«UMC» كورپوراتيۆتىك قورى مەن كورەيانىڭ دەنساۋلىق ساقتاۋ يندۋسترياسىن دامىتۋ ينستيتۋتىنىڭ (KHIDI) ىنتىماقتاستىعى شەڭبەرىندە وتكەن باسقوسۋدا ەكى ەل ونكولوگتارى قازاقستان مەن كورەيانىڭ ونكولوگيالىق اۋرۋلارمەن كۇرەسىنىڭ جالپى ساياساتى, پروتوندى تەراپيانىڭ قازىرگى زامانعى ءادىس-تاسىلدەرى, ءسۇت بەزى وبىرىن ەرتە كەزەڭدە انىقتاۋ, لاپاروسكوپيالىق حيرۋرگيا سياقتى ت.ب. سالاداعى وزگە دە وزەكتى ماسەلەلەرىن تالقىلادى.
سيمپوزيۋم جۇمىسىن اشقان «UMC» كورپوراتيۆتىك قورىنىڭ باسقارما توراعاسى ج.ءجۇمادىلوۆ مۇنداي ءىس-شارالار ءوزارا تاجىريبە الماسۋعا, قاتەرلى ىسىك اۋرۋلارىمەن كۇرەستە كۇش بىرىكتىرۋگە مۇمكىندىك بەرەتىنىن اتاپ كورسەتتى.
كورەيانىڭ ۇلتتىق ونكولوگيالىق ورتالىعىنىڭ پرەزيدەنتى لي ىن سۋك قاتىسۋشىلاردىڭ نازارىنا ورتالىق قىزمەتى مەن ونىڭ دامۋ كەزەڭدەرى, كورسەتىلەتىن قىزمەت تۇرلەرى جونىندە بايانداما ۇسىنىپ, ءسۇت بەزى وبىرىن ەرتە انىقتاۋ, لاپاروسكوپيالىق حيرۋرگيا ادىستەرى تۋرالى تاجىريبەلەرىمەن ءبولىستى. «كورەيا رەسپۋبليكاسىنداعى ونكولوگيالىق قىزمەتتى ۇيىمداستىرۋ جوسپارى 1995 جىلى العاش رەت ازىرلەنىپ, قولدانىسقا ەنگىزىلدى. 2001 جىلى وسى جوسپارعا سايكەس ۇلتتىق ونكولوگيا ورتالىعى اشىلدى. العاشىندا ونكولوگياعا شالدىققان پاتسيەنتتەردىڭ 5 جىلدىق ءومىر ءسۇرۋ قابىلەتى 40% دەڭگەيىندە ەدى. 2016 جىلدىڭ قورىتىندىسى بويىنشا بۇل كورسەتكىش 71%-عا دەيىن ارتتى. بۇعان ونكوپاتسيەنتتەردى جوعارى دالدىكپەن دەر كەزىندە تىركەۋ دە سەبەپ بولىپ وتىر. بۇل بارشا حالىقتىڭ 99%-ىن قامتيدى. وسىعان بايلانىستى رەسپۋبليكامىزدا نەگىزگى مالىمەتتەر بازاسى قۇرىلدى, بۇل عىلىمي-زەرتتەۋ جۇمىسىن جۇرگىزۋ جانە دارالانعان ءارى نىسالانعان تەراپياعا دايىنداۋ ءۇشىن دە ۇلكەن سەپتىگىن تيگىزدى. قازاقستاندا ونكولوگيالىق كومەك كورسەتۋ قىزمەتى ۇيىمداستىرىلۋدا, سونداي-اق پروتوندىق تەراپيانى ۇيىمداستىرۋ ماسەلەسىن قاراستىرۋدا. پروتوندىق تەراپيا باعىتىن ءبىز 2001 جىلى ازىرلەي باستادىق, 2007 جىلى پروتوندىق تەراپيا ورتالىعى اشىلدى», دەدى ول.
سونداي-اق باسقوسۋدا كورەيانىڭ ونكولوگيالىق ورتالىعىنىڭ قۇرىلىمدىق بولىمشەلەرىنىڭ جەتەكشىلەرى ونكولوگيالىق اۋرۋلاردى باقىلاۋدى كۇشەيتۋ, ءتۇرلى قاتەرلى ىسىك اۋرۋلارىن ەمدەۋدە پروتوندىق تەراپيانى پايدالانۋ بويىنشا تاجىريبەلەرىمەن ءبولىستى.
