قاسىم-جومارت توقاەۆتىڭ سايلاۋالدى رەسپۋبليكالىق قوعامدىق شتابى پاۆلودار وبلىسىنا بارىپ, ايماق تۇرعىندارىن كانديداتتىڭ باعدارلاماسىمەن تانىستىردى. Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ باستاعان دەلەگاتسيا دوستىق ۇيىندە جەرگىلىكتى ەتنومادەني بىرلەستىكتەر, ۇكىمەتتىك ەمەس ۇيىمدار جانە زيالى قاۋىم وكىلدەرىمەن جۇزدەستى.
«پرەزيدەنتتىككە كانديدات قاسىم-جومارت توقاەۆ ءوز جۇمىسىندا ەلباسى نۇرسۇلتان نازارباەۆ نەگىزىن قالاعان ۇلتارالىق كەلىسىم قاعيداتتارىن ىسكە اسىرۋدى جالعاستىرادى. توزىمدىلىك, ازاماتتىق الەم مەن تۇراقتى ۇلتارالىق ديالوگ – تۇڭعىش پرەزيدەنت, Nur Otan پارتياسى توراعاسىنىڭ باعىتى الداعى ۋاقىتتا دا باسىمدىقتا بولادى. قازاقستان ەلباسى ساياساتىنىڭ ماڭىنا توپتاسۋىنىڭ ارقاسىندا بۇكىل الەم مويىنداعان زور ناتيجەلەرگە قول جەتكىزەدى. ءبىزدىڭ كانديدات – قازاقستانداعى ۇلتارالىق كەلىسىمدى نىعايتا تۇسۋدەگى ەلباسىنىڭ ءىسىن جالعاستىرا الاتىن تۇلعا», دەدى م.اشىمباەۆ.
سونىمەن قاتار قىزىلوردادا «نەۆادا – سەمەي» قوعامدىق بىرلەستىگىنىڭ مۇشەلەرى ساياسي ناۋقانعا بەيجاي قارامايتىندارىن ءبىلدىرىپ, سىر حالقىن ەلىمىزدەگى جەتەكشى ساياسي كۇش, تۇڭعىش پرەزيدەنتىمىزدىڭ سەنىمدى سەرىگى, كانديدات ق.توقاەۆتى ءبىراۋىزدان قولداپ, داۋىس بەرۋگە شاقىرعان ۇندەۋ جاريالادى. ۇندەۋ ماتىنىندە: «قاسىم-جومارت كەمەل ۇلى – دۇنيە جۇزىنە ءمالىم, ديپلوماتيالىق قىزمەتتىڭ بارلىق ساتىسىنان ءوتىپ, بىرىككەن ۇلتتار ۇيىمىندا ەلىمىزدىڭ وكىلى بولعان تاجىريبەلى ساياساتكەر. قيىن ەكونوميكالىق كەزەڭدە پرەمەر-مينيستر قىزمەتىن اتقارعان. حالىقتىڭ ءومىر ءسۇرۋ ساپاسى مەن تابىسىن قالايشا ارتتىرۋ كەرەكتىگىن جاقسى تۇسىنەتىن جاناشىر. ءوزىنىڭ «ساباقتاستىق, ادىلدىك, ورلەۋ» سايلاۋالدى باعدارلاماسىندا قاسىم-جومارت توقاەۆ ءار قازاقستاندىق ازاماتقا تەڭ مۇمكىندىك بەرىلەتىنىنە باسا نازار اۋدارعان. بۇل ۇستانىم قوعامدىق ءومىردىڭ بارلىق سالالارىن قامتيدى», دەلىنگەن.
* * *
«اق جول» دەموكراتيالىق پارتياسىنان كانديدات دانيا ەسپاەۆانىڭ سايلاۋالدى شتابى اقمولا وبلىسىنىڭ ەرەيمەنتاۋ اۋدانىندا ۇگىت-ناسيحات كەزدەسۋلەرىن وتكىزدى. №8 اگروتەحنيكالىق كوللەدجدە شتاب جەتەكشىسى ازات پەرۋاشەۆ وقىتۋشىلار مەن ستۋدەنتتەردى ءوز كانديداتىنىڭ سايلاۋالدى باعدارلاماسىمەن تانىستىردى. وندا ەل ەكونوميكاسىنىڭ نەگىزى رەتىندە كاسىپكەرلىكتى قولداۋ جونىندەگى شارالار كەشەنى ۇسىنىلادى.
وقۋ ورنىندا اۋىل شارۋاشىلىعى سالاسىنداعى بولاشاق مامانداردى, سونداي-اق تىگىنشىلەردى, قۇرىلىسشىلار مەن سلەسارلاردى دايىندايدى. ماماندىقتاردىڭ ءبارى ەڭبەك نارىعىندا سۇرانىسقا يە. سوندىقتان مۇندا وقىپ شىققان ءاربىر ماماننىڭ بولاشاقتا ءوز ءىسىن اشۋعا مۇمكىندىگى زور. كانديدات باعدارلاماسىندا ءىرى كاسىپورىندار مەن شاعىن جانە ورتا بيزنەس ءۇشىن نەسيەلەردىڭ پايىزىن تومەندەتۋ, سونداي-اق قورلار ارقىلى بالامالى, بانكتىك ەمەس قارجىلاندىرۋدى دامىتۋ باسشىلىققا الىنعان. د.ەسپاەۆا باسىم سالالار, ونىڭ ىشىندە اۋىل شارۋاشىلىعى ءۇشىن قوسىلعان قۇنعا سالىناتىن سالىقتى تومەندەتۋدى ۇسىنادى. وسى باستامالارمەن ەرەيمەنتاۋ اۋدانى مالتابار اۋىلىنىڭ تۇرعىندارى تانىستى.
بۇگىندە كانديداتتىڭ رەسپۋبليكالىق شتابىنان بولەك, پارتيانىڭ ايماقتىق فيليالدارىن قوسقاندا, بارلىعى 17 شتاب بار. ولاردىڭ قۇرامىنا ايماقتىق بەلسەندىلەرمەن بىرگە جۋرناليستەر, بلوگەرلەر, ۇگىتشىلەر كىرەدى. سايلاۋالدى ناۋقاندا ۇگىت ماتەريالدارىن تاراتۋ, جوسپارلانعان ءىس-شارالاردى ۇيىمداستىرۋ جۇمىستارى قىزۋ ءجۇرىپ جاتىر.
* * *
پرەزيدەنتتىكتەن ۇمىتكەر تولەۋتاي راقىمبەكوۆتىڭ شتابى نۇر-سۇلتان قالاسىندا «اۋىل ناقىشتارى» اتتى فوتوكورمە وتكىزدى. «حان شاتىر» ساۋدا, ويىن-ساۋىق ورتالىعىندا سالتانات قۇرعان كورمەدە قالا تۇرعىندارى شالعايداعى اۋىل-ايماق تۇرمىسىنان سىر شەرتەتىن سۋرەتتەردى تاماشالادى. كوپشىلىك نازارىنا ۇسىنىلعان تۋىندىلاردا ەلدى مەكەندەردىڭ قازىرگى تۇرمىس-تىرشىلىگى, بەت-بەينەسى جانە الەۋمەتتىك ماسەلەلەرى كورىنىس تاپقان. وسى ءىس-شارا اياسىندا كانديداتتىڭ سايلاۋالدى باعدارلاماسى دا تانىستىرىلدى.
«اۋىل» حالىقتىق-دەموكراتيالىق پاتريوتتىق پارتياسى ورتالىق اپپاراتىنىڭ جەتەكشىسى قۋانىش سەيىتجانوۆ: «بۇل فوتوسۋرەتتەردەن اۋىل تىرشىلىگىن جان-جاقتى كورۋگە بولادى. ءبارى بار: اۋىلداعى تىرلىك, بالالاردىڭ ءومىرى, ۇلكەندەر مەن جاستاردىڭ اراسىنداعى قارىم-قاتىناس, كەيبىر الەۋمەتتىك ماسەلەلەر. ارينە, وسى فوتوسۋرەتتەردىڭ نەگىزگى جيىنىندا, مازمۇنىندا ءبىزدىڭ كانديداتىمىزدىڭ باعدارلامالىق ماقساتتارىمەن ۇلكەن سايكەستىك, ۇيلەسىم بار», دەدى.
ەلورداداعى بۇل كورمەگە رەسپۋبليكالىق جارىستا ۇزدىك اتانعان تۋىندىلار قويىلدى. ياعني, وسى ماقساتتا بىرەر اي بۇرىن «اۋىل» پارتياسى ارنايى بايقاۋ جاريالاپ, وعان ەلىمىزدىڭ بارلىق ايماعىنان 300-دەن اسا فوتوسۋرەت كەلىپ تۇسكەن ەدى. پرەزيدەنتتىك ۇمىتكەر تولەۋتاي راقىمبەكوۆتىڭ سايلاۋالدى باعدارلاماسى وسىنداي اۋىلدارداعى تۇرمىستى جاقسارتىپ, الەۋەتىن ارتتىرۋعا باعىتتالعان. بۇعان قوسا شەت جاقتاعى ەلدى مەكەندەردەگى رۋحاني قۇندىلىقتاردى ساقتاۋ, ۇلتتىق ءداستۇردى دارىپتەۋ جانە جاستاردى جۇيەلى جۇمىسقا تارتۋ سياقتى ماسەلەلەردى دە قامتيدى. كانديداتتىڭ ءوزى جاقىن كۇندەرى وڭىرلەرگە جاسايتىن ساپارىندا سايلاۋالدى باعدارلاماسىن كەڭىنەن تانىستىرماق.
* * *
قازاقستان كوممۋنيستىك حالىق پارتياسىنىڭ اتىنان پرەزيدەنتتىككە كانديدات جامبىل احمەتبەكوۆتىڭ سەنىم بىلدىرىلگەن وكىلى بەيسەنباي ءماجيتوۆ ستەپنوگور قالاسىنداعى «تسەلينگورماش» ماشينا جاساۋ زاۋىتىنىڭ ۇجىمىمەن كەزدەستى. زاۋىت باسشىلارى اقمولا وبلىستىق سايلاۋالدى شتابىنىڭ جەتەكشىسىنە وندىرىستىك تسەح جۇمىسىن تانىستىرىپ, كاسىپورىننىڭ ونىمدەرىن كورسەتتى.
بۇدان كەيىن ب.ءماجيتوۆ جينالعاندارعا كانديداتتىڭ سايلاۋالدى تۇعىرناماسى تۋرالى باياندادى. «قازاقستان كوممۋنيستىك حالىق پارتياسى» بۇقارانىڭ جاقتاۋشىسى رەتىندە 15 جىلدان بەرى ساياسي-قوعامدىق, الەۋمەتتىك-ەكونوميكالىق ماسەلەلەردىڭ شەشىلۋىنە ىقپال ەتىپ كەلەدى. ءبىز شيكىزاتقا تاۋەلدى ەمەس ەكونوميكانىڭ دامىعانىن قالايمىز. وسى ارقىلى باسەكەگە قابىلەتتى بولۋعا ۇمتىلامىز. باتىستىڭ ىقپالى مەن جالعان قۇندىلىقتارىنان باس تارتۋ, كەدەيلىكپەن كۇرەس, كورشى ەلدەرمەن ەكونوميكالىق ينتەگراتسيا جانە قولدانىسقا ادىلەتتى سالىق سالۋ جۇيەسىن ەنگىزۋ ارقىلى جارقىن بولاشاققا قادام جاساۋعا بولاتىنىنا سەنەمىز», دەدى ول. كەزدەسۋگە كەلگەن قالا تۇرعىندارى ب.ماجيتوۆكە وزدەرىن تولعاندىرعان ماسەلەلەرىن ايتىپ, قىمباتشىلىققا, زەينەت جاسىنا, تۇرعىن ۇيگە, الەۋمەتتىك كومەك پەن جاردەماقىعا قاتىستى ساۋالدارىنا ناقتى مىسالمەن جاۋاپ الدى.
ال نۇر-سۇلتان قالاسىندا پارتيانىڭ قوعامدىق شتابى ءوز كانديداتتارىن قولداۋعا شاقىرعان اۆتوشەرۋ ۇيىمداستىردى. قىزىل ءتۇستى جالاۋلاتقان, دابىلدى كولىكتەر شەبى قوناەۆ پەن ماڭگىلىك ەل كوشەلەرىنىڭ قيىلىسقان تۇسىنان جول باستادى. ەلوردالىق شتابتىڭ جەتەكشىسى نۇرداۋلەت ورازحانوۆ بۇل ءىس-شارا كولىك جۇرگىزۋشىلەرى مەن كوشەدەگى جۇرتتىڭ نازارىن ەرەكشە اۋداراتىنىن, سول ارقىلى ءوز كانديداتتارىنىڭ سايلاۋالدى تۇعىرناماسىمەن تانىسۋعا شاقىرعاندارىن جەتكىزدى. قوعامنىڭ يگىلىگى ءۇشىن ادال ەڭبەككە ۇندەگەن كوممۋنيستەردىڭ تىزگىندەگەن كولىكتەرى ەسىلدىڭ سول جاعالاۋىنان وڭ جاققا قاراي ويىسىپ, سوڭىندا شاھاردىڭ شەت ايماقتارىن دا ارالادى. شتاب وكىلدەرى مۇنداي اۆتوشەرۋ بۇرىن دا وتكىزىلگەنىن, سودان كەيىن تۇرعىندار بايلانىسقا شىعىپ, ماقسات-مىندەتتەرىنە قىزىعۋشىلىق تانىتقاندارىن ايتادى.
* * *
كاسىپوداقتار فەدەراتسياسى اتىنان پرەزيدەنتتىككە كانديدات امانگەلدى تاسپيحوۆ رەسپۋبليكالىق قوعامدىق سايلاۋالدى شتابىنىڭ جەتەكشىسى باقىتجان ابدىرايىممەن بىرگە قىزىلجار وڭىرىنە ساپارلاپ بارىپ, كاسىپوداق بەلسەندىلەرىمەن كەزدەستى. ا.تاسپيحوۆ وزىنە قولداۋ كورسەتكەن سولتۇستىكقازاقستاندىقتارعا ريزاشىلىعىن ءبىلدىرىپ, سايلاۋالدى تۇعىرناماسىنىڭ باسىم باعىتتارىن تانىستىردى. وندا جۇمىسشىلاردىڭ مۇددەسىن قورعاۋ, قالىپتى ەڭبەك جاعدايىن جاساۋ, ەڭبەك ميگراتسياسىن, ىشكى كوشى-كون ءۇردىسىن رەتتەۋ سياقتى ماسەلەلەرگە ماڭىز بەرىلگەن.
بۇعان قوسا كانديداتتى ناسيحاتتاۋ ءىس-شارالارى وڭىرلەردە جالعاستى. سونىڭ ءبىرى كانديداتتىڭ اقتوبە وبلىسىنداعى سەنىم بىلدىرىلگەن ادامى ستاتيستيكا دەپارتامەنتىنىڭ ۇجىمىمەن كەزدەستى. جيىندا كاسىپوداق مۇشەلەرى ۇمىتكەر تۇعىرناماسىندا كوتەرىلگەن قاۋىپسىز ەڭبەك جاعدايىن جاساۋ, جۇمىسشىلاردىڭ ەڭبەك قۇقىن قامتاماسىز ەتۋ, جۇمىس بەرۋشىلەردىڭ جاۋاپكەرشىلىگىن ارتتىرۋ سىندى باستى باعىتتار تۋرالى حاباردار بولدى.
سونداي-اق تۇركىستان وبلىسى بويىنشا قوعامدىق شتابتىڭ باسشىسى بەرىك بەكجانوۆ ورداباسى اۋدانىنداعى مادەنيەت ۇيىندە جانە كىتاپحانادا كەزدەسۋلەر وتكىزدى. ءبىلىم, سپورت سالالارىنىڭ وكىلدەرى مەن مەملەكەتتىك قىزمەتكەرلەر, بيۋدجەتتىك سالا وكىلدەرى باس قوسقان القالى جيىنعا 250 سايلاۋشى قاتىستى. باسقوسۋعا ارنايى كەلگەن ازاماتتار قازاقستان كاسىپوداعىنىڭ قىزمەتىن جانداندىرۋ جولىنداعى تىڭ مۇمكىندىكتەرمەن تانىسىپ, قولداۋ ءبىلدىردى جانە ەڭبەك قاۋىپسىزدىگى مەن ۇجىمدىق شارتتىڭ الەۋمەتتىك ماڭىزدىلىعىنا ەرەكشە دەن قويدى. كاسىپوداقتاردىڭ ۇستانىپ وتىرعان كوزقاراستارى مەن ناقتى قادامدارى سايلاۋشىلار تاراپىنان قولداۋ تاباتىنىنا سەنىم ءبىلدىردى.
* * *
«ۇلت تاعدىرى» ۇلتتىق-پاتريوتتىق قوزعالىسىنان پرەزيدەنتتىككە كانديدات ءامىرجان قوسانوۆ كەشە Facebook, Youtube, Instagram الەۋمەتتىك جەلىلەرى ارقىلى تىكەلەي ەفيرگە شىعىپ, ءوزىنىڭ سايلاۋعا ءتۇسۋ ماقساتى تۋرالى, سايلاۋالدى باعدارلاماسىنىڭ باسىم باعىتتارى تۋرالى ءسوز قوزعادى. ونلاين ۇندەۋدى 10 مىڭعا جۋىق ادام كورىپ, بىرقاتارى سۇراقتارىن قويىپ, بىردەن جاۋاپ الدى. كانديدات بۇل جولى نەگىزىنەن ساياسي ەركىندىك تاقىرىبىندا سويلەدى. ەندى بۇدان بىلاي تىكەلەي ەفيرگە تۇراقتى تۇردە شىعىپ, ءوزىنىڭ ۇستانىمدارىن جان-جاقتى تۇسىندىرمەك. كەلەسىدە ۇلت بولمىسى حاقىندا وي وربىتەدى.
ال كانديداتتىڭ وڭىرلەردەگى ناسيحات جۇمىستارىنا كەلسەك, اقمولا وبلىسى ستەپنوگور قالاسىنداعى مادەنيەت سارايىندا ءا.قوسانوۆتى قولداۋعا ارنالعان دوڭگەلەك ۇستەل جيىنى ءوتتى. وندا ۇمىتكەردىڭ وبلىستىق شتابىنىڭ مۇشەلەرى جانە سەنىمدى وكىلدەرى ەل الدىندا ءسوز سويلەپ, سايلاۋالدى تۇعىرناماسىن تانىستىردى. جيىنعا 40 شاقتى ادام قاتىستى. كەزدەسۋدە ءسوز تىزگىنىن وبلىستىق سايلاۋالدى شتابتىڭ باسشىسى دارحان شوگشىر ۇستادى. كانديدات باعدارلاماسىنىڭ نەگىزگى باعىتتارىنا قانىققان قوعام بەلسەندىلەرى, ءبىلىم بەرۋ سالاسىنىڭ قىزمەتكەرلەرى, جاستار مەن قاراپايىم تۇرعىندار ءوز پىكىرلەرىن ورتاعا سالدى. سونىڭ ىشىندە قاتىسۋشىلار حالىقتى رۋحاني تۇرعىدا وركەندەتۋ تۋرالى تارماقتاردى اتاپ ءوتتى.
سونىمەن قاتار جامبىل وبلىسىنىڭ بايزاق اۋدانىنداعى تۇيمەكەنت اۋىلىندا وبلىستىق سايلاۋالدى شتابتىڭ ۇگىت-ناسيحات توبى جەرگىلىكتى مادەنيەت زالىنىڭ عيماراتىندا تۇرعىندارمەن كەزدەستى. باسقوسۋعا ءا.قوسانوۆتىڭ ايماقتاعى سەنىم بىلدىرگەن ادامدارى – وبلىستىق شتابتىڭ باسشىسى باقىتجان ماقاشەۆ, فيلولوگيا عىلىمدارىنىڭ كانديداتى, جۋرناليستەر وداعىنىڭ مۇشەسى تەمىرباي مۇقاشەۆ, قازاقستان مادەنيەت سالاسىنىڭ ۇزدىگى, رەسپۋبليكالىق ءداستۇرلى انشىلەر بايقاۋىنىڭ بىرنەشە مارتە جەڭىمپازى باقىت شاعىرباەۆ قاتىستى. كەزدەسۋ بارىسىندا ەلىمىزدىڭ ىشكى جانە سىرتقى ساياساتى, جەرگىلىكتى حالىقتىڭ الەۋمەتتىك ماسەلەلەرى تالقىلاندى. كانديداتتىڭ سايلاۋالدى تۇعىرناماسى كەڭىرەك زەردەلەنىپ, ءتۇسىندىرىلىپ, جينالعان قاۋىمنىڭ سۇراقتارىنا جاۋاپ بەرىلدى. سوڭىندا ءانشى ب.شاعىرباەۆتىڭ ورىنداۋىنداعى اندەر كوپشىلىككە تارتۋ ەتىلدى.
* * *
« ۇلى دالا قىراندارى» رەسپۋبليكالىق قوزعالىسى اتىنان پرەزيدەنتتىككە كانديدات رەتىندە تىركەلگەن سادىبەك تۇگەلدىڭ سايلاۋالدى تۇعىرناماسى جاريالاندى. ەشقانداي پارتياعا قاتىسى جوقتىعىن العا تارتقان كانديدات دەموگرافياعا, شەتەلدەردە تۇراتىن قانداستارىمىزدىڭ ورالۋىنا, مەملەكەتتىك ءتىلدىڭ مارتەبەسىن كوتەرىپ, ونى تولىق قولدانىسقا ەنگىزۋگە, الاشوردانىڭ يدەيالارىن جاڭعىرتۋدى قولعا الۋعا, جەمقورلىقپەن كۇرەستى پارمەندى جۇرگىزۋگە, «بيلەر سوتىن» ەنگىزۋگە كۇش سالماق. ونىڭ باعدارلاماسى «ۇلاعاتتى ۇرپاق – ۇلتتىق ۇستانىم», «اۋىل – التىن بەسىگىمىز», «جەمقورلىققا توسقاۋىل قويامىز!» «ءبىز قىراندارمىز – ءبىز بىرگەمىز», «جەر – جانىمىز, ءتىل – تۇعىرىمىز» اتتى بولىمدەردەن تۇرادى.
كانديداتتىڭ وسى ۇستانىمدارىن كوپشىلىككە جەتكىزۋ ءۇشىن كەشە كوكشەتاۋداعى سايلاۋالدى قوعامدىق شتابى دوستىق ۇيىندە جەرگىلىكتى تۇرعىندارمەن كەزدەسۋ ۇيىمداستىردى. وندا س.تۇگەلدىڭ سەنىم بىلدىرىلگەن وكىلدەرى جينالعان قاۋىممەن قازاق ءتىلىنىڭ قولدانىس اياسىن كەڭەيتۋ, ۇلتتىق قۇندىلىقتاردى جاس ۇرپاقتىڭ بويىنا دارىتۋ, اۋىل-ايماقتىڭ الەۋەتىن كوتەرۋ تۋرالى پىكىر الماستى.
بۇگىن س.تۇگەلدىڭ ءوزى ششۋچە قالاسىنا بارىپ, مادەنيەت ۇيىندە شىعارماشىلىق كەشىن وتكىزەدى. سول ءىس-شارانىڭ بارىسىندا سايلاۋالدى باعدارلاماسىن قالا تۇرعىندارىنا جان-جاقتى تۇسىندىرمەك.
دايىنداعان ورىنبەك وتەمۇرات,
«Egemen Qazaqstan»
