رەسمي مالىمەتتەر بويىنشا, ەلىمىزدە جىل سايىن 5 ملن توننا شيكى ءسۇت ساۋىلادى. ءسۇت وڭدەۋ ونەركاسىبى قايتا وڭدەۋگە شامامەن 1,5 ملن توننا شيكى ءسۇت قابىلداسا, بۇل كورسەتكىش قايتا وڭدەۋ زاۋىتتارىن شيكىزاتپەن قامتاماسىز ەتۋگە جەتكىلىكتى. قسو دەرەكتەرى بويىنشا, قازىرگى ۋاقىتتا قايتا وڭدەۋگە تۇسەتىن ءسۇتتىڭ شامامەن 50%-ى (700 مىڭ تونناعا جۋىق) كو تر تالاپتارىنا ساي كەلمەيدى. تيىسىنشە, 2020 جىلدىڭ قاڭتارىنان باستاپ قازاقستان زاۋىتتارى بۇل شيكىزاتتى وندىرىسكە قابىلداي المايدى. 2020 جىلدىڭ 1 قاڭتارىندا تەحنيكالىق رەگلامەنتتەردى (كو تر 021 «تاماق ونىمدەرىنىڭ قاۋىپسىزدىگى تۋرالى» جانە 033 «ءسۇت جانە ءسۇت ونىمدەرىنىڭ قاۋىپسىزدىگى تۋرالى») ەنگىزۋ بويىنشا كەدەن وداعىندا قازاقستانعا ۇسىنىلعان كەيىنگە قالدىرۋدىڭ مەرزىمى اياقتالادى. ولاردىڭ تالاپتارىنا سايكەس قايتا وڭدەۋگە تۇسەتىن ءسۇت شيكىزاتى قاۋىپسىزدىك بويىنشا بەلگىلى ءبىر پارامەترلەرگە سايكەس بولۋى شارت.
قازاقستان ءسۇت وداعىنىڭ اتقارۋشى ديرەكتورى ۆلاديمير كوجەۆنيكوۆتىڭ ايتۋىنشا, رەگلامەنت كۇشىنە ەنگەنگە دەيىن جارتى جىلدان ءسال ارتىق ۋاقىت قالدى,الايدا مەملەكەتتىك ورگاندار تاراپىنان دا, ءسۇت سالاسىنىڭ كاسىپورىندارى تاراپىنان دا بەلسەندى قاتىسۋدى تالاپ ەتەتىن بىرقاتار ماڭىزدى ماسەلەلەر ءالى كۇنگە دەيىن بار. قازاقستاننىڭ الدىندا ءسۇت شيكىزاتى مەن وسى سالانىڭ ونىمدەرىن كو تر-نە سايكەس كەلتىرۋ مىندەتى تۇر. قازاقستاندىق ءسۇت نارىعىن كەدەن وداعىنىڭ وزگەرىسكە بەيىم كاسىپورىندارىنىڭ باسىمدىعى الاڭداتىپ وتىر.
مامانداردىڭ ايتۋىنشا, بۇدان ءسۇت وڭدەۋشىلەر عانا ەمەس, مالشىلار دا زارداپ شەگەدى. FAO ينۆەستيتسيالىق ورتالىعىنىڭ ەكونوميسى يننا پۋندانىڭ ايتۋىنشا, ءسۇت اۋىل تۇرعىندارى ءۇشىن تابىستىڭ كوزى. وتكەن جىلعى مالىمەتتەر بويىنشا, قايتا وڭدەۋگە قابىلدانعان ءاربىر ەكىنشى ليتر ءسۇت جەكە قوسالقى شارۋاشىلىقتارعا تيەسىلى. ء سۇت قاۋىپسىزدىگىنىڭ بىرقاتار كورسەتكىشتەرى بويىنشا كەدەن وداعىنىڭ تەحنيكالىق رەگلامەنتىنىڭ تالاپتارىنا سايكەس كەلمەۋى ولاردى ءسۇت جەتكىزۋ تىزبەگىنەن الىنۋى مۇمكىن. مۇنداي احۋال اۋىلدى تابىس كوزىنەن ايىرۋعا قايتا وڭدەۋشىلەر ءۇشىن شيكىزاتتىڭ جەتىسپەۋىنە سوقتىرادى. رەگلامەنت تالاپتارىنا كەزەڭ-كەزەڭمەن كوشۋدىڭ ازىرلەنگەن جول كارتاسى سالانىڭ ينكليۋزيۆتىك دامۋىنا ىقپال ەتەدى.
