8 بەن 12 جاس ارالىعىنداعى جاس ورەندەر اراسىندا تالانتتىلاردى انىقتاۋ ماقساتىمەن ۇيىمداستىرىلعان كاستينگ بۇعان دەيىن ون وڭىردە مارەگە جەتىپ, ەڭ ۇزدىكتەرى اقتىق سايىسقا جولداما الىپتى. «قاتاڭ تالاپتان ىركىلمەي وتكەن بالدىرعاندار سۋپەر فينالدا ونەر كورسەتەدى. ودان باعى جانعانى مۋزىكالىق وقۋ ورنىنا ارنالعان ءبىلىم گرانتىمەن قوسا ديسنەيلەند ەرتەگىلەر ەلىنە ساياحات جاساۋ باقىتىنا يە بولادى», دەيدى بايقاۋدىڭ مەنەدجەرى تولعاناي حاسەن.
قازىلار القاسىنىڭ مۇشەلەرى باعىن سىناۋعا كەلگەن جاس بالعىندارعا كاستينگتىڭ ەرەجەلەرى مەن شارتتارىن تۇسىندىرگەننەن كەيىن تالاپكەرلەر ءۇش تىلدە اۋەلەتە ءان شىرقاپ, ءان ايتۋ شەبەرلىكتەرىن, قارىم-قابىلەتتەرىن كورسەتۋگە ۇمتىلدى.
مادەنيەت جانە سپورت مينيسترلىگى جانە قازاقستان رەسپۋبليكاسىنىڭ ءبىرىنشى پرەزيدەنتى-ەلباسى قورىنىڭ قولداۋىمەن «جاندانۋ الەمى» قورى ۇيىمداستىرعان وڭىرلىك ءان بايقاۋى جاس تالانتتاردىڭ شىعارماشىلىق قابىلەت-قارىمىن تانىتۋعا جان-جاقتى مۇمكىندىكتەر بەردى. پەتروپاۆل قالاسىنداعى № 2 مەكتەپتىڭ وقۋشىسى دانا باسكەنوۆا ىرىكتەۋ كەزەڭىنىڭ جەڭىمپازى بولىپ تانىلدى. ول ەندى الماتىدا وتەتىن اقتىق سايىستا وبلىس نامىسىن قورعايتىن بولادى.
سولتۇستىك قازاقستان وبلىسى
