بىراق كيىز ءۇي حالقىمىز ءۇشىن قاشاندا قىمبات قازىنا. ونى جاستار اراسىنا ناسيحاتتاۋ, تىگۋ جانە قايتا جىعۋ, جيناۋدى ۇيرەتۋ, جاساۋ-جابدىعىن ورنى-ورنىمەن قولدانا بىلۋگە باۋلۋ كۇن تارتىبىنەن تۇسپەگەنى دۇرىس.
ماڭعىستاۋ وبلىستىق تاريحي-ولكەتانۋ مۋزەيىندە وڭىردەگى ۇلتتىق ءداستۇر مەن مادەني مۇرانىڭ كوزدىڭ قاراشىعىنداي ساقتالىپ كەلگەندىگىنىڭ ايقىن ايعاعىنداي ماڭعىستاۋ كيىز ءۇيىنىڭ مارتەبەسىن كوتەرىپ ناسيحاتتاۋ ماقساتىندا «كيىز ءۇي – ۇلتتىق قۇندىلىقتار قازىناسى» تاقىرىبىندا كيىز ءۇي تىگۋدەن جارىس ءوتتى.
حالىق ونەرىن, بابالار مۇراسىن قاستەرلەي وتىرىپ, ۇلتتىق ءداستۇرلى قولونەردى دامىتۋ مەن جانداندىرۋدى ۇرپاق ساناسىنا ءسىڭىرۋ, ۇمىتىلا باستاعان داستۇرلەرىمىزدى جاڭعىرتا جالعاستىرۋعا ش. ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتى تاريح فاكۋلتەتىنىڭ 1-كۋرس ستۋدەنتتەرى اراسىندا جاساقتالعان «الاش», «شاڭىراق» توپتارى قاتىستى. ولار كيىز ءۇي سۇيەكتەرىنىڭ داستۇرگە ساي ورنالاسۋى, كەرەگەنىڭ جايىلۋى مەن تاڭعىشتارىنىڭ دۇرىس بايلانۋى, سىقىرلاۋىقتىڭ اقاۋسىز بەكىتىلۋى, شاڭىراقتىڭ كوتەرىلۋى, ۋىقتاردىڭ شانشىلۋى, باۋلار مەن باسقۇرلاردىڭ دۇرىس ۇستالۋى, شيلەر مەن كيىزدەردىڭ جابىلۋى بويىنشا سىنعا ءتۇستى.
– كيىز ءۇيدى ءبىلۋ, ونى تىگۋ, قۇرالدارىن دۇرىس ورنالاستىرا ءبىلۋ, سونداي-اق ونىڭ بۇيىمدارىن رەتىمەن, جۇيەسىمەن قويۋ – ۇلكەن ءبىلگىرلىكتى قاجەت ەتەدى. ونى مەڭگەرۋ وڭاي شارۋا ەمەس, الايدا كيىز ۇيگە دەگەن قۇرمەت قازاق جاستارىنىڭ, اسىرەسە ماڭعىستاۋ جاستارىنىڭ بويىندا, قانىندا بار قاسيەت بولعاندىقتان, ول ءوز-وزىنەن جانە بىرتە-بىرتە قالىپقا ءتۇسىپ جەتىلىپ كەتەدى دەپ ويلايمىن. ءبىزدىڭ ماقساتىمىز – جاستاردىڭ بويىنداعى تۇما بۇلاقتىڭ كوزىن اشۋ, ۇلتتىق قۇندىلىقتارىمىزدى قاستەرلەپ, وزدەرىنەن كەيىنگى ۇرپاققا تانىتۋىنا كۇش سالۋ, دەيدى قازىلار القاسىنىڭ توراعاسى, مادەنيەت قايراتكەرى, «حاس شەبەر» اتاعىن يەلەنگەن قولونەرشى اۋەس ساعىناەۆا.
ايتسا ايتقانداي, جاستار كيىز ءۇي ءتىگۋگە ەرەكشە ىنتامەن, قۇلشىنىسپەن كىرىستى. ازىلدەرىن ايتىپ, اندەتە ءجۇرىپ كيىز ءۇيدى ورنىقتى ەتىپ تىكتى, جاساۋىن جايعاستىردى. جاستاردىڭ جالىنىنا ريزا بولعان قازىلار ەكى توپتى تەڭ باعالاپ, بىردەي ۇپاي بەرىپ, ديپلومدارمەن ماراپاتتاپ, مۋزەي اتىنان كىتاپتار سىيعا تارتتى.
كيىز ءۇي عانا ەمەس, وزگە دە ۇلتتىق ەرەكشەلىكتەرىمىزگە ساي قۇندىلىقتارىمىز مۋزەيدە ودان ءارى تۇراقتى, ءارى كەڭ كولەمدە ناسيحاتتالا بەرەتىن بولادى.
ماڭعىستاۋ وبلىسى
