قىز جىبەك پەن تولەگەنگە, ءشامشى قالداياقوۆقا جانە بالۋان شولاققا ەسكەرتكىش ورناتۋ جوسپارلانعان. بۇگىنگى اشىلىپ وتىرعان ش.ايمانوۆ ەسكەرتكىشى دە ەلباسى تاپسىرماسىنىڭ ورىندالۋىنىڭ بىردەن-ءبىر كورىنىسى. حالقىمىزدىڭ داڭقتى ونەر مايتالمانىنا كورسەتىلگەن قۇرمەت.
بۇدان كەيىن ەسكەرتكىشتىڭ شىمىلدىعى تۇرىلگەندە, كوشەنىڭ قارسى بەتىندەگى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنا ويلى جانارىن قاداي, شابىتقا تولى قيالى شارىقتاپ, كەزەكتى تۋىندىسىنا تولعانىپ وتىرعانداي ساتتە بەينەلەنگەن شاكەن كەلبەتى جارق ەتە ءتۇستى. ءوزى وتىرعان ورىندىقتىڭ ارقالىعىن قاپسىرا قۇشاقتاپ, اياقتارىن ايقاستىرعان كۇيى الىسقا كوز تىككەن. كوز ۇيرەنگەن ەسكەرتكىشتەردەن ەرەك. ءمۇسىننىڭ كومپوزيتسياسى, يدەيالىق شەشىمى, تەحنيكالىق ورىندالۋى شىعارماشىلىقتى بارىنەن بيىك قويىپ, ۇنەمى شابىت ۇستىندە جۇرگەن شاكەن-شەبەردىڭ بولمىسىن قولمەن قوندىرعانداي ءدال تاپقان. قوڭىرقاي ءتۇستى قولادان قۇيىلعان ءمۇسىننىڭ اۆتورى – بەلگىلى ءمۇسىنشى نۇرلان دالباي.
ش.ايمانوۆ ەسكەرتكىشىنىڭ اشىلۋ سالتاناتىندا ونىڭ عاجايىپ كارتينالارىنداعى كوكتەمنىڭ وزىندەي جاندى باۋراپ الاتىن كوركەم اندەرى ورىندالىپ, تالانتتىڭ كوزىن كورگەندەر تەبىرەنىسكە تولى ەستەلىكتەرىمەن ءبولىستى. ماەسترونىڭ ەشكىمگە ۇقسامايتىن ەرەكشە بەينەسىنىڭ جانىندا تۇرىپ سۋرەتكە تۇسكەندەردىڭ قاتارى كوپكە دەيىن تولاستامادى.
