كاسىپورىن ۇجىمى ەسپاەۆانىڭ الەۋمەتتىك ءونىم كاسىپكەرلەرىنە (تاماق ونىمدەرى, كيىم-كەشەك, بالالارعا ارنالعان تاۋارلار) ارنالعان سالىقتى تومەندەتۋ, بيزنەس نەسيەلەۋدىڭ ۇستەماقىسىن تومەندەتۋ جانە نەسيە مەرزىمىن ۇزارتۋ تۋرالى باعدارلامالىق ۇسىنىستارىنا ريزالىعىن ءبىلدىردى.
ءدانيا ەسپاەۆا مەن ونىڭ شتاب مۇشەلەرى كەزدەسۋ بارىسىندا قويىلعان سۇراقتارعا جاۋاپ بەردى.
كاسىپورىن جۇمىسكەرلەرىنىڭ كوپ بولىگى ايەلدەردەن تۇراتىندىقتان كەزدەسۋدە زەينەتكەرلىك جاسقا بايلانىستى ساۋالدار قويىلدى. سونىمەن قاتار قالادا تىركەۋى جوق كوپبالالى وتباسىلاردىڭ جاردەماقى جانە باسپانا الۋ مۇمكىنشىلىگى تۋرالى ءسوز قوزعالدى. كومبيناتتا ونداي انالاردىڭ سانى كوپ ەكەن – ولار ءۇي جالداعانىمەن, ءۇي قوجايىندارى ولاردى تىركەۋگە العىسى كەلمەيدى.
شتاب جەتەكشىسى ازات پەرۋاشەۆ ءوز كەزەگىندە ءىىم وكىلدەرىنىڭ تىركەۋگە الۋ ماسەلەسى بويىنشا - تىركەۋدە جوق ازاماتتاردىڭ جۇمىس ورنى ارقىلى تىركەۋگە الىنۋ مۇمكىندىگىن قاراستىراتىنىن مالىمدەگەنىن ەسكە ءتۇسىردى.
«بۇل ماسەلەنى قاراستىرۋعا ۋادە بەرەمىن. كوپتەگەن كاسىپورىنداردىڭ جۇمىسكەرلەرى قالادا تىركەلمەگەن اۋىلدىڭ ازاماتتارى. ولاردىڭ سانى – ۇجىمنىڭ جارتىسى دا بولۋى مۇمكىن. ەگەر ولاردى جۇمىستان شىعارساق – كاسىپورىنداردىڭ جۇمىسى توقتايدى», - دەدى ەسپاەۆا ءوز كەزەگىندە.
