تۇڭعىش پرەزيدەنت – ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» اتتى ماقالاسى قوزعاۋ سالعان وسى باستامانىڭ سالتاناتتى تۇساۋكەسەر شاراسىنا باتىس قازاقستان وبلىسى اكىمىنىڭ ورىنباسارى ميرجان ساتقانوۆ, اقجايىق اۋدانىنىڭ اكىمى قاليار ايتمۇحامبەتوۆ ارنايى قاتىستى.
- قازاق ءۇشىن جىلقىنىڭ ورنى ەرەكشە. تاريحىمىزعا كوز سالساق, بابالارىمىز وسىناۋ ۇلانعايىر اتىراپتى ات ۇستىندە ءجۇرىپ قورعاپ قالعان. بۇگىنگى بۋىن بابادان قالعان مۇراعا ادالدىق تانىتىپ, اتقا ءمىنۋ مادەنيەتىن ۇيرەنىپ جاتقانى قۋانتادى. جاستار جىلىندا بالاۋسا تولقىندى ءتالىم-تاربيەگە باۋلىپ جاتقان اقجايىقتىقتاردىڭ بۇل باستاماسى كوپكە ۇلگى. «قۇلەگەر» ات سپورتى كەشەنى – وبلىسىمىزداعى وسىنداي بەسىنشى ات سپورتى مەكتەبى. اۋدانننىڭ باسقا دا وكرۋگتەرىندە ات سپورتى ۇيىرمەلەرىن اشۋ قولعا الىنىپ جاتىر ەكەن. ەرجۇرەك تە ەلجاندى ۇرپاق تاربيەلەۋدەگى باستامالارىڭىز باياندى بولسىن, - دەدى ميرجان مۇنايدار ۇلى.
جاڭا كەشەندە ۇرپاق ساناسىنا ۇلتتىق قۇندىلىقتار ءسىڭىرىلىپ, اتادان بالاعا ميراس بولعان كوكپار, قىز قۋ, تەڭگە ءىلۋ, اۋدارىسپاق سىندى حالىقتىق ويىنداردى دامىتۋ قولعا الىنباق.
- بىزگە قازىردىڭ وزىندە 30-عا تارتا بالعىن سپورتشى تىركەلدى. ولارعا اتتارىمىز دا دايىن. اتقورامىزدا 5 بايگە اتى, كوكپارعا ارنالعان 20 ات, سەرۋەندەۋگە ارنالعان 5 قىلقۇيرىق بار. بىلىكتى ەكى باپكەرىمىز دە ساقاداي ساي. ءبىراز جىل بۇرىن قۇرىلعان «قۇلاگەر» كوكپار كومانداسى تالاي جەردە ولجا سالىپ ءجۇر. سول شاباندوزداردىڭ ءىزىن باساتىن جاس سپورتشىلاردى دايىنداماقپىز. بايگەگە قوساتىن شاباندوزدارىمىز ءبىر توبە. سونىمەن قاتار كەشەندە سال اۋرۋىنا شالدىققان بالالارعا ارنالعان اتپەن سەرۋەندەۋ - يپپوتەراپيا ۇيىرمەسى قىزمەت كورسەتەدى. بۇل جەرگە كەز كەلگەن ادام كەلىپ, اقى تولەپ اتپەن سەرۋەندەۋىنە دە بولادى. كەشەن دەمالىسسىز جۇمىس ىستەيدى, - دەيدى كەشەننىڭ اتقارۋشى ديرەكتورى نۇرالى كەنجەمۇرات.
كەشەننىڭ اشىلۋ قۇرمەتىنە وراي ۇيىمداستىرىلعان « ۇلى دالا ويىندارى» وبلىستىق اشىق ءتۋرنيرى جوعارى دەڭگەيدە ءوتتى. كوكپار, تاي جارىس, قۇنان جارىس, اۋدارىسپاق, تەڭگە ىلۋدەن بولعان باسەكەلەر تارتىستى بولدى. بولات اتكەەۆكە اقجايىق اۋدانى اكىمىنىڭ العىس حاتى تابىستالدى.
