«اۋداندا مۇددەلى ادامدار ءبىر ءبىرىن قالقالايدى, كىناسىن جاۋىپ وتىرادى. ورتكە كىنالىلەردى انىقتاپ, جازاسىن بەرسە, ولار ەكىنشىدە قايتالاماس ەدى. جۇمىس جۇرمەيدى! ناۋىرزىم قورىعى ەلىمىزدىڭ بەتكە ۇستار تابيعات بايلىعىنىڭ ءبىرى. جىلدا وسىلاي ورتەنە بەرسە, ودان نە قالادى؟», دەدى ارحيمەد بەگەجان ۇلى.
سونىمەن قاتار بايانداماسىندا ناۋىرزىم قورىعىنداعى ءورت تۋرالى ءبىر اۋىز ءسوز ايتپاعان وبلىستىق توتەنشە جاعدايلار دەپارتامەنتىنىڭ باستىعى تالعان كاكىموۆتى دە سىنعا الدى.
ءوڭىر باسشىسى جەرگىلىكتى جەردە ءورتتىڭ الدىن الۋ, پروفيلاكتيكالىق, ءتۇسىندىرۋ جۇمىستارى ءجۇرۋ كەرەكتىگىن ايتتى. ورتكە كىنالىلەردەن اكىمشىلىك جاۋاپكەرشىلىككە تارتۋ دا ناشار, ولارعا سالىنعان ايىپپۇل دا ماردىمسىز.
«4 گەكتار ورمان القابى ورتەنگەن, سول ءۇشىن 19 ادامدى اكىمشىلىك جاۋاپكەرشىلىككە تارتقاندا 312 مىڭ ايىپپۇل سالعان. 4 گەكتار اعاشتى جەر, تۇتاس توعاي ەمەس پە؟ 4 گەكتار ۇلكەن القاپ, وسىنشا ورمان جانعاندا 312 مىڭ ايىپپۇل دەگەن نەمەنە؟», دەدى ارحيمەد بەگەجان ۇلى.
كەڭەيتىلگەن ماجىلىستە وبلىس اكىمى اۋداندار اكىمدەرىنە جانە ءتيىستى ورىندار باسشىلارىنا ورمان القابىنىڭ ورتتەن امان ساقتاۋ جۇمىستارىن قاتاڭ تاپسىردى.
