جيىن بارىسىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» باعدارلامالىق ماقالاسىن تالقىلاۋ جانە ۇلى دالا تاريحىن جاڭادان پايىمداۋ جولدارى قارالۋ جوسپارلانعان.
فورۋمنىڭ اشىلۋ سالتاناتىندا ءسوز سويلەگەن حالىقارالىق تۇركى اكادەمياسىنىڭ پرەزيدەنتى, تاريح عىلىمدارىنىڭ دوكتورى دارحان قىدىرالى « ۇلى دالانىڭ جەتى قىرى» ماقالاسىنىڭ ماڭىزدىلىعى تۋرالى اڭگىمەلەپ بەردى. سونداي-اق ۇلى دالانىڭ الەمدىك وركەنيەتكە زور ۇلەس قوسقانىن دا اتاپ ءوتتى.
جيىنعا امەريكا قۇراما شتاتتارى, ءۇندىستان, قازاقستان, ازەربايجان, تۇركيا, وزبەكستان, فرانتسيا, گوللانديا, قىرعىزستان جانە رەسەي سىندى 10 ەلدەن 70-كە جۋىق عالىم مەن حالىقارالىق ۇيىمداردىڭ وكىلدەرى قاتىسىپ وتىر. فورۋم جۇمىسى « ۇلى دالا»: كەڭىستىك پەن ۋاقىت كوكجيەكتەرى», «تۇركى وركەنيەتى جانە ونىڭ الەمدىك مادەنيەتكە قوسقان ۇلەسى» جانە «تۇركى تاريحىن قايتا باعامداۋ: جاڭا ادىستەر مەن جاڭا مۇمكىندىكتەر» دەپ اتالاتىن ءۇش سەسسيادان قۇرالعان.
ىرگەلى جيىن تۇركى تىلدەس ەلدەردىڭ تاريحىندا ايرىقشا ورنى بار اتاۋلى داتالارمەن تۇسپا-تۇس كەلىپ وتىر. اتاپ ايتار بولساق, بيىل التىن وردا مەن موعولستاننىڭ قۇرىلۋىنا ىقپال ەتكەن تالاس قۇرىلتايىنا 750 جىل, ءجۇسىپ بالاساعۇننىڭ «قۇتتى بىلىك» شىعارماسىنىڭ جازىلۋىنا 950 جىل, اقىن يمادەددين نەسيميدىڭ تۋعانىنا 650 جىل تولادى.
