تۇڭعىشى ون سەگىزدە, ال, ءسۇت كەنجەسى بار بولعانى ەكى جاسار. تىرشىلىك قامىتىن جالعىز ءوزى سۇيرەۋ وڭاي ما, پاتەراقىسىن ۋاقىتىندا تولەي الماعان سوڭ جالعىزىلىكتى انا كوللەدجدە وقىپ جۇرگەن ۇلكەن ۇلىن امالسىز وقۋدان شىعارىپ تا العان. تۇرمىس تاۋقىمەتىن تارتقان وتباسىعا باسپانا الىپ بەرگەندە انا دا, بالا دا, جينالعان قاۋىم دا اق تۇيەنىڭ قارنى جارىلعانداي قۋاندى.
وبلىستىق مەشىت جانىندا «زەكەت» قايىرىمدىلىق قورى وسىدان بىرنەشە جىل بۇرىن قۇرىلعان بولاتىن. قوردىڭ باستى ماقساتى – تىرشىلىكتىڭ اق باس تولقىندارىمەن الىسقان جالعىزىلىكتى جانداردى قولتىعىنان دەمەۋ. «ەل ۇلەسى – پاتەرگە» اتتى الەۋمەتتىك جوبا ءساتتى جۇزەگە اسىپ كەلەدى. بۇعان دەيىن دە ءتورت وتباسىنا پاتەر الىپ بەرگەن بولاتىن. قور باسشىلارىنىڭ ايتۋىنا قاراعاندا, پاتەردى ساتىپ الۋ ءۇشىن قارجى جيناۋعا ستۋدەنتتەردەن باستاپ زەينەتكەرلەرگە دەيىن قولداۋ كورسەتكەن. ءسوز اراسىندا كوكشەتاۋلىق جاس ءانشى مۇراتقازى اپەزحان قايىرىمدىلىق كونتسەرتىن وتكىزىپ, ودان تۇسكەن 500 مىڭ تەڭگەنى قورعا اۋدارعاندىعىن ايتا كەتكەن ءلازىم.
ءبىر جاقسىسى, وبلىس ورتالىعىندا تاياۋدا عانا, ورازا الدىندا وتكەن «جارامازان» اتتى رۋحاني كەشتە بۇلاندى جانە ءبىرجان سال اۋداندارىندا دا ەكى وتباسىنا جەرگىلىكتى قايىرىمدى جانداردىڭ كومەگىنىڭ ارقاسىندا باسپانا كىلتى تابىس ەتىلگەندىگى جاريا ەتىلدى. وسىلايشا, قايىرىمدى جانداردىڭ كومەگىنىڭ ارقاسىندا ءبىر كۇندە ءۇش وتباسى باسپانالى بولدى. جان جادىراتار جاقسى ءىس ءالى دە جالعاسىن تابا بەرمەك.
