ازيا چەمپيوناتىندا قازاقستاننىڭ ۇلتتىق قۇراماسى ساپىندا ونەر كورسەتكەن 10 بوكسشىنىڭ ۇشەۋى قالىڭ توپتىڭ اراسىندا قالىپ قويدى. 52 كيلو سالماقتاعى ءانۋار مۇزافاروۆتىڭ قاباعى جارىلىپ, جەڭىس قىرعىزستاندىق ازات ۇسەناليەۆتىڭ ەنشىسىندە كەتتى. 57 كيلو سالماق دارەجەسىندە ونەر كورسەتكەن الەم چەمپيونى قايرات ەراليەۆ ۇندىستاندىق كاۆيندەر سينگح بيشتتەن ايلاسىن اسىرا المادى. 69 كيلو سالماقتاعى اسلانبەك شىمبەرگەنوۆ وزبەكستاندىق بوبو-ۋسمون باتۋروۆقا جول بەردى. وسىلايشا, جارتىلاي فينالعا ەلىمىزدىڭ جەتى بوكسشىسى جەتتى.
جارتىلاي فينالدا 49 كيلو سالماقتاعى تەمىرتاس ءجۇسىپوۆتىڭ رينگكە كوتەرىلۋىنە دارىگەرلەر رۇقسات بەرمەدى. 64 كيلو سالماقتاعى ءساناتالى تولتاەۆ اسا تارتىستى وتكەن باسەكەدە تاجىكستاندىق باحودير ۋسمونوۆتان ۇتىلدى. ال اتاعى الىسقا جايىلعان ۆاسيلي لەۆيتتى وڭتۇستىك كورەيانىڭ وعلانى كيم حەن كيۋ ەكى رەت نوكداۋنعا تۇسىرگەننەن سوڭ تورەشىلەر جەكپە-جەكتى توقتاتۋعا ءماجبۇر بولدى. وسى ءۇش سپورشىمىز قولا مەدالدى قاناعات تۇتتى.
فينالدا قازاقستاننىڭ ءتورت بوكسشىسى بارىن سالىپ ايقاستى. جارىستىڭ سوڭعى كۇنى العاشقى بولىپ رينگكە كوتەرىلگەن 60 كيلو سالماقتاعى زاكىر سافيۋللين موڭعوليالىق تسەنبااتار ەردەنباتتان ۇتىلدى. ودان كەيىن قوس قانداسىمىز قازاق ەلىنىڭ ءانۇرانىن شىرقاتتى. اسىرەسە, ءبىز تۇرسىنباي قۇلاحمەتتىڭ جانقيارلىعىنا ريزا بولدى. نەگىزى ەلىمىزدە 75 كيلو سالماق دارەجەسىنىڭ كوشباسشىسى ءابىلحان امانقۇل ەكەنىن بارشا جۇرت جاقسى بىلەدى. داڭقتى باپكەر نۇرلان اقۇرپەكوۆتىڭ شاكىرتى ەسكى جاراقاتىنان ايىعا المادى. سودان ۇلتتىق قۇراما جاتتىقتىرۋشىلارى ويلانا-تولعانا كەلە, ءابىلحاننىڭ ورنىنا بانگكوكقا قۇلاحمەتتى اپارۋدى قۇپ كوردى. ءوز كەزەگىندە سىر بويىنىڭ سايىپقىرانى ەل سەنىمىن تولىقتاي اتقادى. شيرەك فينالدا ول ازيا ويىندارى مەن ازيا بىرىنشىلىگىنىڭ جەڭىمپازى, وزبەكستاندىق يسرايل مادريموۆتى ادەمى ۇتتى. جارتىلاي فينالدا تۇركىمەنستاندىق نۇرساحات پاززىەۆتىڭ مۇرىن بۇزىپ, ەلىنە قايتاردى. وسى جەكپە-جەكتە قازاقتىڭ ۇلىنا ايقىن جەڭىسكە جەتۋ ءۇشىن نەبارى 20 سەكۋند جەتكىلىكتى بولدى. فينالدا تۇرسىنباي قۇلاحمەت ۇندىستاندىق اشي قۇماردى ەش قينالماي جەڭدى.
81 كيلو سالماقتاعى بەك نۇرماعانبەتتىڭ دە ونەرى كوپشىلىكتىڭ كوڭىلىنەن شىقتى. جاستارى بۋىنى اراسىنداعى جارىستاردا جاسىنداي جارقىراپ, ەرەسەكتەر دۋىنا قوسىلعانىنا از عانا ۋاقىت بولعان تۇركىستاننىڭ تاستۇلەگى تايلاندتا كوپتى كورگەن كانىگى سپورتشىداي رينگتە ءوزىن ەركىن سەزىندى. تاكتيكالىق تا, تەحنيكالىق تا تۇرعىدان دايارلىعى وتە كۇشتى بەك سارى قۇرلىقتىڭ باستى دوداسىنىڭ باس جۇلدەسىن تالاسسىز جەڭىپ الدى.
الىپتاردىڭ ايقاسىن بارشا جانكۇيەر تاعاتسىزدانا كۇتتى. ويتكەنى, وزبەكستان مەن قازاقستان بوكسشىلارىنىڭ ءوزارا تارتىسى, «جان الىسىپ, جان بەرىسكەن» ايقاسى جانكۇيەرلەردى ەشۋاقىتتا بەي-جاي قالدىرعان ەمەس. ونىڭ ۇستىنە, اقتىق ايقاسقا سىرالعى قارسىلاستار شىقتى. ەكەۋى دە بۇگىنگى تاڭداعى الىپ قۇرلىقتىڭ ۇزدىكتەرى, الەمدىك دەڭگەيدەگى جارىستاردا جەڭىس تۇعىرىنا كوتەرىلگەن ساڭلاقتار. ماسەلەن, باحودير جالولوۆ – الەم چەمپيوناتىنىڭ قولا جۇلدەگەرى جانە ازيا چەمپيونى. كاسىپقوي رينگتە دە ءوزىن جاقسى قىرىنان كورسەتكەن ول التى كەزدەسۋدىڭ بارلىعىندا ايقىن باسىمدىق تانىتتى. قامشىبەك قوڭقاباەۆ – الەم جانە ازيا چەمپيوناتىنىڭ كۇمىس جۇلدەگەرى. بانگكوكتاعى جارىستىڭ شەشۋشى سايىسىندا ەكەۋى دە بارىن سالدى. دەسەك تە تورەشىلەر جالولوۆتىڭ قولىن كوتەردى. قوڭقاباەۆ كۇمىس مەدالدى قاناعات تۇتتى.
بانگكوكتا وتكەن ازيا چەمپيوناتىنىڭ ەرلەر اراسىندا مىنا بوكسشىلار جەڭىس تۇعىرىنىڭ ەڭ بيىك ساتىسىنا كوتەرىلدى: 49 كيلو – نوديرجون ميرزاحمەتوۆ (وزبەكستان), 52 كيلو – اميت ء(ۇندىستان), 56 كيلو – ميرازيزبەك ميرزاحاليلوۆ (وزبەكستان), 60 كيلو – تسەنبااتار ەردەنبات (موڭعوليا), 64 كيلو – باحودير ۋسمونوۆ (تاجىكستان), 69 كيلو – بوبو-ۋسمون باتيروۆ (وزبەكستان), 75 كيلو – تۇرسىنباي قۇلاحمەت (قازاقستان), 81 كيلو – بەك نۇرماعانبەت (قازاقستان), 91 كيلو – كيم حەن كيۋ (وڭتۇستىك كورەيا) جانە +91 كيلو – باحودير جالولوۆ – (وزبەكستان).
سونىمەن قاتار, ايەلدەر اراسىندا وتكەن جارىستا ءتورت بوكسشىمىز قولا مەدالدى مويىندارىنا ءىلدى. ولار – ميلانا سافرونوۆا (64 كيلو), داريعا شاكىموۆا (69 كيلو), فاريزا شولتاي (81 كيلو) جانە ءلاززات كۇنگەيباەۆا (+81 كيلو).
جالپى كوماندالىق ەسەپ (ەرلەر)
|
ورىن |
مەملەكەت |
التىن |
كۇمىس |
قولا |
بارلىعى |
|
1. |
وزبەكستان |
4 |
1 |
1 |
6 |
|
2. |
قازاقستان |
2 |
2 |
3 |
7 |
|
3. |
ءۇندىستان |
1 |
3 |
3 |
7 |
|
4. |
وڭتۇستىك كورەيا |
1 |
1 |
– |
2 |
|
5. |
موڭعوليا |
1 |
– |
3 |
4 |
|
6. |
تاجىكستان |
1 |
– |
– |
1 |
|
7-9 |
يوردانيا |
– |
1 |
1 |
2 |
|
7-9 |
جاپونيا |
– |
1 |
1 |
2 |
|
7-9 |
فيليپپين |
– |
1 |
1 |
2 |
|
10-11 |
قىرعىزستان |
– |
– |
2 |
2 |
|
10-11 |
قىتاي |
– |
– |
2 |
2 |
|
12-14 |
تۇركىمەنستان |
– |
– |
1 |
1 |
|
12-14 |
يران |
– |
– |
1 |
1 |
|
12-14 |
سيريا |
– |
– |
1 |
1 |
