رامازان – مۇسىلمانداردىڭ ۇلىق مەرەكەسى. بۇل ايدا يسلام ءدىنىن ۇستاناتىن بارلىق حالىق ءداستۇرلى تۇردە تاڭ اتقاننان كۇن باتقانعا دەيىن ءوزىن تاماقتان تيادى. بيىلعى رامازان ايىنداعى وزگەرىستەرگە قاتىستى تۇسىنىكتەمە بەرىپ كەتكەن س.سەيتبەكوۆ قاسيەتتى رامازان ايىنىڭ ەرەكشەلىكتەرى مەن وعان ماڭعىستاۋلىقتاردىڭ دايىندىعى تۋرالى توقتالدى.
- بيىلعى ورازا الدىڭعى جىلعا قاراعاندا 10-11 كۇن ەرتە كەلەدى. 2019 جىلى رامازان ايى 6 مامىردا باستالىپ, 4 ماۋسىمعا دەيىن جالعاسادى, بىلتىر 29 كۇن اۋىز بەكىتكەن بولساق, بيىل 30 كۇن ورازا ۇستايتىن بولامىز. قادىر ءتۇنى مامىردىڭ 31 نەن ماۋسىمنىڭ 1-نە قاراعان ءتۇن دەپ بەلگىلەندى. بيىلعى ءپىتىر ساداقانىڭ ەڭ از مولشەرى ورتاشا ەسەپپەن 300 تەڭگەنى قۇرايدى. دەگەنمەن, ادامدار بەلگىلەنگەن مولشەردە قايىرىمدىلىق جاساي الماسا, وندا ولار شاماسى كەلگەنشە ساداقا بەرۋگە دە بولادى. ال, بۇل قاراجات جاعدايى جوق ادامداردىڭ دا وسى مەرەكەگە دايىندالۋى ءۇشىن مەشىتكە نەمەسە مۇقتاج جانداردىڭ تىكەلەي وزىنە تاپسىرىلادى. الايدا, مۇقتاج جاندارعا اقشا ەمەس, ارپا, كۇرىش, قۇرما, ۇن سەكىلدى ازىق-ت ۇلىك بەرۋگە دە بولادى, دەيدى قازاقستان مۇسىلماندارى ءدىني باسقارماسىنىڭ ماڭعىستاۋ وبلىسى بويىنشا وكىل يمامى سمايىل سۇيەرقۇل ۇلى.
سونىمەن قاتار, اۋىزاشاردا ىسىراپشىلدىققا جول بەرمەۋ كەرەك دەگەن باس يمام:
- قاسيەتتى رامازان ايىندا ساۋابى مول امالدىڭ ءبىرى – اۋىزاشار بەرۋ. قازىرگى تاڭدا وبلىسىمىزدا ۇجىم بولىپ مەشىتتە اۋىزاشار بەرۋ ۇردىسكە اينالىپ كەلەدى. اۋزى بەرىك جاندى اۋىزاشارعا شاقىرىپ تاماق بەرگەن — ورازا ۇستاعان ادامنىڭ الاتىنىنداي ساۋاپ الادى. اۋزى بەرىك ادامنىڭ ساۋابىنان دا ەش نارسە كەمىمەيدى. اۋىزاشار بەرۋدە ەڭ ءبىر ەستە شىعارماۋعا ءتيىستى ەرەجەمىز – ىسىراپ جاساماۋ. ونى جۇرتقا جاريا قىلىپ نەمەسە بىرەۋدەن وزىپ, كىسى الدىندا ماقتانۋ ەمەس, ورازا ۇستاعان ادامنىڭ ساۋابىن الۋ ءۇشىن شىن نيەتپەن بەرۋ. قاسيەتتى رامازان ايىندا اللا رازىلىعى ءۇشىن اۋىز اشار بەرگەندە باسەكەلەستىككە بوي الدىرۋ وتە قاتە امال. اۋىزاشاردا اس تا توك تاماق قويۋ مىندەت ەمەس, - دەدى ول.
