اۋىل شارۋاشىلىعى مينيسترلىگىنىڭ تىكەلەي باستاماسىمەن وقۋشىلار سارايىندا ءىسكەر ويىندار فورماتى ۇلگىسىندە وتكەن سەميناردا اگرارلىق سەكتوردى ەكونوميكانىڭ جاڭا درايۆەرىنە اينالدىرۋ, ءىرى ەكسپورتتىق ءونىم وندىرۋشىلەر قاتارىنا قوسىلۋ, شيكىزات وندىرىسىنەن ساپالى وڭدەلگەن ءونىم شىعارۋ ساتىسىنا كوتەرىلۋ, وزەكتى ماسەلەلەردىڭ وڭتايلى شەشىم تابۋى اينالىپ كەلگەندە, وزىق ءادىس-تاسىلدەردى جەدەل مەڭگەرۋگە, ءوندىرىسكە ەنگىزۋگە تىكەلەي بايلانىستى ەكەنى اتاپ كورسەتىلدى. اتالعان ۆەدومستۆوعا قاراستى مەملەكەتتىك قىزمەتتى دامىتۋ جانە تسيفرلاندىرۋ دەپارتامەنتى ديرەكتورىنىڭ ورىنباسارى بەرنات الپىسبەكوۆ, وبلىستىق اۋىل شارۋاشىلىعى باسقارماسىنىڭ باسشىسى ەربولات بەكشەنوۆ, «نۇركەن-اگرو» جشس جەتەكشىسى قانات سىزدىقوۆ, «اتامەكەن-اگرو-شۇقىركول» اگروفيرماسىنىڭ باسشىسى ارمان ءابايدىلدين, م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى اۋىل شارۋاشىلىعى كافەدراسىنىڭ مەڭگەرۋشىسى, پروفەسسور كۇلبارام بايازيتوۆا, تاعى باسقا قاتىسۋشىلار جەرگىلىكتى جەرلەردە قالىپتاسقان وڭ ءۇردىستەردى, ورنىققان ءتاجىريبەلەردى ارقاۋ ەتە وتىرىپ, ءوز ويلارىن ناقتى مىسالدارمەن ساباقتادى. اوك سالاسىندا جۇزدەن استام قىزمەتتىڭ تسيفرلى فورماتقا كوشىرىلۋى ناتيجەسىندە ءوتىنىمدەردى قاراۋ مەرزىمى 2,5 ەسەگە دەيىن قىسقارعان. جاڭاشىلدىقتاردىڭ بىرىنە ەلەكتروندىق تاۋارلىق جانە قارجىلىق قولحاتتاردى, «بلوكچەين» تەحنولوگياسىن, ونلاين-تاپسىرىس بەرۋدى, ونلاين-ترەيدينگ جۇيەلەرىن جاتقىزۋعا بولادى. اوك ونىمدەرىن قاداعالاۋدىڭ «ەگىستىكتەن ۇستەلگە دەيىن» جۇيەسىن, ەلەكتروندى ساۋدانى تولىق فورماتتا ەنگىزۋ جوسپارلانعان.
ىرىس جولىن تاۋىپ, بۇلاق كوزىن سەلدەتۋدىڭ ءبىر ۇشى عىلىمعا كەلىپ تىرەلەتىنىن جوققا شىعارۋ قيىن. وزدەرىنىڭ بيزنەس-جوبالارى مەن وزىق باعدارلامالارىن ۇسىنىپ, ءوزارا تالقىعا سالعان كوماندا مۇشەلەرىنىڭ الدىمەن عىلىم جەتىستىكتەرىنە جۇگىنگەندەرى سوندىقتان. «اقىلدى فەرمالار», «دالمە-ءدال ەگىنشىلىك» جۇيەلەرى از شىعىن جۇمساپ, مول ءونىم الۋدىڭ ءتيىمدى ءتاسىلى بولاتىنىن العا تارتا وتىرىپ, اۋىلشارۋاشىلىق جەرلەرىن تالاپقا ساي يگەرۋدىڭ جولدارىن ورتاعا سالدى. م.قوزىباەۆ اتىنداعى سقمۋ عالىمدارى «پەتەرفەلد-اگرو», «شاعالا-اگرو» سەرىكتەستىكتەرىمەن قويان-قولتىق جۇمىس ىستەپ, قۋانتارلىق ناتيجەگە قول جەتكىزىپ كەلەدى. بۇل شارۋاشىلىقتاردا ەلەكتروندى توپىراق كارتالارى, اگروحيميالىق كارتوگراممالار كەڭىنەن قولدانىلادى. ەگىنشىلىك مادەنيەتىن جەتىلدىرۋ, اۋىسپالى ەگىس جۇيەسىن قاتاڭ ساقتاۋ ناتيجەسىندە جانارماي, مينەرالدى تىڭايتقىشتار شىعىنى الدەقايدا كەمىگەن. ماسەلەن, وتىن داتچيكتەرىن ورناتۋ ارقىلى جانار-جاعارماي ۇرلىعىنا توسقاۋىل قويىلعان. ناقتى مەتەودەرەكتەر, سەنسورلار, عارىشتىق مونيتورينگ, باسقا دا شەشىمدەر كوكتەمگى, كۇزگى دالا جۇمىستارىنىڭ ۋاقتىلى اتقارىلۋىن تەزدەتكەن. زيانكەستەرمەن كۇرەسۋدىڭ, ەگىن ەگۋ مەن استىقتى جيناۋدىڭ بولجامدى مەرزىمدەرى دە تەز ايقىندالادى.
«SMART» فەرمالار ارقىلى ادام كۇشىن بارىنشا ازايتىپ, ساۋىلعان ءسۇت ءمولشەرىن انىقتاۋ, ءدارى-دارمەكپەن قامتۋ, جەمدەۋ, ەلەكتروندى چيپ تاعۋ سەكىلدى ناقتى مال شارۋاشىلىعى ەلەمەنتتەرى ەنگىزىلگەن. «قازەكسپورتاستىق» حولدينگىنە قاراستى شارۋاشىلىقتاردىڭ ءبىرى «اتامەكەندە» تابىس 6,4 ميلليارد تەڭگەدەن 20 ميلليارد تەڭگەگە دەيىن ارتقان. اققايىڭ اۋدانىندا «يۆان زەنچەنكو» جشس قۇنى 700 ميلليون بولاتىن 632 باسقا ارنالعان «اقىلدى» ءسۇت فەرماسىن ىسكە قوسقان.
