ايماقتار • 26 ءساۋىر، 2019

عابيدوللا ءابدىراحىموۆ ءدارىس وقىدى

پرەزيدەنت جانىنداعى مەملەكەتتىك باسقارۋ اكادەمياسىنىڭ قۇرىلعانىنا 25 جىل تولۋىنا وراي شىمكەنتتە «25 قوناق ءدارىس» جوباسىنىڭ تۇساۋى كەسىلدى. جاڭا باستالعان جوبانىڭ العاشقى قوناعى رەتىندە شىمكەنت قالاسىنىڭ اكىمى عابيدوللا ءابدىراحىموۆ مەملەكەتتىك قىزمەتكەرلەرگە «كوشباسشى بولۋ ءۇشىن قانداي قاسيەتتەر قاجەت؟» دەگەن تاقىرىپتا ءدارىس وقىدى.

نۇرشات توكەن

«پروفەسسور نەمەسە عالىم ەمەسپىن. بىراق جىلدار بويى ۇستازدارىم، باسشىلارىمنان العان ومىرلىك ساباعىم، مەملەكەتتىك قىزمەتتە جيناعان تاجىريبەلەرىممەن بولىسكىم كەلەدى. كوشباسشى بولاتىن تۇلعانىڭ بويىندا ءتارتىپ، ءوزىن باقىلاۋدا ۇستاۋ، ەڭبەكقورلىق، باتىلدىق، وپتيميست، جاڭالىقتان قورىقپاۋ، سەنىمدىلىك، قول استىنداعى قىزمەتكەرلەرىنە اشىق تا ءادىل بولاتىن قاسيەتى بولۋى قاجەت. سوندا عانا تۇلعا بولاتىن ازاماتتىڭ ماقساتى ايقىن، جۇمىسى العا جىلجيدى. اسانباي اسقاروۆ سەكىلدى كورەگەن باسشىلاردىڭ ەڭبەگىنىڭ ناتيجەسىندە قالامىزدا زووباق، دەندروساياباق سەكىلدى ءىرى نىساندار سالىنىپ، اتى تاريحتا قالعانىن ەسكە العان اكىم «قالادا قازىر سالىنىپ جاتقان شىمكەنت سيتي – كوزسىز باتىل شەشىمنىڭ ناتيجەسىندە دۇنيەگە كەلگەن جوبا. ال ونى العاش تانىستىرعاندا كەيبىر ازاماتتار تۇسىنبەگەن ەدى. ءۇش جىلدا شىمكەنت قالاسى مۇلدە وزگەرەدى. ستاديون، تەمىرجول ۆوكزالى، جاڭا شاعىناۋداندار، قارجى ورتالىعى سالىنىپ، قوشقار اتا وزەنى جاڭا كەيىپكە ەنەدى. سول كەزدە شىمشاھاردان ەشكىم كەتكىسى كەلمەيدى. ادال قىزمەت ەتە وتىرىپ، قالانى دامۋىنا بىرلەسە اتسالىسايىق»، دەدى عابيدوللا راحماتوللا ۇلى.

جاڭا فورماتتاعى دارىسكە قايتا دايارلاۋ كۋرسىنان ءوتىپ جاتقان باسشى لاۋازىمعا العاش دايىندالعان 45 مەملەكەتتىك قىزمەتشى، ونىڭ ىشىندە، وبلىستىق 34، قالالىق 11 مەكەمەنىڭ قىزمەتشىلەرى قاتىستى.

كەزدەسۋدە ءتورت ءتىلدى جەتىك بىلەتىن شاھار باسشىسى مەملەكەتتىك باسقارۋ ىستەرى جونىندەگى اگەنتتىكتە باس مامان قىزمەتىنەن باستاعان ەڭبەك جولىنان ءۇشىنشى مەگاپوليستى باسقارعان ساتىلارىنا دەيىنگى تاجىريبەسىمەن ءبولىستى.

«ءبىلىمدى بولۋ – ۇلكەن قارۋ. سوندىقتان مەملەكەتتىك قىزمەتشىلەر ءاردايىم ءوزىن دامىتىپ، جەتىلدىرىپ وتىرعاندا عانا جەتىستىكتى باعىندىرا الادى. سونداي-اق، مەملەكەتتىك قىزمەتكەرلەر العان ءبىلىمى مەن جيناعان تاجىريبەسىن حالىققا ادال قىزمەت ەتۋگە جۇمساۋى قاجەت»، دەدى قالا اكىمى.

قازىرگى تاڭدا شىمكەنتتەگى 53 مەملەكەتتىك ورگاندا 2078 مەملەكەتتىك قىزمەتكەر جۇمىس ىستەيدى. ايتا كەتەرلىگى، ەلباسىنىڭ تىكەلەي تاپسىرماسىمەن ەلىمىزدەگى مەملەكەتتىك قىزمەتشىلەردىڭ ايلىق جالاقىسى ءوستى.