باسپانانىڭ 1 شارشى مەترىنىڭ قۇنى 70 مىڭ تەڭگەنى قۇرايدى. كۇزگى قارا سۋىققا ۇرىنباۋ ءۇشىن تۇرعىن ءۇي قۇرىلىسى 1 قىركۇيەككە دەيىن اياقتالادى دەپ جوسپارلانىپ وتىر. وسى ماقساتقا بايلانىستى بولات وتەمۇراتوۆ قورى تاراپىنان تۇرعىن ۇيلەردى سالۋ بويىنشا «بالامەكەن» جوباسىنىڭ جۇزەگە اسىرىلۋىنا 450 ميلليون تەڭگە بولىنبەك.
– اكىمدىك ءوز تاراپىنان بارلىق ينجەنەرلىك ينفراقۇرىلىمدار – ەلەكتر, گاز, سۋ, تەلەفون بايلانىسى مەن اۆتوجولدار قۇرىلىسىن اياقتاۋعا, سونداي-اق ءاربىر ۇيگە 6 سوتىق جەر تەلىمىن بولۋگە كەپىلدىك بەرەدى, – دەيدى وبلىس اكىمى قىرىمبەك كوشەرباەۆ.
قىزىلوردا وبلىسىنىڭ كوپ بالالى جانە الەۋمەتتىك جاعىنان از قورعالعان وتباسىلارعا ءۇي سالىپ بەرۋ ءتاجىريبەسى پرەمەر-مينيستر اسقار ماميننىڭ جۇمىس كەڭەسىندە كەڭىنەن تالقىلانعانىن ايتا كەتەيىك. رەسپۋبليكادا بەس جىل ىشىندە 28 مىڭ پاتەر بەرۋ كوزدەلۋدە. نارىق جاعدايىندا كوزسىز تاۋەكەلگە بارۋ وڭاي ەمەس. مۇندايدا ءۇي بەرۋدىڭ ەڭ ءتيىمدى تەتىكتەرى پايدالانىلۋى كەرەك. پرەمەر-مينيستر ا.مامين الەۋمەتتىك جاعىنان از قورعالعان وتباسىلارعا قىزىلوردا وبلىسىنىڭ وڭ ءتاجىريبەسىن پايدالانۋدى تاپسىردى.
جاقسىدان ۇيرەنۋ – تابىسقا جەتۋدىڭ كىلتى. قالاي بولعاندا دا, قازاقستاندا ءۇيسىز-كۇيسىز جۇرگەن وتباسىلار پاتەرمەن قامتىلۋى كەرەك. قايىرىمدى جاندار كومەكتەسىپ جاتقانىمەن, ۇيگە قولى جەتكەن الەۋمەتتىك جاعدايى تومەن وتباسىلار ساناۋلى عانا. ەندى وسى مەملەكەتتىك باعدارلامالار ءتيىمدى جۇمىس ىستەسە, 30 مىڭعا جۋىق وتباسىنىڭ كەۋدەسىندە ەرتەڭگە دەگەن سەنىم نىعايادى. ال بۇل – ۇلكەن قۋانىش.
