مۇندا وبلىس اكىمى قىرىمبەك كوشەرباەۆ سول جاعالاۋ قۇرىلىسىنىڭ قازاقستان ۇكىمەتىمەن بەكىتىلگەن باس جوسپارىن تانىستىردى. سول جاعالاۋداعى جاڭا قالانىڭ جالپى اۋماعى 1532 گەكتارعا جەتەدى.
- بۇگىندە قىزىلوردادا 280 مىڭعا جۋىق ادام تۇرادى. 2025 جىلعا قاراي حالىق سانى 350 مىڭعا جەتەدى دەپ كۇتىپ وتىرمىز. ياعني, تۇرعىن ءۇي قۇرىلىسىن دامىتۋ ءۇشىن قوسىمشا اۋماقتار قاجەتتىلىگى تۋادى, - دەدى وبلىس اكىمى.
ايماق باسشىسى قازىرگى ۋاقىتتا سول جاعالاۋدا «نۇرلى جەر» مەملەكەتتىك باعدارلاماسى اياسىندا ۇستىمىزدەگى جىلدىڭ ءى جارتىجىلدىعىندا پايدالانۋعا بەرىلۋى جوسپارلانعان 460 پاتەرلىك 8 تۇرعىن ءۇيدىڭ قۇرىلىسى اياقتالىپ جاتقاندىعىن ايتتى. بۇدان باسقا, الەۋمەتتىك جانە كوممەرتسيالىق سيپاتتاعى 1190 پاتەرلىك قوسىمشا 28 تۇرعىن ءۇيدىڭ قۇرىلىسى باستالعان. جالپى, سول جاعالاۋداعى 3 تۇرعىن ءۇي اۋدانىندا اعىمداعى جىلى 2340 پاتەرلىك 50 تۇرعىن ءۇي سالىنادى. ونىڭ ىشىندە 431 پاتەر از قامتىلعان كوپ بالالى وتباسىلارعا بەرىلەدى.
