بۇگىندە اتىراۋ وبلىسىندا جولاۋشىلار تاسىمالىمەن 15 جەكە كومپانيا اينالىسادى, ونىڭ 9-ى وبلىس ورتالىعىندا قىزمەت كورسەتەدى, 30 باعىتقا 190 اۆتوبۋس تارتىلعان.
- وتكەن جىلى ليزينگتىك نەسيە باعدارلاماسى بويىنشا 91 اۆتوبۋس الىندى, بىراق اتىراۋداعى قوعامدىق كولىك جەتىسپەۋشىلىگى پروبلەماسىن شەشۋ ءۇشىن تاعى 150 اۆتوبۋس كەرەك. وسى باعىتتاعى جۇمىستار ءجۇرىپ جاتىر, الداعى جىلدارى ماسەلە شەشىلەدى, - دەدى جولاۋشىلار كولىگى جانە اۆتوكولىك جولدارى باسقارماسىنىڭ باسشىسى اسەت ورازعاليەۆ.
اتىراۋ وبلىسىنىڭ اكىمى نۇرلان نوعاەۆ وڭىردە قوعامدىق كولىكتى دامىتۋ تۇجىرىمداماسى تابىستى جۇزەگە اسىپ جاتقانىن اتاپ ءوتتى. اۆتوپارك جاڭارتىلىپ, ەلەكتروندى بيلەت جۇيەسى ەنگىزىلگەن. بيىل قالاداعى 11 كوشە قايتا جاڭعىرتىلادى, جاڭا ايالدامالار ورناتىلادى. قوعامدىق كولىك سالاسىنداعى سۋبسيديالاۋ ناتيجەسىندە كوندۋكتورلار مەن جۇرگىزۋشىلەردىڭ ەڭبەكاقىلارى كوتەرىلدى.
- تۇرعىندار تاراپىنان قوعامدىق كولىك قىزمەتىنە, كوندۋكتورلار مەن جۇرگىزۋشىلەردىڭ دورەكىلىكتەرىنە قاتىستى شاعىمدار بار. باقىلاۋدى كۇشەيتىپ, ورىن العان ماسەلەلەردى ۋاقىتىلى شەشۋ كەرەك. جولاۋشىلاردان الەۋمەتتىك جەلىلەردەگى شاعىمدار ازايىپ كەلەدى, بىراق بار, بۇل ءالى دە وسى باعىتتاعى جۇمىستاردى جەتىلدىرۋ كەرەكتىگىن كورسەتەدى,- دەدى جينالعاندارعا نۇرلان نوعاەۆ.
اتىراۋ وبلىسى اۋداندارىندا جولاۋشىلار تاسىمالىنا قاتىستى جۇمىستار كوڭىل كونشىتپەيدى. جولاۋشىلار اۆتوبۋسى تەك جىلىوي اۋدانىنا قاتىنايدى. باسقا اۋداندارعا تاكسي عانا جۇرەدى.
- وبلىستىڭ بارلىق اۋداندارىندا قوعامدىق كولىكتى سۋبسيديالاۋ ماسەلەسىن قاراستىرۋ قاجەت. مىسالى, يساتاي, ماحامبەت, يندەر اۋداندارىنا باراتىن جولداردىڭ جاعدايلارى جاقسى, وسى باعىتتارعا جايلى اۆتوبۋستار شىعارۋ كەرەك. اۋىل تۇرعىندارى تاراپىنان سۇرانىس جوعارى بولاتىنىنا سەنىمدىمىن, - دەدى ايماق باسشىسى.
جينالىستى قورتىندىلاعان نۇرلان نوعاەۆ قاراماعىنداعىلارعا قوعامدىق تاسىمال سالاسىندا باقىلاۋدى كۇشەيتۋدى تاپسىردى. اۆتوبۋستاردىڭ قاتىسۋىمەن بولاتىن جكو ازايتىپ, جاڭا كولىكتى كۇتىپ ۇستاۋ, جولاۋشىلارعا جايلى جاعداي جاساۋ ماقساتىنداعى جۇمىستار قاتاڭ قاداعالانادى.
