وتاندىق پاتريوتيزم وتىن لاۋلاتىپ, جاستاردىڭ بويىنا تۋعان ەلگە دەگەن سۇيىسپەنشىلىك وتىن تاراتۋ وسى كۇنى وتكىزىلەتىن بارلىق شارالاردىڭ نەگىزگى ماقساتى. ۇلتتىق مۋزەيدە دە وسى ماقساتپەن وتكىزىلگەن «ەرلىك داستانى – ەلدىڭ ۇرانى» اتتى دوڭگەلەك ۇستەلدىڭ ماڭىزى زور بولدى. وعان قالاداعى ارداگەرلەر ۇيىمىنان قادىرمەندى اقساقالدار مەن اپالار شاقىرىلعان ەكەن. ولار وزدەرىنىڭ ومىرلىك تاجىريبەسىنەن, كورگەن, بىلگەن ۇلاعاتتى ىستەرىنەن جينالعان جاستارعا قىزىقتى اڭگىمەلەر ايتىپ بەردى. مەملەكەت تاريحى ينستيتۋتىنىڭ قىزمەتكەرلەرى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشى-پروفەسسورلارى قازاقستاندىق پاتريوتيزمنىڭ قاينار كوزدەرىن اتاپ, ولاردى ۇلگى ەتۋ جولىنداعى عىلىمي ىزدەنىستەرگە توقتالدى. سونىڭ ءىشىندە, ءتىرى بولسا بۇگىنگى كۇندەرى 95 جاسقا تولاتىن ءاليا مولداعۇلوۆا تۋرالى اڭگىمەلەر مەن دەرەكتەر كوپ ايتىلدى. «ءا.مولداعۇلوۆا – شىعىستىڭ شىنارى» اتتى كىتاپ كورمەسى دە ۇيىمداستىرىلعان ەكەن. وسىنداعى دەرەكتەردەن جانە ارداگەرلەر مەن عالىمداردىڭ اڭگىمەلەرىنەن جاس ۇرپاق باتىر ءاليانىڭ ءومىرى تۋرالى كوپتەگەن جاڭا ماعلۇماتتار الدى.
قازىرگى جاستار تاعدىردىڭ جازۋىمەن ءاليا سوعىس قارساڭىندا لەنينگراد (قازىرگى سانكت-پەتەربۋرگ) قالاسىنداعى بالالار ءۇيىندەگى تاربيەلەنۋشىلەردىڭ ءبىرى بولعانىن بىلە بەرمەيدى. قالاعا بومبالار ءتۇسىپ, قورشاۋدا قالۋ قاۋپى تۋعاندا ول ءوزىنىڭ سىنىپتاستارىمەن بىرگە مايدانعا سۇرانعان. الايدا 16 جاستان ەندى اسقان, جاپ-جاس قىزدى ءاسكەريلەر سوعىسقا العىسى كەلمەيدى. بىراق العان بەتىنەن قايتپاعان قايسار قىز اقىرى اسكەريلەردى كوندىرىپ, ءوزىن مەرگەندەر مەكتەبىنە جىبەرۋگە كوندىرەدى. ماسكەۋ تۇبىندەگى ۆەشنياكي سەلوسىندا قۇپيا تۇردە 1942 جىلى اشىلعان بۇل وقۋ ورنى «مەرگەندەردىڭ ورتالىق مەكتەبى» دەپ اتالعان. دالا قىزىنا ءتان وتكىر كوزىمەن, سابىرلى مىنەزىمەن ءاليا وندا ەڭ ۇزدىكتەردىڭ قاتارىنا ءىلىگەدى. ال مەكتەپتى بىتىرگەندە «ۇزدىك وقىعانى ءۇشىن ورتالىق كومسومول كوميتەتىنەن» دەگەن جازۋى بار مەرگەندەر ۆينتوۆكاسىن سىيلىققا الادى. ءاليا وسى ۆينتوۆكامەن 78 جاۋدىڭ كوزىن جويىپ, «لەنينگراد-نوۆگورود» مايدانىندا 1944 جىلدىڭ قاڭتار ايىندا ەرلىكپەن قازا تاپقان. سول 1944 جىلدىڭ ماۋسىم ايىندا وعان كەڭەس وداعىنىڭ باتىرى اتاعى بەرىلگەن. شىعىس حالىقتارىنىڭ ىشىندە بۇل اتاقتى ءاليا مەن مانشۇك قانا الدى.
وسى اڭگىمەلەر مەن دەرەكتەر جاس تولقىننىڭ جانارىنا وت, جۇرەكتەرىنە شوق تاستاپ تۇرعانى كورىنىپ تۇردى.
اتالعان شارا بارىسىندا ۇلتتىق مۋزەيدىڭ عىلىمي قىزمەتكەرى س.ابدراحمانوۆتىڭ مينياتيۋرالارى ۇسىنىلعان شاعىن كورمە دە كەلگەندەردىڭ نازارىنا ۇسىنىلدى. جيىننىڭ سوڭىنان كەلگەن قوناقتارعا ۇلتتىق مۋزەيدىڭ زالدارىنا ەكسكۋرسيا جاسالدى.
