بالدىرعانداردىڭ تالابى مەن تالانتىن ساراپقا سالۋعا ء انشى ايري كەلىپتى. جۇزدەرى بال-بۇل جانعان جۇزدەگەن جاۋقازىن قازىلار القاسىنىڭ الدىندا قازاق, ورىس, اعىلشىن تىلدەردە اۋەلەتە ءان شىرقاپ, بويداعى دارىن مەن قابىلەت-قارىمىن ساراپقا سالدى. بالا كوڭىل ءۇشىن بۇل بايقاۋ تولقىنىسقا تولى ماڭىزدى ءسات ەكەنى ايتپاسا دا تۇسىنىكتى. ءدۇبىرلى بايقاۋعا وبلىسىمىزدىڭ ءار تۇكپىرىنەن ات ارىلتىپ جەتكەن 8 بەن 12 جاس ارالىعىنداعى جاس دارىندار ءوز قابىلەتتەرىن كورسەتۋ ءۇشىن تىرىسىپ, بارىن سالدى. ءانشى ءايريدىڭ ايتۋىنشا, كوكشە جەرىندە ونەر كورسەتكەن تالانتتى جاستار بايقاۋعا اسا ءبىر ىجداھاتتىلىقپەن دايىندالعان ەكەن. تالىمگەرلەر قاتىسۋشىلاردى تەك تىڭداپ قانا قويماي, اقىل-كەڭەستەرىن ايتىپ, تاجىريبەلەرىمەن ءبولىسىپ, كىشكەنتاي ونەرپازدارعا قولداۋ كورسەتىپ وتىردى.
ءان بەسىگى اتانعان كيەلى كوكشە ءوڭىرى تالانتتى ونەرپازدارعا باي ەكەندىگى انىق بايقالدى. اتادان قالعان سول اسىل مۇرانى جالعاپ كەلە جاتقان وسكەلەڭ ۇرپاقتىڭ دا كوكىرەگىندە ونەردىڭ وتى لاپىلداپ تۇرعاندىعىن كوردىك. قازىلار القاسىنا دا كىل جۇيرىكتىڭ ىشىنەن ۇزدىگىن تاڭداۋ وڭايعا سوقپادى. بايقاۋدا توپ جارعان ەرسۇلتان شايمۇرات اقمولا وبلىسىنىڭ نامىسىن قورعايتىن بولادى. قاتتى تولقىپ, قۋانىشتان كوزىنە جاس ۇيىرىلگەن ونەرپاز ورەن: «بايقاۋعا قاتىسۋعا كەلگەن وسىنشاما بالانى كورگەندە جەڭىس ماعان بۇيىرا قويمايتىن شىعار دەپ ويلادىم. بىراق بار كۇشىمدى جيناپ, ىرىكتەۋدىڭ بارلىق كەزەڭدەرىندە ءوزىمدى سەنىمدى ۇستاۋعا تىرىستىم. جەڭىسكە جەتكەنىمە قاتتى قۋانىپ تۇرمىن», – دەدى. سونىمەن, ەلىمىزدىڭ ءار وڭىرىنەن ۇزدىك شىققان ونەرپازدار انىقتالعان سوڭ ولار كاسىبي مۋزىكانتتاردان, حورەوگراف, ستيليستەردەن مۋزىكا مەكتەبىندە ءبىر اي ءتالىم الاتىن بولادى. ال, قازان ايىنىڭ 25-27-ءسى ارالىعىندا الماتى قالاسىندا وتەتىن فينالدىق باعدارلامادا قازىلار القاسى مەن سمس-داۋىس بەرۋ ارقىلى تەلەكورەرمەندەر جۇرەگىن جاۋلاي بىلگەن حاس تالانت پاريجدىك «ديسنەيلەندكە» تەگىن قىدىرىپ قايتۋ جولداماسىنا جانە قازاقستانداعى ەڭ ۇزدىك مۋزىكالىق وقۋ ورىندارىنىڭ ءبىرىنىڭ گرانتىنا يە بولماق. بايقاۋ ۇيىمداستىرۋشىلارىنىڭ ايتۋىنشا, وسى جىلدار ارالىعىندا ىرىكتەۋ تۋرلارىنا 20 156 بالا قاتىسقان, تەلەديداردان 12 كونتسەرتتىك شوۋ, 24 كۇندەلىك, 128 يميدجدىك روليك كورسەتىلگەن. «بالا داۋىسى» تۇلەكتەرى بۇگىندە «جاندانۋ الەمى» قورىنىڭ قولداۋىمەن مۋزىكالىق مەكتەپتەر مەن كوللەدجدەردە ءبىلىم الۋدا.
