اتالعان قۇجات شاعىمدار مەن ءوتىنىشتەردىڭ تالداۋىن, مونيتورينگ قىزمەتىنىڭ, سونداي-اق مەملەكەتتىك ورگاندارمەن, حالىقارالىق جانە ۇكىمەتتىك ەمەس قۇقىق قورعاۋ ۇيىمدارىمەن ءوزارا ءىس-قيمىلىنىڭ ناتيجەلەرىن كورسەتەدى.
ومبۋدسمەن ەسەپتىك جىلى دەنساۋلىق ساقتاۋ, ازاماتتاردىڭ تۇرعىن ءۇي قۇقىقتارىن قورعاۋ, بالالار مەن قوعامداعى باسقا وسال توپتاردىڭ قۇقىقتارىن قامتاماسىز ەتۋ, قۇقىق قورعاۋ جانە سوت جۇيەسىن رەفورمالاۋ باسىم باعىتتارىنىڭ ءبىرى بولعانىن اتاپ ءوتتى.
بىلتىر ادام قۇقىقتارى جونىندەگى ۋاكىلگە 1811 ازامات قۇقىقتارىنىڭ بۇزىلۋىنا بايلانىستى شاعىمدانعان. ءوتىنىشتەردىڭ باسىم بولىگى نۇر-سۇلتان جانە الماتى قالالارىنان, اقمولا, قاراعاندى, قوستاناي وبلىستارىنان تۇسكەن.
مەملەكەتتىك, ونىڭ ىشىندە قۇقىق قورعاۋ ورگاندارىنىڭ لاۋازىمدى تۇلعالارىنىڭ ءىس-ارەكەتتەرىنە جانە ارەكەتسىزدىگىنە (28%), سوت شەشىمدەرىمەن كەلىسپەۋ (26%), الەۋمەتتىك قۇقىقتاردىڭ بۇزىلۋى (17,5%) شاعىمداردىڭ كورسەتكىشتەرى جوعارى بولىپ قالىپ وتىر.
ادام قۇقىقتارىنىڭ وزەكتى ماسەلەلەرى بويىنشا ۇسىنىستار مەن ۇسىنىمدار ومبۋدسمەننىڭ ۇكىمەتكە, جوعارعى سوتقا, باس پروكۋراتۋراعا جانە باسقا دا مەملەكەتتىك ورگاندارىنا جىبەرگەن ءۇندەۋلەرىندە كورىنىس تاپتى.
جوعارىدا اتالعان ۇسىنىمدارعا جەكە مەملەكەتتىك ورگانداردىڭ ۋاقتىلى ءجانە سىندارلى تۇردە جاۋاپ بەرمەۋى, وسى ماسەلە بويىنشا تىكەلەي پرەمەر-مينيسترگە ءجۇگىنۋگە سەبەپ بولدى. تۇتاستاي العاندا, ۇلتتىق قۇقىق قورعاۋ مەكەمەسىنىڭ ۇكىمەتپەن ءوزارا ءىس-قيمىلىنىڭ تيىمدىلىگى وڭ باعالاندى.
تۇساۋكەسەر بارىسىندا ادام قۇقىقتارى ماسەلەلەرى بويىنشا جان-جاقتى پىكىر الماسۋلار مەملەكەتتىك ورگاندار مەن ازاماتتىق قوعام اراسىنداعى ديالوگتى دامىتۋعا ىقپال ەتتى.
جىل سايىنعى ەسەپ بۇدان ەرتەرەك مەملەكەت باسشىسىنىڭ قاراۋىنا ۇسىنىلىپ, ونىڭ قورىتىندىسى بويىنشا مەملەكەتتىك ورگاندارعا قاجەتتى شارالار قابىلداۋ ءۇشىن ءتيىستى تاپسىرمالار بەرىلگەن-ءدى.
جالپى, تۇساۋكەسەرگە قاتىسۋشىلار ومبۋدسمەن مەكەمەسىنىڭ وتكەن جىلعى قىزمەتىنە وڭ باعا بەرىپ, ادام قۇقىقتارىن باقىلاۋداعى ماڭىزدى ءرولى, ازاماتتاردىڭ كونستيتۋتسيالىق قۇقىقتارىن ءىسكە اسىرۋعا, ادام قۇقىقتارى سالاسىنداعى حالىقارالىق نورمالار مەن ستاندارتتاردى يمپلەمەنتاتسيالاۋداعى قوسقان ۇلەسى جانە ىقپالى اتاپ ءوتىلدى.
