جاقىندا حالىقارالىق بوكس قاۋىمداستىعىنىڭ ارنايى كوميسسياسى قازاقستان بوكس فەدەراتسياسىنىڭ وكىلى تۋرالى سۇراقتى قاراعانى بەلگىلى بولدى. كوميسسيا مالىمەتىنشە, بەكجان بەكتەنوۆ وزگە ۇلتتىق فەدەراتسيا باسشىلارىمەن كەزدەسىپ, ولاردى وليمپياداعا ىرىكتەۋ ءتۋرنيرىن باسقاراتىن «جاڭا ۇيىم قۇرۋعا» ۇگىتتەۋگە تىرىسقان. ۇيىمنىڭ رەسمي aiba.org سايتىندا بۇل ماسەلەنىڭ قاتاڭ باقىلاۋعا الىنىپ, بەكتەنوۆتى «ءاىۆا مۇشەلىگىنەن» شەتتەتۋگە قاتىستى تارتىپتىك كوميسسياعا ۇسىنىس جىبەرىلگەنى جازىلعان.
- مەن تۋرالى ماسەلەنىڭ مەنىڭ قاتىسۋىمسىز ءوتىپ جاتقانى تاڭعالدىرادى. مەن قانداي دا ءبىر تۇسىنىكتەمە بەرۋ مۇمكىندىگىنەن ايىرىلىپ وتىرمىن. ءاىۆا تاراپىنان بۇعان قاتىستى قانداي دا ءبىر حابارلاما نەمەسە ەسكەرتۋ العان ەمەسپىن. سونداي-اق, مەن «ءاىۆا مۇشەسى» ەمەسىن, سوندىقتان, زاڭدى تۇرعىدان مەنى شەتتەتۋ مۇمكىن ەمەس.
وزگە ۇلتتىق فەدەراتسيالارداعى ارىپتەستەرىممەن كەزدەسىپ, كەڭەس وتكىزگەنىم راس. بۇل بوكس فەدەراتسياسىنىڭ ديرەكتورى رەتىندەگى مەنىڭ جۇمىسىمنىڭ ءبىر بولىگى. اتالعان جيىندار, حات الماسۋلار, سونداي-اق, ءتۇرلى سۇراقتارعا قاتىستى پىكىرتالاس جۇرگىزۋ ۇنەمى جۇزەگە اسىپ تۇرادى جانە بۇل ۇيىم قاۋلىسىنا قارسى كەلمەيدى.
ەگەر ءاىۆا ءاربىر كەزدەسۋ مەن تەلەفون قوڭىراۋلارىن باقىلاۋعا مۇددەلى بولسا, مۇنىڭ دەموكراتيا قاعيدالارىنا قارسى ەكەنىن ەسكەرتكىم كەلەدى. مۇنداي جاعدايدا ۇلتتىق فەدەراتسيالاردىڭ قاجەتى جوق, بارلىق پروتسەستى ءبىر عانا شتاب-پاتەردىڭ باسقارۋىنا بولادى.
ال بوكستاعى جالپى جاعدايدى وزدەرىڭىز بىلەسىزدەر. ءبىزدىڭ وليمپيادا باعدارلاماسىنان سىرت قالۋ قاۋپىمىز جوعارى. حوك پەن ءاىۆا اراسىنداعى قارىم-قاتىناسقا الاڭداۋلىمىز. الەمدەگى بارلىق بوكسشىلار سەكىلدى, ءبىز بوكستىڭ وليمپيادا باعدارلاماسىندا قالۋىنا بار جاعدايدى جاسايمىز. قازىر بيلىك ءۇشىن قانداي دا ءبىر ويىن ويناۋدىڭ قاجەتى جوق. بارلىق كۇش-قۋاتىمىز بوكستى توكيوداعى وليمپيادا ويىندارىندا ساقتاپ قالۋعا باعىتتالۋ كەرەك, - دەدى بەكتەنوۆ.
