تۇڭعىش پرەزيدەنت نۇرسۇلتان نازارباەۆ ەلوردا تۇرعىندارى مەن قوناقتارى الدىندا سويلەگەن سوزىندە بارشا جۇرتتى قازاقستان حالقىنىڭ بىرلىگى كۇنىمەن قۇتتىقتادى.
– بۇگىن كەڭ-بايتاق وتانىمىزدىڭ بارلىق وڭىرلەرىندە كوكتەمنىڭ جارقىراعان مەرەكەسى – 1 مامىر – ەل بىرلىگىنىڭ مەرەكەسىن اتاپ ءوتىپ جاتىرمىز. وسى ەل بىرلىگى دەگەن قاسيەتتى ۇعىم مەن مەرەكە بارشامىزعا قۇتتى بولسىن, بارشامىزعا جاقسىلىق پەن قۇت بەرەكە اكەلسىن دەپ تىلەيمىن. ەلىمىزدە اتا-بابامىزدان قالعان «بىرلىك بولماي, تىرلىك بولماس», «تورتەۋ تۇگەل بولسا, توبەدەگى كەلەدى, التاۋ الا بولسا, اۋىزداعى كەتەدى» دەگەن ناقىل بار. وسىنى نەگىزگە العان حالقىمىز نەبىر قيىن-قىستاۋ جاعدايلاردان ءوتىپ, كەڭ-بايتاق دالامىزدى ساقتاپ قالىپ, بىزگە امانات ەتتى. وسى بىرلىكتىڭ ارقاسىندا ءبىز تاۋەلسىز قازاقستاندى قۇرىپ, اتا-بابانىڭ اڭساعان اماناتىن ورىندادىق, – دەدى ەلباسى.
ەلباسى ودان ءارى ىنتىماق پەن بىرلىكتىڭ ارقاسىندا ماڭگىلىك ەل ۇعىمىنىڭ قالىپتاسقاندىعىن اتاپ ءوتتى.
– قازاق حالقى ءوز تاۋەلسىزدىگى ءۇشىن قاسىق قانىن اياعان جوق. سول قاعيداعا ادال بولايىق, اتا-بابامىزدىڭ ارمانىن ورىندايىق. وسى جىلدار ىشىندە جەتكەن جەتىستىكتەرىمىزدىڭ بارلىعى – ەلدىڭ بىرلىگىنىڭ, حالىقتار اراسىنداعى تىنىشتىقتىڭ ارقاسى. قازاقستاننىڭ كوپەتنوستى بولعانىنا ەشكىمنىڭ جازىعى جوق. سوندىقتان قازاق حالقى ەلدەگى اۋىزبىرشىلىككە ۇيىتقى بولىپ, وزگەلەرگە قامقورلىق كورسەتىپ, مامىراجاي تىرشىلىك ەتۋدەمىز, – دەپ اتاپ ءوتتى تۇڭعىش پرەزيدەنت.
ەلباسى زاماناۋي قازاقستان بارلىق جەتىستىككە قوعامداعى بىرلىكتىڭ ارقاسىندا قول جەتكىزگەنىنە توقتالىپ, بەيبىت ءومىر مەن تۇراقتىلىقتى باعالاۋعا جانە ساقتاۋعا شاقىردى.
– ءبىز – باقىتتى حالىقپىز. بىرلىگىمىزدى ساقتاپ, تاۋەلسىزدىگىمىزدى قۇرمەتتەۋىمىز كەرەك. دامۋ باعدارلامالارىمىزدى ءجۇزەگە اسىرۋ ەلىمىزدىڭ بولاشاعىن ودان ءارى جارقىن ەتە تۇسەدى, – دەدى تۇڭعىش پرەزيدەنت.
نۇرسۇلتان نازارباەۆ الەمدە ەتنوسارالىق قاقتىعىستاردىڭ سالدارىنان تۋىندايتىن قازىرگى زامانعى سىن-تەگەۋرىندەرگە توقتالدى.
راسىندا, بولمىسى, ءتىلى مەن ءدىنى باسقا جۇرتشىلىقتىڭ ءۇنى ءبىر جەردەن شىعىپ, جاھانعا تاتۋ-ءتاتتى تىرشىلىكتىڭ ۇلگىسى مەرەكەلىك الاڭدا كورىنىس تاپتى.
وسى مەرەكەلىك ءىس-شارانىڭ ورتاسىندا جۇرگەن, كۇنى كەشە قازاقستان حالقى اسسامبلەياسى توراعاسىنىڭ ورىنباسارى بولىپ تاعايىندالعان ەلوردالىق وزبەك ەتنومادەني ورتالىعىنىڭ باسشىسى شەرزود پۋلاتوۆپەن تىلدەسكەنىمىزدە, ول ەلىمىزدىڭ دامۋىن وسى بىرلىكپەن بايلانىستىرا سويلەدى.
– قازاقستانداعى تاتۋ-ءتاتتى تىرشىلىك پەن بىرلىك قازىر جەر-جاھانعا ۇلگى بولىپ وتىر. بارلىق ەتنوستاردىڭ ءبىر انادان تۋعانداي سىيلاسىپ, قيىنشىلىقتاردى بىرگە ەڭسەرۋىمىز دوستى قۋانتىپ, دۇشپاندى كۇيىندىرەدى. سولاقاي ساياساتتىڭ سالدارىنان قازاق جەرىنە كۇشپەن كوشىرىلگەن ۇلتتاردىڭ وكىلدەرىنە قازاق حالقى پانا بولىپ, ءبىر جاپىراق نانىمەن ءبولىسىپ, امان ساقتاپ قالدى. ءدىنى, ءداستۇرى بولەك جانداردى قۇشاعىنا الىپ, باۋىرىنا باستى. مىنە, قازىرگى ۋاقىتتا ەلباسىنىڭ ارقاسىندا ەلىمىزدەگى تىرلىك باياندى بولىپ, ەلىمىز وركەندەپ كەلەدى, – دەدى ش.پۋلاتوۆ.
