قايعىلى وقيعا 10 مامىر كۇنى تاپا تال تۇستە «گازماشاپپاراتۋرا» باۋ شارۋاشىلىعى اۋدانىندا ورىن الدى. ء يتىن قۇتقارامىن دەپ 12 جاسار قىز سۋعا قارعىپ ءتۇستى. قىز بالا سۋعا باتا باستادى. باتىپ بارا جاتقان بالانى كورىپ, كىشى سەرجانت ە. رايىمقۇلوۆ ەش ويلانباستان قىزدى قۇتقارۋعا كىرىسەدى. الايدا, ءوزى سۋدان شىعا الماي قالادى. ەرلاننىڭ ارتىنان ايەلى مەن كامەلەتكە تولماعان ەكى بالاسى قالدى. قازا بولعان اسكەري قىزمەتشىنىڭ ارىپتەستەرىنىڭ ايتۋىنشا, ول ءوز قىزمەتىن جاقسى كوردى جانە ءوز ءىسىنىڭ ناعىز مامانى بولدى. ول ۇنەمى جوعارى جاۋاپكەرشىلىك, تارتىپتىلىك, اسكەري قىزمەتكە دەگەن ادالدىقپەن ەرەكشەلەنەتىن. جاۋىنگەرلىك جانە مەملەكەتتىك-قۇقىقتىق داينىدىق پاندەرى بويىنشا ۇزدىك ناتيجەلەر كورسەتىپ, وعان سەنىپ تاپسىرىلعان اسكەري تەحنيكانى ۇلگىلى ۇستايتىن. دوستارى مەن جاقىندارى ونى قايىرىمدى جانە وزگەلەردىڭ پروبلەمالارىنا بەي-جاي قارامايتىن ادام رەتىندە ەستەرىنە الادى. ول قامقور اكە, كەرەمەت وتاعاسى بولدى. اكەسىنىڭ باتىل ەرلىگىن ماقتان تۇتا الاتىن ەكى ۇلدى ءوسىردى. قورعانىس مينيسترلىگىنىڭ باسشىلىعى, اۋە قورعانىسى كۇشتەرىنىڭ قولباسشىلىعى جانە قر قارۋلى كۇشتەرىنىڭ بارشا جەكە قۇرامى قازا بولعان اسكەري قىزمەتشىنىڭ تۋىسقاندارى مەن جاقىندارىنىڭ قايعىسىنا ورتاقتاسىپ, كوڭىل ايتادى. ەرلاننىڭ ەرلىگى ءاربىر قازاقستاندىق ءۇشىن ۇلگى بولىپ تابىلادى. ويتكەنى, جانقيارلىق پەن باتىلدىقتى قىزمەتتىك مىندەتتى ورىنداۋ كەزىندە عانا ەمەس, سونىمەن بىرگە, كەز كەلگەن ومىرلىك جاعدايلاردا تانىتۋعا بولادى.
