قازىرگى كەزدە زاۋىتتى سالۋ ءۇشىن يندۋستريالىق ايماقتان تولىققاندى ينفراقۇرىلىمى بار 25 گەكتار جەر تەلىمى بولىنگەن. زاۋىت قۇرىلىسىنا 25 ملرد تەڭگە ينۆەستيتسيالانىپ, جەتى ءجۇزگە جۋىق جاڭا جۇمىس ورىندارىن اشۋ كوزدەلىپ وتىر. بۇل باعىتتا قاراستىرىلعان قارجى كولەمى 32,5 ملن تەڭگەنى قۇرايدى. زاۋىتتى سالۋعا جەكە قاراجاتپەن قاتار قازاقستان دامۋ بانكىنەن دە قوسىمشا قارجى كوزدەرى قاراستىرىلۋدا. العاشقى اۆتوموبيلدى شىعارۋ 2020 جىلعا قاراي جوسپارلانىپ وتىر.
كورەيادان كەلگەن دەلەگاتسياعا جىلى ءىلتيپاتىن ءبىلدىرىپ, وڭتۇستىك استانانىڭ ينۆەستيتسيالىق احۋالىنا قاتىستى بىرقاتار مالىمەتتەرمەن تانىستىرعان الماتى اكىمى باۋىرجان بايبەك وتكەن جىلى قالا ەكونوميكاسىنا سالىنعان ينۆەستيتسيا كولەمى 10,5, ال بيىل قاڭتار-ناۋرىز ايلارىندا 4,8 پايىزعا ارتقانىن جەتكىزدى. ونىڭ ىشىندە شەتەلدىك ينۆەستيتسيا كولەمى 21,4 پايىزعا ارتىپ, 111,1 ملرد تەڭگەگە ۇلعايعان. ال سوڭعى ون جىلدا وڭتۇستىك كورەيادان قازاقستانعا سالىنعان ينۆەستيتسيا كولەمى 3,8 ملرد اقش دوللارىن قۇرايدى. وڭتۇستىك كورەيامەن اراداعى تاۋار اينالىمى 182 ملن اقش دوللارىنا جەتسە, ءبىر عانا الماتى قالاسىندا 61 ءبىرلەسكەن كاسىپورىن جۇمىس ءىستەيدى.
بۇگىندە ايماقتا بيزنەسكە قولايلى جاعداي تۋعىزۋ ماقساتىندا قاجەتتى ينفراقۇرىلىم جاساقتالعان. وسىنىڭ نەگىزىندە قۇرىلعان يندۋستريالىق ايماقتا قۇنى 144 ملرد تەڭگە كولەمىندە 39 جوبا جۇزەگە اسۋدا, ونىڭ ىشىندە Hyundai Trans Kazakhstan بار. بۇگىندە بەس كاسىپورىن بەلسەندى بولسا, ونىڭ ىشىندە جاپونيانىڭ «Tokyo Rope Almaty» مەتالل بۇيىمدار زاۋىتى, رەسەيدىڭ كابەل ونىمدەرىن شىعاراتىن «KMK Investment» زاۋىتى جانە «BRB APK» جىلىجاي كەشەنى بار. اتالعان كومپانيالار تاراپىنان 600 ملن تەڭگە كولەمىندە سالىق تولەنىپ, 800-دەن استام جۇمىس ورنى اشىلعان.
ەكى ەلدىڭ ەكونوميكالىق سالاداعى ىقپالداستىعىنا توقتالعان وڭتۇستىك كورەيا ساۋدا, ونەركاسىپ جانە ەنەرگەتيكا مينيسترى سون يۋن مو كولىك زاۋىتىن سالۋعا بايلانىستى كەلىسىمشارتتىڭ العاشقى كەلىسسوزدەرى ناۋرىز ايىندا سەۋل قالاسىندا وتكەن ەكونوميكالىق ماسەلەلەر بويىنشا قازاقستان – كورەيا كوميتەتىنىڭ وتىرىسىندا تالقىلانعانىن جەتكىزدى. بۇگىندە كورەيا الەمدىك نارىقتا اۆتوكولىك قانا ەمەس, جارتىلاي دايىن ونىمدەر, اقپاراتتىق-كوممۋنيكاتسيالىق تەحنولوگيالار جانە روبوتتەحنيكا سالاسىندا دا كوشباسشى ورىنداردى يەلەنىپ كەلەدى. ەندىگى كەزەكتە قازاقستان اۋماعىندا سالىنعان زاۋىت ونىمدەرى ىشكى نارىقتا عانا ەمەس, رەسەي, وزبەكستان مەن وزگە دە ەلدەرگە ەكسپورتتالاتىن بولادى. كورەيا ۇزاق جىلداردا جيناعان ءتاجىريبەسىمەن ءبولىسىپ, قازاقستاننىڭ ونەركاسىپ سالاسىنداعى سەنىمدى ارىپتەسىنە اينالماق.
Astana Group پرەزيدەنتى نۇرلان سماعۇلوۆ جاڭا زاۋىت ىرگەسىنىڭ قالانۋى ەلىمىزدىڭ اۆتوكولىك ءوندىرىسى ءۇشىن ايتۋلى وقيعا ەكەنىن اتاپ ءوتتى. Hyundai وتاندىق ماشينا شىعارۋ نارىعىنا جاڭا تەحنولوگيالىق مۇمكىندىك بەرە وتىرىپ, بۇرىنعىلارىنا مۇلدەم ۇقسامايتىن زاماناۋي ۇلگىلەرىمەن ەرەكشەلەنەدى. ءارى تاياۋ بولاشاقتا ەۋرازيالىق ەكونوميكالىق وداق ەلدەرىنە جوعارى ساپالى ءونىم ەكسپورتتاۋ مۇمكىندىگى جاسالادى. ال ماشينا جاساۋ سالاسىنداعى مامان ماسەلەسى رەسەيمەن كەلىسىم اياسىندا جۇزەگە اساتىن بولادى.
بۇگىندە اتالعان كومپانيا ەلىمىزدىڭ نارىعىنا 11 اۆتوموبيل برەندىن ۇسىنىپ وتىر ءارى Hyundai جەڭىل جانە كوممەرتسيالىق تەحنيكاسىنىڭ رەسمي ديستريبيۋتورى. 2011 جىلدان Hyundai كوممەرتسيالىق تەحنيكاسىن قۇراستىراتىن اۆتوموبيل قۇراستىرۋ كاسىپورنى ىسكە قوسىلىپ, رەسەيگە, بەلارۋس جانە تاجىكستان ەلدەرىنە ەكسپورتتالا باستادى. قازاقستانداعى Hyundai ەڭ كوپ ساتىلاتىن اۆتوموبيلدەردىڭ ۇشتىگىنە كىرەدى.
