حوككەي • 27 ءساۋىر، 2019

ەرلان قوشانوۆ «سارىارقا» حوككەي كلۋبىن قۇتتىقتادى

قاراعاندى وبلىسىنىڭ اكىمى ەرلان قوشانوۆ «سارىارقا» حوككەي كلۋبىنىڭ باسشىلىعى مەن ويىنشىلارىن قابىلداپ، ۇجىمدى رەسەيدىڭ جحل تۇراقتى چەمپيوناتىنىڭ باس جۇلدەسى – پەتروۆ كۋبوگىنىڭ جەڭىمپازى اتانۋىمەن قۇتتىقتادى.

قايرات ءابىلدا

ءوڭىر باسشىسى قاراعاندىلىق حوككەيشىلەردىڭ تولاعاي تابىسى وبلىس قانا ەمەس، جالپى ەلىمىز ءۇشىن ايتۋلى وقيعا ەكەنىن اتاپ ءوتتى.

– بىزگە قازاقستاننىڭ تۇپكىر-تۇپكىرىنەن قوڭىراۋ شالىپ، قۇتتىقتاۋدى قارشا بوراتىپ جاتىر. مەن ءوزىم قالامىزدا وتكەن بارلىق فينالدىق ويىنداردا جانكۇيەر بولدىم. ەسىمدە قالعان ءبىر جارقىن ءساتتى اتاپ ايتقىم كەلىپ وتىر. كەزەكتى ماتچتىڭ بىرىندە ماكسيم كيتسىننىڭ تىزەسىنە شايبا تيگەندە، تورەشى ويىندى توقتاتپاعان ەدى. سول كەزدە ويىنشىمىز كومانداسى ازشىلىقتا قالماس ءۇشىن بار كۇشىن جيىپ، بورتقا دەيىن سۇيرەتىلىپ باردى. سول كەزدە كوممەنتاتور ماكسيمدى «جاراقات العان پارتيزانمەن» سالىستىرعان بولاتىن. سول ءسات ەستە قالارداي كەرەمەت بولدى، – دەدى ءوڭىر باسشىسى.

سونداي-اق، وبلىس اكىمى باپكەرلەر قۇرامى مەن ويىنشىلارعا العىس ايتىپ، حوككەي كلۋبىنا جاڭا جەڭىستەر تىلەدى.

«سارىارقا» كومانداسىنىڭ باس جاتتىقتىرۋشىسى لەونيد تامبيەۆ وبلىستا حوككەي سپورتىن دامىتۋعا باعىتتالعان جۇمىستارعا ريزاشىلىق سەزىمىن ءبىلدىردى. سونىمەن قاتار، قاراماعىنداعى حوككەيشىلەردىڭ جەڭىسكە دەگەن جىگەرى مەن قۇلشىنىسىن ورىندى ماقتان ەتتى.

– باپكەرلەردىڭ اراسىندا جاتتىقتىرۋشى دەگەن گولليۆۋدتاعى ز ۇلىم سياقتى قورقىنىشتى، بىراق ناعىزدىڭ ءوزى بولۋى كەرەك دەگەن ءسوز بار. مەنىڭ ويىمشا، جىگىتتەر – ءسوزسىز باتىرلار، ولار جاراقاتتارى جانە سىنىقتارىنا قاراماستان جانكەشتى، ادال جانە ناعىز ويىن كورسەتە الدى، – دەدى ل.تامبيەۆ.

كەزدەسۋ سوڭىندا «سارىارقا» حوككەي كلۋبىنىڭ ۇجىمى جان-جاقتى قولداۋ كورسەتكەنى ءۇشىن وبلىس اكىمىنە التىن مەدال تابىس ەتتى. ال سپورتتاعى جەتىستىكتەرى مەن ءوڭىردىڭ دامۋىنا قوسقان ۇلەسى ءۇشىن كلۋبتىڭ بارلىق مۇشەلەرى وبلىس اكىمىنىڭ «قۇرمەت گراموتاسىمەن» ماراپاتتالدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز