ايماقتار • 25 ءساۋىر، 2019

ورالدان شىققان وتىزىنشى كەمە

767 رەت كورسەتىلدى

ورال قالاسىنداعى «زەنيت» زاۋىتىنىڭ كونۆەيەرىنەن شىققان تاعى ءبىر جاڭا كەمە سالتاناتتى جاعدايدا سۋعا ءتۇسىرىلدى. بۇل ەلىمىزدىڭ سۋداعى شەكاراسىن قورعاۋ ءۇشىن قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ تاپسىرىسىمەن جاسالعان وتىزىنشى كەمە.

جىل سايىن كوكتەمدە، جايىق پەن شاعان وزەندەرىنىڭ ارناسى تولىق كەزىندە «زەنيت» زاۋىتىنان شىققان جاڭا كەمەنىڭ سۋعا ءتۇسىرىلىپ، جايىقتى بويلاپ كاسپيگە اتتاناتىنى ورالدىقتار ءۇشىن ءداستۇرلى كورىنىسكە اينالعان.

باتىس قازاقستان وبلىسىنىڭ اكىمى التاي كولگىنوۆ جاڭا كەمەنىڭ تۇساۋكەسەرى تۋرالى 1 ساۋىردە حابارلاعان بولاتىن. «وتانىمىزدىڭ كەمە شىعاراتىن زەنيت زاۋىتى كەزەكتى اسكەري كەمەنى سۋعا تۇسىرۋگە دايىندالۋدا. زاۋىتتى مودەرنيزاتسيالاۋ مەن ديۆەرسيفيكاتسيا ماسەلەسى كۇن تارتىبىندە» دەگەن ەدى ءوڭىر باسشىسى ءوزىنىڭ تۋيتتەر پاراعىندا.

جوبا بويىنشا «بارىس» دەپ اتالعان 0300 ماركالى كەمەنىڭ بۇعان دەيىن 5 داناسى شىققان ەكەن. ەڭ العاشقىسى 2006 جىلى تاپسىرىلىپ، «ساردار» دەگەن ات العان. بۇگىنگى كەمەگە «نۇر-سۇلتان»دەگەن ات بەرىلىپتى.

- بۇگىن ەلىمىزدىڭ ۇلكەن مەيرامى – بىرلىك مەرەكەسى قارساڭىندا «نۇر-سۇلتان» اسكەري كەمەسى سۋعا ءتۇسىرىلدى. زاماناۋي جاۋىنگەرلىك كەمە ەلىمىزدىڭ تەڭىز شەكاراسىن كۇزەتۋگە كىرىسەدى. اسكەري كەمە ءوندىرىسى – مەملەكەتىمىزدىڭ دامۋ دەڭگەيىن كورسەتەدى. مەملەكەتتىڭ قولداۋىمەن قۇراستىرىلعان بۇل كەمە ورالدىق «زەنيت» زاۋىتىنىڭ 30-شى ءونىمى بولدى. ءوڭىر تۇرعىندارى اتىنان جاۋىنگەرلىك كەمەنىڭ ومىرگە كەلۋىنە اتسالىسقان «زەنيت» زاۋىتىنىڭ جۇمىسشىلارىنا العىسىمدى بىلدىرەمىن. اسكەري كەمە اشىق اسپان استىندا وتانىمىزدىڭ تىنىشتىعىن كۇزەتە بەرسىن!- دەدى التاي كولگىنوۆ شاعان وزەنىندەگى كەمە ءتۇسىرۋ ايلاعىندا وتكەن سالتاناتتى جيىندا.

قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ ديرەكتورى، ۇقك توراعاسىنىڭ ورىنباسارى، گەنەرال-مايور دارحان ءدىلمانوۆتىڭ ايتۋىنشا، ورالدىق كەمەلەردى رەسەي فەدەراتسياسى، يران، ءازىربايجان تەڭىز ماماندارى دا جوعارى باعالايدى ەكەن.

بۇگىنگى سالتاناتتى شارادا «زەنيت» زاۋىتىنىڭ ديرەكتورى ۆياچەسلاۆ ۆاليەۆ «شەكارانى ۇزدىك كۇزەتكەنى ءۇشىن» مەدالىمەن ماراپاتتالدى. ال زاۋىتتىڭ باس تەحنولوگى تيمۋر ترايسوۆ پەن №6 تسەح باستىعىنىڭ ورىنباسارى نيكولاي حامكو ءىى دارەجەلى «شەكارا قىزمەتىنىڭ ۇزدىگى» توسبەلگىسىنە يە بولدى.

«بارىس» كەمەلەرى كاسپي تەڭىزىندە مەملەكەتتىك شەكارانى قورعاپ، كونتراباندالىق ارەكەتتەردى، تەڭىز قاراقشىلارىن، زاڭسىز بالىق اۋلاۋشىلاردى قۇرىقتاۋعا ارنالعان. اسىرەسە بوگدە جۇزۋشىلەردى جالعىز ءوزى دە، ارىپتەستەرىمەن بىرلەسىپ تە قۋىپ جەتىپ، ۇستاي الادى. اسكەري كەمەنىڭ الەۋەتى جازىلعان انىقتاماعا قاراعاندا، ءتىپتى سۋاستى ديۆەرسانتتارىمەن دە كۇرەسە الادى ەكەن. كەمە قۇقىقبۇزۋشىلاردى جەدەل قۇرىقتاۋ ءۇشىن قوسىمشا ءجۇزۋ قۇرالىمەن جابدىقتالعان. جاڭا كەمەنىڭ باسقارۋ جۇيەسى، بايلانىس قۇرالدارى، ناۆيگاتسيا، شتۋرمان قوندىرعىلارى تالاپقا ساي. كەمەدە ورناتىلعان قۇرىلعى تاۋلىگىنە 4 توننا تەڭىز سۋىن تۇششىتا الادى.

ايتا كەتەيىك، «ورال زەنيت زاۋىتى» اق «قازاقستان ينجينيرينگ» ۇلتتىق كومپانياسى» اق قۇرىلىمىنا كىرەتىن كاسىپورىن.

جاڭادان جاسالعان ءار كەمەگە جەكە اتاۋ بەرۋ – بۇرىننان قالىپتاسقان ءداستۇر. بۇعان دەيىن «زەنيت» زاۋىتىنان شىققان، كاسپي تەڭىزىنە قىزمەتكە جىبەرىلگەن كەمەلەر مەن كاتەرلەرگە «استانا»، «ورال»، «الماتى»، «تاراز»، «اقتاۋ»، «اتىراۋ»، «وسكەمەن»، «قاراعاندى»، ««ەگەمەن»، قازاقستان»، «سارىارقا»، «ماڭعىستاۋ»، «سارباز»، «نۇرلى جول»، «قالقان»، «سەمسەر»، «جەڭىس»، «نايزا»، «ساقشى»، «ساردار» سىندى اتاۋلار بەرىلگەن.

سوڭعى جاڭالىقتار

ۇقساس جاڭالىقتار