– ءبىزدىڭ ماقسات – عارىش تەحنولوگيالارىن وتانىمىزدىڭ, حالقىمىزدىڭ مۇددەسى ءۇشىن قولدانۋ. بايقوڭىر قالاسىنىڭ ينفراقۇرىلىمىن جاڭعىرتۋ جۇمىسى جالعاسۋدا. مۇندا 30 جىل ىشىندە العاش رەت كوپقاباتتى ۇيلەر جانە مەديتسينالىق ورتالىق سالىندى. بەس مەكتەپ قازاقستاننىڭ ءبىلىم ستاندارتىنا كوشتى. قازىر الەمدە ينۆەستورلار عارىش ستارتاپتارىنا كەڭ قولداۋ كورسەتۋدە. ءبىز دە بايقوڭىردىڭ الەۋەتىن ءتيىمدى پايدالانىپ, بۇل ۇردىستەن شەت قالماۋىمىز كەرەك, – دەدى قازاقستان پرەزيدەنتى.
ساپار بارىسىندا, قازاقستان رەسپۋبليكاسىنىڭ پرەزيدەنتى قورقىت اتا مەموريالدىق كەشەنىنە بارىپ, مۋزەيدىڭ جاڭارتىلعان ەكسپوناتتارىمەن تانىستى. قىزىلوردا وبلىسى, قارماقشى اۋدانىندا 1980 جىلدارى تۇركى الەمىنە ورتاق رۋحاني ۇستاز قورقىت اتانىڭ قۇرمەتىنە مەموريالدىق كەشەن سالىنعان. 2014 جىلى تۇڭعىش پرەزيدەنت – ەلباسى ن.نازارباەۆتىڭ تاپسىرماسىمەن كەشەنگە قايتا جاڭعىرتۋ جۇمىستارى جۇرگىزىلىپ, قوسىمشا جاڭادان زيارات ەتۋ نىسانى سالىندى. مەموريالدىق كەشەن «باتىس ەۋروپا - باتىس قىتاي» حالىقارالىق اۆتوماگيسترالىنىڭ بويىندا ورنالاسقان. 2018 جىلدىڭ قاراشا ايىندا پورت-لۋي قالاسىندا (ماۆريكي رەسپۋبليكاسى) يۋنەسكو-نىڭ 13-سەسسياسىندا قورقىت اتا مۇراسىن ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەنگىزۋ تۋرالى شەشىم قابىلدانعان بولاتىن.
مەملەكەت باسشىسىنىڭ سىر وڭىرىنە ساپارى بايقوڭىر قالاسىندا قورىتىندىلاندى. وندا «بايقوڭىر» كەشەنىن دامىتۋ ماسەلەلەرى تالقىلاندى.
