قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتايتىن لينگۆيستيكالىق كوميسسيا مۇشەلەرى تولىق قۇرامدا قاتىستى. لينگۆيستيكالىق ەمتيحان بارلىق ءۇش كەزەڭ بويىنشا ءوتتى: تاقىرىپ بويىنشا جازباشا تاپسىرما جازۋ, ءماتىن وقۋ جانە لينگۆيستيكالىق كوميسسيا بەرگەن تاقىرىپقا كوپشىلىك الدىندا كەمىندە ون بەس مينۋت ءسوز سويلەۋ. ەمتيحان تاپسىرىلعاننان كەيىن لينگۆيستيكالىق كوميسسيا تالقىلاۋ وتكىزىپ, قورىتىندىلادى. وتىرىسقا ورتالىق سايلاۋ كوميسسياسىنىڭ مۇشەسى ءلاززات جاڭىلىسقىزى سۇلەيمەن قاتىستى. كوميسسيا جۇمىسى اشىق جانە جاريالى تۇردە جۇزەگە اسىرىلدى. بۇل تۋرالى ورتالىق سايلاۋ كوميسسياسىنىڭ مۇشەسى, فيلولوگيا عىلىمدارىنىڭ دوكتورى, پروفەسسور, قازاقستان رەسپۋبليكاسى ۇلتتىق عىلىم اكادەمياسىنىڭ كوررەسپوندەنت-مۇشەسى, ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك ايتىپ بەردى. ول: - قازاقستان رەسپۋبليكاسىنىڭ پرەزيدەنتتىگىنە كانديدات تولەۋتاي ساتاي ۇلى راقىمبەكوۆ كەلىپ, مەملكەتتىك ءتىلدى ەركىن مەڭگەرگەندىگىن انىقتاۋ ءۇشىن ەمتيحان تاپسىردى. اتا زاڭىمىزدىڭ 41-بابىنىڭ 2 تارماعىندا كورسەتىلگەندەي, كانديدات مەملەكەتتىك ءتىلدى ەركىن مەڭگەرگەن بە, جوق پا دەگەن شەشىم شىعارۋىمىز كەرەك بولدى. ادەتتەگىدەي جازىلىم, وقىلىم بويىنشا كانديدات ءۇش تاپسىرمانى ورىندادى. ءبىرىنشى جازباشا جۇمىسى ء"بىزدىڭ كۇشىمىز – بىرلىكتە" دەگەن تاقىرىپقا ارنالعان. بۇل سۇراققا كانديدات ءبىر ساعاتتاي وتىرىپ, اسىقپاي, بايىپپەن داينىدالدى. ودان كەيىن ەكىنشى وقىلىم بويىنشا ءوزى تاڭداپ العان مۇحتار اۋەزوۆتىڭ "اباي جولى" شىعارماسى بولدى. ونىڭ بۇل تاڭداۋى كوميسسيا مۇشەلەرىن قۋانتتى, ويتكەنى بۇل وتە ۇلكەن, ماڭىزدى تاقىرىپ ەدى. ءۇشىنشى تاپسىرماسى ءوزى العان بيلەتىنە سايكەس "ەلوردا – تاۋەلسىزدىك تۇعىرى" اتتى تاقىرىپ بولدى. وسى ءۇش تاپسىرمانى ورىنداۋ بارىسىندا قازاقستان رەسپۋبليكاسىنىڭ پرەزيدەنتتىگىنە كانديدات مەملەكەتتىك ءتىلدى وتە جوعارى دەڭگەيدە مەڭگەرگەندىگىن انىق كورسەتتى. ارينە جازىلىمدا ەكى, ءۇش ەمەلەدەن تەحنيكالىق قاتەلەر بولدى. بىراق ولاردى اسا ماڭىزدى ەمەس دەپ ەسەپتەيمىز. نەگىزىنەن ستيل مەن ءسوز ساپتاۋ تۇرعىسىنان جانە ساۋاتتىلىق جاعىنان تولەۋتاي ساتاي ۇلى راقىمبەكوۆ ءبىر اۋىزدان مەملكەتتىك ءتىلدى ەركىن مەڭگەرگەن دەگەن باعا الدى, دەپ ءسوزىن قورىتىندىلادى.
