بۇگىنگى تاڭدا جامبىل وبلىسىندا 44100 كوپ بالالى وتباسى بار بولسا, ونىڭ 70 پايىزى اۋىل تۇرعىندارى ەكەن. سوندىقتان دا اۋدانداردا تۇراتىن وتباسىلارعا نازار اۋدارۋ ماڭىزدى ماسەلە. بۇل ورايدا قاراتاۋ قالاسىنان پاتەر يەلەنگەن ازاماتتاردىڭ باسىم بولىگى دە كوپ بالالى وتباسىنا جاتادى. ماسەلەن, بەس بالانىڭ اناسى ءلاززات رايىمقۇلوۆا 2013 جىلدان بەرى پاتەر كەزەگىندە تۇرعان. «كوپ بالالى انا رەتىندە 6 جىلدان بەرى پاتەر كەزەگىندە تۇردىم. قاراتاۋ قالاسىنان وسى ۋاقىتقا دەيىن پاتەر جالداپ كەلدىك. ەندى, مىنە, مەملەكەت قامقورلىعى ارقىلى باسپانالى بولىپ, قۋانىپ جاتىرمىز», دەيدى ول. باسپانالى بولعان ەلميرا اقجانوۆا دا قۋانىشىمەن ءبولىستى. جولداسى ەرلان كوپەسوۆ ەكەۋى 2013 جىلدان بەرى پاتەر كەزەگىندە تۇرعان ەكەن. «مەملەكەتتىڭ قولداۋىنا ريزامىن. كوپ بالالى وتباسى رەتىندە ءتيىستى جاردەماقىنى دا ۋاقتىلى الىپ كەلەمىز. بۇل دا ءبىز ءۇشىن ۇلكەن كومەك. ايتپەسە وسى ۋاقىتقا دەيىن ايىنا 10-15 مىڭ تەڭگە تولەپ, پاتەر جالداپ كۇن كوردىك», دەيدى ە.اقجانوۆا.
ايتا كەتەيىك, تالاس اۋدانى بويىنشا 2018-2019 جىلدارى بارلىعى 440 پاتەردى قۇرايتىن 6 كوپقاباتتى تۇرعىن ءۇيدى قايتا جاڭعىرتۋ جوسپارلانسا, بۇگىندە 290 پاتەر پايدالانۋعا بەرىلگەن. ال اعىمداعى جىلى تاعى دا 2 تۇرعىن ءۇي, ياعني 150 پاتەر پايدالانۋعا بەرىلەتىن بولادى. بۇل ءوز كەزەگىندە اۋدان بويىنشا تۇرعىن ءۇي كەزەگىندە تۇرعان 143 الەۋمەتتىك از قامتىلعان وتباسىن باسپانامەن قامتۋعا باعىتتالادى دەپ جوسپارلانعان.
