كىتاپتىڭ جانە جوبانىڭ اۆتورى, بەلگىلى قوعام قايراتكەرى بەرىك ابدىعالي ۇلى. جاڭا ەڭبەك Nur Otan پارتياسىنىڭ «ارداگەرلەردى ارداقتايىق» جوباسى اياسىندا جانە «قاھارماندار» قورىنىڭ قولداۋىمەن جارىق كوردى. سالتاناتتى راسىمگە پارتيا ءتوراعاسىنىڭ ءبىرىنشى ورىنباسارى ماۋلەن اشىمباەۆ, بەلگىلى مەملەكەت قايراتكەرى, حالىق قاھارمانى مۇحتار التىنباەۆ, «قاھارماندار» قورىنىڭ ديرەكتورى, بەلگىلى قوعام قايراتكەرى سابىر قاسىموۆ, ءماجىلىس دەپۋتاتى باقىتبەك سماعۇل جانە ت.ب. قاتىستى. ءىس-شارانى بەلگىلى جۋرناليست, كورنەكتى قالامگەر نۇرتورە ءجۇسىپ جۇرگىزىپ وتىردى. باسقوسۋدا كىتاپقا ەسىمى ەنگىزىلگەن ءمىنايقۇل ساعىندىقوۆتىڭ ۇلى مارات ساعىندىقوۆ تا قاتىستى.
Nur Otan پارتياسى ءتوراعاسىنىڭ ءبىرىنشى ورىنباسارى م.اشىمباەۆ جوبانىڭ باستى ماقساتى ۇمىت قالعان ارداگەرلەرىمىزدىڭ ەسىمدەرىن دارىپتەپ, ولاردىڭ ەرلىكتەرىن بولاشاق وتان قورعاۋشىلارعا تانىستىرۋ ەكەنىن ايتتى. «وسى يگىلىكتى ءىسىمىز ارقىلى ءبىز جاس ۇرپاقتى وتانسۇيگىشتىككە تاربيەلەۋدى ماقسات تۇتتىق. كەزىندە وزدەرى كورە الماي كەتكەن قۇرمەت پەن ماراپاتتى بۇگىنگى ۇرپاقتارىنا كورسەتىپ, اتالارىمىزدىڭ ەرلىكتەرىن دارىپتەۋدى كوزدەدىك, دەدى ول. ءوزىنىڭ سوزىندە كىتاپتى قۇراستىرۋشى بەرىك ابدىعالي ۇلى ونى «زابىتىە گەروي. گەروي سوۆەتسكوگو سويۋزا» اتتى جيناقتىڭ جالعاسى دەپ قابىلداۋعا دا بولاتىنىن جەتكىزدى. وسى ەڭبەكتە كەڭەس وداعىنىڭ باتىرى اتاعىنا ۇسىنىلعان 133 مايدانگەر تۋرالى مالىمەتتەر ەنگىزىلگەن. ولاردىڭ كوپشىلىگى جاياۋ اسكەر. الايدا ەرەن ەرلىك كورسەتسە دە, تالاي ەرلەر لايىقتى ماراپاتىن الا الماعان, دەي كەلىپ بەرىك ابدىعالي ۇلى سوعىس جىلدارىندا 497 وتانداسىمىز كەڭەس وداعىنىڭ باتىرى اتاعىنا يە بولعانىن, الايدا ۇسىنىلعانداردىڭ سانى بۇدان الدەقايدا كوپ ەكەنىن ايتتى. «وكىنىشكە قاراي, كوپتەگەن جاۋىنگەرگە قاhارمان اتاعى قايتىس بولعان سوڭ بەرىلدى. رەسەي, بەلارۋس, ۋكراينا جانە باسقا دا ەۋروپا ەلدەرىندە مىڭداعان بەلگىسىز جانە اتى ساقتالماعان جاس باتىرلار ماڭگىلىككە قالدى. سوعىس الاڭدارىندا ىزدەستىرۋ جۇمىستارى ءالى كۇنگە دەيىن جالعاسۋدا. ءبىزدىڭ ءار باتىرىمىز ەستە ساقتاۋعا, قۇرمەت كورسەتۋگە لايىق. ولاردىڭ ەسىمدەرى ەشقاشان ۇمىتىلىپ كەتپەۋى كەرەك. سەبەبى ولاردىڭ ارقايسىسى ناعىز قاhaرماندار», – دەدى بەرىك ابدىعالي ۇلى. اۆتور بۇلاردان باسقا سەگىز بىردەي وتانداسىمىزدىڭ ەكى رەت باتىر اتاعىنا ۇسىنىلعانىن تىلگە تيەك ەتتى. ولاردىڭ ەكەۋى كاپيتان ساعادات نۇرماعامبەتوۆ پەن سەيىتحان تەمىرباەۆ. «ولاردىڭ اراسىندا ساپەرلەر – قاتارداعى جاۋىنگەر قۇدايبەرگەن جانسەرىكوۆ جانە اعا سەرجانت مىنايقۇل ساعىندىقوۆ, اتقىشتار روتاسىنىڭ كومانديرى, لەيتەنانت قابىش كوكتاەۆ, 248 جاۋدىڭ كوزىن جويعان مەرگەن, اعا سەرجانت زەيتىن بايجانوۆ جانە مايور ۆ.گۋتوۆ پەن لەيتەنانت ۆ.گۋتوۆسكي بار», دەدى ول.
رەسپۋبليكالىق «قاھارماندار» قوعامدىق قورى مۇنداي باستامانى ارقاشاندا قولدايدى جانە بۇگىنگى «ۇمىتىلعان قاھارماندار» كىتابىنىڭ «وتان قورعاۋشى» كۇنى مەرەكەسىنىڭ قارساڭىندا Nur Otan پارتياسىنىڭ باستاماسىمەن وتكىزىلىپ وتىرعانىنا ريزاشىلىعىمدى بىلدىرەمىن, دەدى ءوزىنىڭ سوزىندە سابىر قاسىموۆ. «بۇل تۇڭعىش پرەزيدەنتىمىز, ەلباسىنىڭ ۇلتتىق سانانى جاڭعىرتۋ جانە قوعامىمىزدى رۋحاني-پاتريوتتىق تۇرعىدان ورلەتۋ باعىتىنداعى ساياسي باعىتىن ىسكە اسىرۋدىڭ ايقىن كورىنىسى دەپ بىلەمىن. اقتالماعان قاھارمانداردىڭ ەسىمدەرىن اقتاۋ, ولاردىڭ ەرلىگى مەن جارقىن ەسىمدەرىن حالىققا ورالتۋ جانە ءبۇگىنگى ۇرپاقتى پاتريوتتىق رۋحتا تاربيەلەۋ ماقساتىمەن قۇرىلعان «قاھارماندار» قورى بۇل جۇمىسقا قولىمىزدان كەلگەن كومەگىمىزدى جاسادىق», دەدى ءوزىنىڭ سوزىندە سابىر قاسىموۆ.
ءسويتىپ, قاھارماندار ەسىمى «وتان قورعاۋشى» كۇنىندە ءبىر جاڭعىردى.
