«كونكۋرستىق راسىمدەردى وتكىزۋ ساتىسىندا 93 جوبا بار, 83 جوبا ازىرلەۋ ساتىسىندا. وڭىرلەر امبۋلاتوريالىق-ەمحانالىق قىزمەت وبەكتىلەرىن سالۋ جانە ونى پايدالانۋعا بەرۋ بويىنشا جوبالاردى ىسكە اسىرۋدا. سونداي-اق مەديتسينالىق تەحنيكامەن جاراقتاندىرۋ بويىنشا جوبالار جۇزەگە اسىپ جاتىر», دەدى دەنساۋلىق ساقتاۋ ءمينيسترى.
ءمينيستردىڭ ايتۋىنشا, جاسالعان شارتتار شەڭبەرىندە تارتىلعان ينۆەستيتسيالار سوماسى بويىنشا كوش باسىندا شىمكەنت, نۇر-سۇلتان قالالارىنىڭ اكىمدىگى مەن اقتوبە, پاۆلودار وبلىستارىنىڭ اكىمدىكتەرى تۇر.
«وڭىرلەردىڭ اكىمدىكتەرى بەكىتكەن دەنساۋلىق ساقتاۋ ينفراقۇرىلىمىن دامىتۋدىڭ پەرسپەكتيۆالىق جوسپارلارىنا سايكەس 2025 جىلعا دەيىنگى ينۆەستيتسيالارعا قاجەتتىلىك 1,3 ترلن تەڭگەدەن استامدى قۇرادى. امبۋلاتوريالىق-ەمحانالىق جانە ستاتسيونارلىق وبەكتىلەر قۇرىلىسىنىڭ جوبالارىن ىسكە اسىرۋ ءۇشىن مەديتسينالىق قىزمەتتەر ءۇشىن تاريفتى تولەۋمەن «سەرۆيستىك ءمجا» مودەلىن, سونداي-اق وبەكتىنى مەملەكەتتىك مەنشىككە بەرگەن جاعدايدا ينۆەستيتسيالاردى وتەۋمەن كەلىسىمشارتتاردى پايدالانۋ ۇسىنىلادى», دەدى ە.ءبىرتانوۆ.
ونىڭ ايتۋىنشا, جەتكىلىكتى قاراجات مولشەرىن گەنەراتسيالاۋعا قابىلەتسىز جوبالار بويىنشا مەملەكەتتىك بيۋدجەتتىك قارجىلاندىرۋدى پايدالانۋ قاجەت.
«ءىرى اۋرۋحانالار ينفراقۇرىلىمدىق ءمجا تەتىگى بويىنشا ىسكە اسىرىلاتىن بولادى. جوبالاردى ىرىكتەۋ كەزىندە مەديتسينالىق وبەكتىلەر اپاتىنىڭ الدىن الۋ, العاشقى مەديتسينالىق كومەكتى دامىتۋ جانە اۋرۋحانالىق سەكتوردى كوپبەيىندى كلاستەرلەرگە ينتەگراتسيالاۋعا باسىمدىق بەرىلەدى», دەدى ول.
2019 جىلعى ماۋسىمنىڭ سوڭىنا دەيىن وزەكتەندىرىلگەن وڭىرلىك دامۋ جوسپارلارى نەگىزىندە 2026 جىلعا دەيىن دەنساۋلىق ساقتاۋ ينفراقۇرىلىمىن دامىتۋدىڭ بىرىڭعاي پەرسپەكتيۆالىق جوسپارى بەكىتىلەتىن بولادى.
