تارازدىڭ اۋا-رايى سايىسقا ءبىرىنشى شىققان Elite ساناتىنداعى سپورتشىلار سايىسىنىڭ ويداعىداي وتۋىنە ىڭعايلاستى. ولار «سپرينت» قاشىقتىعىندا, ياعني 750 م ءجۇزۋ, 20 كم ۆەلوجارىس پەن 5 كم جۇگىرۋدەن تۇراتىن قاشىقتىقتا مىقتىنى انىقتادى. ەڭ ۇزدىك ناتيجە 1 ساعات 1 مينۋت 59 سەكۋندتى كورسەتكەن انۋار تۋرۋباەۆ (الماتى) ءابسوليۋتتى جەڭىمپاز اتاندى. ەكىنشى ورىن ءۇشىن وتكەن قىزۋ تالاستا كيريلل روجكوۆتىڭ (الماتى) باعى جاندى. ول 1 ساعات 2 مينۋت جانە 47 سەكۋند ناتيجە كورسەتتى. وعان بىرنەشە سەكۋند قانا جەڭىلگەن الەكساندر اۆتۋشكو (شىمكەنت) ۇزدىك ۇشتىكتى تۇيىقتادى. وسى ساناتتاعى ايەلدەر اراسىندا جۇلدەنىڭ بارلىعىن وڭتۇستىك استانامىزدان كەلگەن سپورتشى قىزدار قانجىعاسىنا بايلادى. 1 ساعات 9 مينۋت 43 سەكۋند ناتيجە كورسەتكەرن داريا بىچكوۆا ءبىرىنشى ورىندى يەمدەندى. 1 ساعات 10 مينۋت 45 سەكۋند ۋاقىت كورسەتكەن يۋليا وزەروۆا ەكىنشى اتانسا, 1 ساعات 11 مينۋت 12 سەكۋند ناتيجەسىمەن گازيزا كۋماكباەۆا ءۇشىنشى بولدى.
كەلەسى كەزەكتە سورە سىزىعىنا ءبىرشاما جاس سپورتشىلار شىعىپ, «سۋپەر-سپرينت» قاشىقتىعىندا – 300 م ءجۇزۋ, 8 كم ۆەلوكەزەڭ جانە 2 كم جۇگىرۋدە مىقتىنى انىقتادى. كۇشەيىپ كەتكەن جەلگە قاراماستان, سپورتشىلاردىڭ بارلىعى مارەگە ءساتتى جەتتى. Elite ساناتىندا ءوزىنىڭ قاس شەبەر ەكەندىگىن دانيل زۋبتسوۆ (شىمكەنت) دالەلدەدى. ونىڭ ۋاقىتى – 27 مينۋت 15 سەكۋند. «كۇمىس» القانى 30 مينۋت 13 سەكۋند ۋاقىت كورسەتكەن ازيز نۋرلان (شىمكەنت) الدى. 30 مينۋت 46 سەكۋندتا مارەگە جەتكەن دانيل بلوك (اقمولا وبلىسى) ءۇشىنشى ورىننان كورىندى.
23 جاسقا دەيىنگى سپورتشىلار ساناتىندا ءوز شەبەرلىگىن نيكيتا كۋرگانسكي (اقمولا وبلىسى) پاش ەتتى. ۋاقىتى – 27 مينۋت 17 سەكۋند. وعان 11 سەكۋند ۇتىلعان كوماندالاسى ۆلاديسلاۆ يۆانوۆ (اقمولا وبلىسى) ەكىنشى اتاندى. 30 مينۋت 4 سەكۋند ناتيجەسى ءۇشىن ۆلاديسلاۆ كۋدين (شىمكەنت) ءۇشىنشى ورىن الدى. ال وسى ساناتتاعى قىزدار اراسىنداعى جۇلدەلى ورىننىڭ بارلىعىن اقمولا وبلىستىق ترياتلون مەكتەبىنىڭ تۇلەكتەرى جەڭىپ الدى. 29 مينۋت 21 سەكۋند ناتيجەسىمەن اشراف كامالوۆا (اقمولا وبلىسى) جەڭىس تۇعىرىنان كورىنسە, جۇلدەلى ەكىنشى ورىندى نادەجدا بەكماگانبەتوۆا يەلەندى. ونىڭ ۋاقىتى – 30 مينۋت 23 سەكۋند. مارەگە ءۇشىنشى بولىپ يانا زيمنيتسكايا (31 مينۋت 18 سەكۋند) جەتتى.
19 جاسقا دەيىنگى ەڭ كىشى جاس ساناتىنداعى اتلەتتەر اراسىندا ەرەكشە باسەكە بايقالدى. ءوز قارسىلاستارىنىڭ بارىنەن وزىپ, بۇگىنگى جالپى «سۋپەر-سپرينتتەگى» ۇزدىك ناتيجەنى اليحان ابۋسەيت (شىمكەنت) كورسەتە ءبىلدى – 26 مينۋت 52 سەكۋند. وعان 23 سەكۋند جەڭىلگەن ەراسىل امانجولوۆ (تۇركىستان وبلىسى) ەكىنشى اتاندى. مارەگە 38 سەكۋندقا كەشىككەن راشيد رومانچۋك (اقمولا وبلىسى) «قولاعا» لايىق دەپ تانىلدى. بۇل ساناتتاعى قىزدار اراسىندا 30 مينۋت 19 سەكۋند ناتيجەسىمەن ناتاليا كوروتكوۆا (اقمولا وبلىسى) ۇزدىك بولىپ شىقتى. ونىڭ جەرلەسى اناستاسيا زاحاروۆا 33 مينۋت 21 سەكۋند ۋاقىت كورسەتىپ, ەكىنشى بولدى. قورىتىندى حاتتاماداعى ءۇشىنشى جۇلدەلى ورىن 35 مينۋت 7 سەكۋند ناتيجەسى ءۇشىن ارۋجان امانجولوۆاعا (تۇركىستان وبلىسى) بۇيىردى.
