ايماقتار • 16 مامىر، 2019

قاراعاندىدا ترياتلون-ساياباق سالىنادى

757 رەت كورسەتىلدى

كەنشىلەر استاناسىندا «كوگىلدىر توعاندار» جانە وڭتۇستىك-شىعىس شاعىن اۋداندارىنىڭ اراسىندا ترياتلون-ساياباق بوي كوتەرەدى. اشىق اسپان استىنداعى بىرەگەي سپورت نىسانىن «رۋحاني جاڭعىرۋ» باعدارلاماسى اياسىندا جەكە قۇرىلىس كومپانياسى سالادى.

– جۇمىس كەزەڭ-كەزەڭمەن ءجۇرىپ جاتىر. قۇرىلىس الاڭىن دايىنداپ، اۋماقتى تازالادىق. جاقىن ارادا قاجەتتى رۇقسات قاعازدارى قولعا تيەدى. الداعى ۋاقىتتا جاعالاۋ جولاعىن تازارتىپ، جارىقتاندىرۋ جۇمىستارىنا كىرىسەمىز.  شاحتەر كۇنىندە قاراعاندىلىقتارعا مەرەكەلىك تارتۋ جاساۋ ءۇشىن تامىز ايىندا قۇرىلىستى اياقتاۋدى جوسپارلاپ وتىرمىز، –  دەيدى «Eurasia Building» توبىنىڭ توراعاسى ايدوس مۇحاتاەۆ.

ترياتلون-ساياباقتا تارتان مەن اسفالت بەتونى توسەلگەن ۇزىندىعى 5 شاقىرىم جۇگىرۋ جانە ۆەلوسيپەد جولدارى سالىنادى. الىس جانە قىسقا قاشىقتىقتارعا ءجۇزۋ ءۇشىن قالقىمالى كوپىر جابدىقتالادى. 100 ۆەلوسيپەدكە ارنالعان سپورت الاڭقايى مەن ترانزيتتىك اۋماق، اۆتوتۇراق، تەننيس كورتى، ەگدە ادامدارعا جانە كىشكەنتاي بالالارى بار اتا-انالارعا ارنالعان دەمالىس ايماعى قاراستىرىلعان. جاڭا سپورت نىسانىندا حالىقارالىق جارىستاردى دا وتكىزۋگە بولادى.

قۇرىلىس جۇمىستارىن جۇرگىزىپ جاتقان كومپانيا باسشىسىنىڭ ايتۋىنشا، جىل سوڭىنا ترياتلون-ساياباقتاعى جاسىل جەلەك سانى 10 ەسەگە دەيىن ارتادى ەكەن. قازىر مۇندا 300 ءتۇپ اعاش ەگىلگەن.

بىرەگەي سپورت نىسانى اشىلعان سوڭ تۇرعىنداردىڭ كەلىپ-قايتۋىنا ىڭعايلى بولۋ ءۇشىن قالا بيلىگى قوعامدىق كولىك مارشرۋتىن ىسكە قوسۋدى  جوسپارلاپ وتىر.

 

قاراعاندى وبلىسى


سوڭعى جاڭالىقتار

قاي سالادا جالاقى ءوستى؟

ەكونوميكا • كەشە

رەسەي ازاماتتارى العىس ايتتى

ايماقتار • 26 اقپان، 2021

ۇقساس جاڭالىقتار