سەزدى پارتيا توراعاسىنىڭ ءبىرىنشى ورىنباسارى ماۋلەن اشىمباەۆ اشىپ, جۇرگىزىپ وتىردى. ول سەزگە ايماقتىق پارتيا كونفەرەنتسيالارىندا سايلانعان دەلەگاتتار, پارلامەنت دەپۋتاتتارى, مەملەكەتتىك ورگانداردىڭ باسشىلارى, ۇەۇ مەن باق وكىلدەرى قاتىسىپ وتىرعانىن جاريالادى. سەزگە 630 دەلەگات سايلانعان بولسا, سونىڭ 623-ءى قاتىسىپ وتىرعانى دا حابارلاندى. ودان ءارى كۇن ءتارتىبى بەكىتىلىپ, سەزد ءوزىنىڭ جۇمىسىن باستاپ كەتتى.
ءسوز كەزەگى الدىمەن پارتيا توراعاسى, ەلباسى نۇرسۇلتان نازارباەۆقا بەرىلدى. ءوزىنىڭ سوزىندە ەلباسى قازاقستان جاڭا كەزەڭگە قادام باسىپ وتىرعانىن ايتا كەلىپ, «19 ناۋرىزدا مەن پرەزيدەنتتىك وكىلەتتىگىمدى توقتاتتىم. ەلىمىزدىڭ جارقىن بولاشاعى ءۇشىن ويلانىپ, تولعانىپ, وسىنداي وڭاي ەمەس شەشىم قابىلدادىم. مەملەكەتتى باسقارۋعا باسشىلاردىڭ جاڭا بۋىنى كەلەتىن زامان بولدى. ۋاقىت سولاي, ءومىر سولاي. بۇل ءىس قازاقستاننىڭ ابىرويىن ارتتىرىپ, بەدەلىن بيىكتەتە تۇسەدى دەپ سەنەمىن. ءبىزدىڭ قازىرگى شەشىمىمىز سوعان قولداۋ كورسەتىپ, جاعداي جاسايتىن بولادى», دەدى.
ودان ءارى ەلباسى اۋىر داعدارىس جاعدايىندا باستالعان تاۋەلسىز قازاقستاندى قالىپتاستىرۋ جولى وڭاي بولماعانىن ەسكە سالدى.
نۇرسۇلتان نازارباەۆ دەنساۋلىق ساقتاۋ ءىسى مەن مادەنيەت سالاسىنداعى جەتىستىكتەرگە دە توقتالدى.
– ماعان ءوز حالقىممەن بىرگە تاۋەلسىز قازاقستاندى قۇرۋ مارتەبەسى بۇيىرعانىن ماقتان تۇتامىن. قيىن زامانعا قاراماستان حالقىم مەنىڭ باستامالارىما ءاردايىم قولداۋ كورسەتتى. سونىڭ ارقاسىندا ءبىز بارلىق ناتيجەگە قول جەتكىزدىك. مەن ەلىمىزدىڭ حالقىنا ريزاشىلىعىمدى ءبىلدىرەمىن, – دەدى قازاقستاننىڭ تۇڭعىش پرەزيدەنتى.
– ءتورتىنشى ونەركاسىپتىك رەۆوليۋتسيا تالاپتارىنا سايكەس ەلىمىزدى تەحنولوگيالىق جانە ينفراقۇرىلىمدىق تۇرعىدان دامىتۋدىڭ جاڭا كەزەڭىنە قادام باستىق. تسيفرلاندىرۋ جانە يننوۆاتسيانى ەنگىزۋ ەسەبىنەن ەڭبەك ونىمدىلىگى مەن ەكونوميكانىڭ باسەكەگە قابىلەتتىلىگى ارتتى. وسى اۋقىمدى جۇمىستاردىڭ ءبارى بۇكىل قازاقستاندىقتاردىڭ ءال-اۋقاتىن ارتتىرۋعا باعىتتالعان, – دەدى ەلباسى.
نۇرسۇلتان نازارباەۆ كونستيتۋتسيا بويىنشا وزىنە بەكىتىلگەن وكىلەتتىلىكتەرگە سايكەس وتانىمىزدى وركەندەتۋ ءۇشىن جۇمىس ىستەي بەرەتىنىن ايتتى.
– مەن توراعا بولىپ قالا بەرەتىن قازاقستان حالقى اسسامبلەياسى اياسىندا اتقاراتىن جۇمىستار كوپ. قوعامدىق كەلىسىم مەن ۇلتىمىزدىڭ بىرلىگىن نىعايتۋ ءۇشىن ءىسىمىزدى جالعاستىرا بەرەمىز. قاۋىپسىزدىك كەڭەسىن باسقارا وتىرىپ, مەن ءوزىمنىڭ كوپجىلدىق تاجىريبەمدى ىشكى ءجانە سىرتقى ساياساتتى انىقتاي وتىرىپ, ەلىمىزدى دامىتۋدىڭ بىرقاتار نەگىزگى ماسەلەلەرىن شەشۋگە باعىتتايمىن. مەن بۇرىنعىسىنشا ەڭ ءىرى Nur Otan ساياسي پارتياسىنىڭ توراعاسى بولىپ قالا بەرەمىن, – دەدى قازاقستاننىڭ تۇڭعىش پرەزيدەنتى.
ەلباسى نۇرسۇلتان نازارباەۆ تاڭداپ العان ساياسي جانە ەكونوميكالىق باعدار ساباقتاستىعىنىڭ ساقتالۋىنا پارتيا كەپىل بولۋعا جانە بەلگىلەنگەن ءمىندەتتەردىڭ ءبارىن جۇزەگە اسىرۋعا ءتيىس ەكەنىن ايتتى.
– جاڭعىرۋدىڭ تيىمدىلىگىن, سونىڭ ىشىندە پارتيانىڭ «باقىتتى وتباسى», «قۇتتى مەكەن», «اۋىل – ەل بەسىگى» جانە «حالىققا كومەك» جوبالارىن جۇزەگە اسىرۋ اياسىندا ءاربىر قازاقستاندىقتىڭ قامقورلىقتى سەزىنۋىنە قول جەتكىزۋىمىز كەرەك, – دەدى Nur Otan پارتياسىنىڭ توراعاسى.
قازاقستاننىڭ تۇڭعىش پرەزيدەنتى ەل ازاماتتارىنان ءوز اتىنا كوپتەگەن حاتتار كەلىپ جاتقانىن ايتىپ, قازاقستاندىقتاردىڭ دوستىعى مەن قۇقىقتارىنىڭ تەڭدىگى وزگەرمەيتىنىنە سەنىم ءبىلدىردى.
ودان ءارى نۇرسۇلتان نازارباەۆ قاسىم-جومارت توقاەۆتى ەلىمىزدەگى جوعارى لاۋازىمعا لايىقتى ۇمىتكەر رەتىندە اتاپ, ونىڭ وتان الدىنداعى سىڭىرگەن ەڭبەگى مەن جەتكەن جەتىستىكتەرىنە توقتالدى.
– قاسىم-جومارت توقاەۆ مەنىمەن بىرگە تاۋەلسىزدىكتىڭ العاشقى جىلدارىنان باستاپ قىزمەتتىڭ ءتۇرلى سالاسىندا جۇمىس ىستەدى. ول – ۇزاق جىلدار سىرتقى ىستەر مينيسترلىگىنە جەتەكشىلىك ەتىپ, قازاقستاننىڭ سىرتقى ساياساتىن بىرگە قالىپتاستىرۋعا اتسالىسقانداردىڭ ءبىرى. ونىڭ ديپلوماتيالىق دارەجەسى شەتەلدە جوعارى باعالانادى. قاسىم-جومارت توقاەۆتىڭ بۇۇ باس حاتشىسىنىڭ ورىنباسارى بولعانىن جانە تاجىريبەلى مەملەكەت ساياساتكەرى ەكەنىن جاقسى بىلەسىزدەر, – دەدى قازاقستاننىڭ تۇڭعىش پرەزيدەنتى.
سونداي-اق ەلباسى رەسپۋبليكالىق قوعامدىق سايلاۋ شتابىنىڭ جۇمىسىن ۇيلەستىرۋدى تاپسىرىپ, ازاماتتاردىڭ بارلىق ساناتىمەن جۇمىس جۇرگىزۋدىڭ قاجەتتىلىگىنە نازار اۋداردى.
ءسوزىنىڭ سوڭىندا ەلباسى قازىرگى جاعدايدا تۇراقتى دامىپ, ءوسىپ-وركەندەۋ ءۇشىن حالىقتىڭ بىرلىگى بەكەم بولۋى جانە بارشا قازاقستاندىقتاردىڭ بىرلەسە كۇش-جۇمىلدىرۋى قاجەت ەكەنىن اتاپ ءوتتى.
– ءبىز بۇل كەزەڭدى ەش قيىندىقسىز ەڭسەرەتىنىمىزگە سەنىمدىمىن. ءبىزدىڭ ماقساتىمىز – حالقىمىزدىڭ ءال-اۋقاتىن ارتتىرۋ جانە ەلىمىزدى ودان ءارى ىلگەرىلەتۋ. مەملەكەتكە قۇرمەت كورسەتۋ, ازاماتتاردىڭ ءبىر-ءبىرىن سىيلاۋى – تۇراقتىلىقتىڭ بەلگىسى, – دەدى نۇرسۇلتان نازارباەۆ.
پارتيا توراعاسى ءسوزىن اياقتاعان سوڭ سەزد جۇمىسىن جۇرگىزىپ وتىرعان ماۋلەن اشىمباەۆ ونىڭ ستراتەگيالىق ساياساتىنىڭ ساباقتاستىعىن جانە الدا قويىلعان ءمىندەتتەردى قامتاماسىز ەتۋ ءۇشىن بارلىق قاجەتتى ءىس-شارالار اتقارىلادى دەپ سەندىردى.
ودان ءارى كۇن تارتىبىندەگى ماسەلەنى تالقىلاۋ باستالدى. العاشقى بولىپ ءسوز العان مەملەكەت جانە قوعام قايراتكەرى ءادىل احمەتوۆ بۇگىنگى سەزدىڭ ەل تاريحىنىڭ تاعدىرشەشتى كەزەڭىنە ءدوپ كەلىپ تۇرعانىن ايتتى.
– وتكەن ايدىڭ 19-ى كۇنى تۇڭعىش پرەزيدەنتىمىزدىڭ حالقىمىزعا جۇرەكجاردى ۇندەۋى جاريالانىپ, ول پرەزيدەنتتىك بيلىگىن ءوز ەركىمەن توقتاتىپ, ەندىگى جەردە بيلىك تىزگىنىن اتا زاڭىمىزعا سايكەس, پارلامەنت سەناتىنىڭ توراعاسى قاسىم-جومارت كەمەل ۇلىنا ۇسىناتىنىن ءمالىمدەدى. ارينە, بۇل تاريحي شەشىمنىڭ وڭاي بولماعانىنا حالقىمىز تۇسىنىستىكپەن قولداۋ بىلدىرگەن بولاتىن. ەلباسىنىڭ تاعىلىمدى شەشىمى ەل ىشىندە عانا ەمەس, حالىقارالىق الاڭدا دا ۇلكەن رەزونانس تۋدىردى. الەمدىك اقپارات قۇرالدارىندا ىلە-شالا جارىق كورگەن ساياساتكەرلەردىڭ پىكىرلەرى ەلىمىزدەگى پرەزيدەنتتىك بيلىك الماسۋ ۇدەرىسىنىڭ كونستيتۋتسيالىق زاڭعا سايكەس ۇلاسقانىن اتاپ جاتتى. بۇل ەلىمىزدىڭ بولاشاق كوشباسشىلارىنا اۋاداي قاجەت ساياسي بيلىك ساباقتاستىعىنىڭ ەرەكشە ۇلگىسى بولدى. ەكىنشىدەن, ەلىمىزدىڭ ماڭدايىنا قونعان ەگەمەندىك جىلدارى قول جەتكەن بيىكتەردەن كوكجيەككە كوز جىبەرسەك, 1991 جىلى ءبىر ساتتە شاشىلىپ قالعان كەڭەس وكىمەتىنىڭ كۇيرەندىسىنەن قايتا تۇلەگەن قازاق ەلى بۇگىنگى تاڭدا سىندارلى ىشكى ساياسات پەن كوپۆەكتورلى سىرتقى ساياساتتىڭ ارقاسىندا مەملەكەتتىك بيلىك ينستيتۋتتارىن تولىق قالىپتاستىرىپ, ەكونوميكالىق دامۋدىڭ تۇراقتى جولىنا ءتۇستى. مادەني مۇرالارىمىزدى قايتا ءتىرىلتىپ, تالانتتى جاستارعا ءبىلىم ۇشتاۋعا ۇلكەن جول اشىپ بەردى.
ەلباسىنىڭ تىكەلەي باستاماسىمەن «بولاشاق» ستيپەندياسى اياسىندا 1993 جىلدان بەرى 10 مىڭنان استام قازاقستاندىق جاس مۇحيت اسىپ, شەتەلدىك ۋنيۆەرسيتەتتەردە ءبىلىم جەتىلدىرىپ, بۇل كۇندە ەل ەكونوميكاسىنىڭ دامۋىنا ءوز ۇلەستەرىن قوسۋدا. سونداي-اق ەل-جۇرتتىڭ دەنساۋلىعىن قۇنتتاۋعا باعىتتالعان وزىق مەديتسينالىق كلاستەرلەر دە جولعا قويىلدى. قارۋلى كۇشتەرىمىز كۇشەيىپ, ەل قاۋىپسىزدىگى نىعايتىلىپ, ەكونوميكانىڭ قوزعاۋشى كۇشى بولىپ تابىلاتىن قارجى ينستيتۋتتارى, ونىڭ ىشىندە زاماناۋي استانا حالىقارالىق قارجى ورتالىعى دا قۇرىلدى. تۇڭعىش پرەزيدەنتتىڭ تىكەلەي باستاماسىمەن ەلوردادا «ەكسپو-2017: بولاشاق ەنەرگياسى» ايدارىمەن وتكەن حالىقارالىق كورمە دە ەلىمىزدىڭ رۋحىن وياتىپ, دىتتەگەن ماقساتقا جەتتى.
وتكەن ايدا جاريالانعان تاريحي ءۇندەۋىندە ەلباسى قاسىم-جومارت توقاەۆتى بيلىك تىزگىنىن ۇستاۋعا ەڭ لايىقتى تۇلعا دەگەن ەدى. ەندى مىنە, بۇگىنگى سەزدە پرەزيدەنت سايلاۋىنا Nur Otan پارتياسىنىڭ اتىنان ۇسىنىلاتىن بىرەگەي كانديدات قاسىم-جومارت كەمەل ۇلى ەكەنىن ەلباسى تۇبەگەيلى ايشىقتادى. بۇل ۇسىنىستى سەزد دەلەگاتتارى عانا ەمەس, حالقىمىز دا, بۇۇ سەكىلدى ىرگەلى حالىقارالىق ۇيىمدار دا قولدايتىنى كۇمانسىز. ويتكەنى قاسىم-جومارت كەمەل ۇلىنىڭ وزىڭىزبەن شيرەك عاسىر ۇزەڭگىلەس بولا ءجۇرىپ, ەلىمىزدىڭ ىشكى-سىرتقى ساياساتىنا سىڭىرگەن سۇبەلى ەڭبەگى مەن ديپلوماتيالىق ارەناداعى سالماعىن الەم قاۋىمداستىعى دا وتە جاقسى بىلەدى, دەپ اتاپ ءوتتى ءا.احمەتوۆ. قاسىم-جومارت كەمەل ۇلى ەل بىرلىگى مەن تۇتاستىق تۋىن ءتۇزۋ ۇستاپ, قاسيەتتى دە قاستەرلى ەگەمەندىگىمىزدى كوزدىڭ قاراشىعىنداي ساقتاپ, ەلىمىزدىڭ حالىقارالىق ارەناداعى ابىروي-اتاعىن اسقاقتاتارىنا سەنىمدى ەكەنىن ايتتى.
كەلەسى ءسوز كەزەگى اتىراۋ وبلىسىنىڭ اكىمى, Nur Otan پارتياسى وبلىستىق فيليالىنىڭ توراعاسى نۇرلان نوعاەۆقا بەرىلدى.
– تاۋەلسىزدىگىمىزدىڭ تاڭى بوزارىپ اتقان 90-شى جىلدارى, بولاشاعىمىز ب ۇلىڭعىر بولدى, مەملەكەتىمىزدى دە, حالقىمىزدى دا دۇنيە ءجۇزىنىڭ كوبى بىلگەن جوق, – دەپ باستادى ول ءوزىنىڭ ءسوزىن.
– سول كەزدەرى ساياساتتا, ەكونوميكادا, الەۋمەتتىك سالادا تۇڭعىش پرەزيدەنتتىڭ قابىلداعان باتىل شەشىمدەرى ۋاقتىلى, دەر كەزىندە قابىلداعان شەشىم ەكەنىن بۇگىنگى كۇننىڭ بيىگىنەن تاريح دالەلدەپ وتىر. ىشكى جانە سىرتقى ساياساتتاعى ۇستانىمىنىڭ ارقاسىندا ەلباسىنا سەنگەن الەمدەگى Chevron, Exxonmobil, ENi, Total, Shell سەكىلدى الپاۋىت ينۆەستورلار ەلىمىزدىڭ ەكونوميكاسىنا اسا ءىرى كولەمدە ينۆەستيتسيالار قۇيدى. ەل ەكونوميكاسى قىسقا مەرزىمدە اياققا تۇرىپ, قارقىندى دامۋ جۇيەسىنە ءتۇسىپ, الەمدىك دەڭگەيدەگى ءىرى جوبالار ناتيجەلى جۇزەگە استى. قازىرگى تاڭدا, تورتكۇل ءدۇنيەنى قارجىلىق داعدارىس شارپىپ وتىرعان جاعدايدا, شەتەلدىك ينۆەستورلار ەلباسىنا سەنىپ, تاۋەلسىزدىگىمىزدىڭ مۇناي-گاز سەكتورىنداعى العاشقى قارلىعاشتارى – «تەڭىز», «قاراشىعاناق», «قاشاعان» جوبالارىن كەڭەيتۋدە. تەك «تەڭىز» جوباسىن كەڭەيتۋگە 37 ملرد دوللار ينۆەستيتسيا سالىنادى.
بىلتىر بۇرىن-سوڭدى بولماعان رەكوردتىق 90 ملن توننا مۇناي مەن گاز كوندەنساتى ءوندىرىلدى. ەلىمىز الەمدەگى ءىرى مۇناي ءوندىرۋشى مەملەكەتتەر قاتارىنا قوسىلدى. ءۇش مۇناي وڭدەۋ زاۋىتىنىڭ تەحنولوگيالىق جاڭعىرتىلۋى اياقتالىپ, حالىقارالىق ستاندارتقا ساي بەنزين مەن اۆياتسيالىق كەروسيننىڭ ءوندىرىسى ەلىمىزدىڭ ءوز قاجەتتىلىگىن تولىق قامتاماسىز ەتتى.
تۇڭعىش پرەزيدەنتتىڭ باسشىلىعىمەن ىسكە اسىپ جاتقان يندۋستريالاندىرۋ ساياساتىنىڭ بىرەگەي جوباسى – «اتىراۋ گاز-حيميا كەشەنىنە» وسى سالانىڭ كوشباسشىلارى – شەتەلدىك ينۆەستورلار 6,5 ملرد دوللار سالۋعا نيەتتى. «نۇرلى جول» باعدارلاماسى اياسىندا وڭىرلەردە ساپالى اۆتوموبيل جولدارىنىڭ قۇرىلىسى ءجۇرگىزىلۋدە, سونىڭ ءبىرى «اقتوبە-اتىراۋ-استراحان» تاس جولىنىڭ جاڭعىرتۋ جۇمىستارىنىڭ باستالۋىن تۇرعىندار ۇلكەن قۋانىشپەن قابىلدادى.
ىسكە اسىپ جاتقان مەملەكەتتىك باعدارلامالار ارقاسىندا بارلىق وڭىرلەردە الەۋمەتتىك نىساندار بوي كوتەرىپ, ينفراقۇرىلىم دامىپ, قازاقستاندىقتاردىڭ تۇرمىسى جاقسارىپ, ءال-اۋقاتى ارتتى. اتىراۋ وبلىسىندا, تاۋەلسىزدىكتىڭ العاشقى جىلدارىمەن سالىستىرعاندا, تۇرعىن ءۇي سالۋ كورسەتكىشى بەس ەسەگە ارتىپ, ول جىلىنا 800 مىڭ شارشى مەتردى قۇرادى. تۇرعىن ءۇي قورى 2001 جىلمەن سالىستىرعاندا, ەكى ەسەگە ءوسىپ, 12,5 ملن شارشى مەتر بولدى.
Nur Otan پارتياسىنىڭ XVIII سەزىندە جاريا ەتىلگەن «حالىققا كومەك», «باقىتتى وتباسى», «اۋىل – ەل بەسىگى», «قۇتتى مەكەن» پارتيالىق جوبالارى وڭىرلەردە باستاۋ الىپ, ازاماتتاردىڭ مۇقتاجىنا دايەكتى جاۋاپ جانە ۇلكەن قولداۋ بولدى. وڭىرىمىزدە كوپ بالالى انالارعا ءجاردەمدەسۋگە باعىتتالعان «Isker ana» جوباسى ىسكە قوسىلىپ, نيەت بىلدىرگەن 500-دەن استام انانىڭ بۇگىنگى كۇنى 100-ءى 8 ماماندىق بويىنشا ءبىلىم الدى, كۋرستى ءساتتى اياقتاعان قاتىسۋشىعا ءوز ىستەرىن باستاۋ ءۇشىن گرانتتار بەرۋ كوزدەلۋدە.
الدىمىزدا تۇرعان ەندىگى باستى ماقسات – تۇڭعىش پرەزيدەنتىمىز – ەلباسى ساياساتىنىڭ التىن ارقاۋى, باستى وزەگى بولعان ەل بىرلىگى مەن ىنتىماعىنىڭ جاراسىمدى جالعاسىن قامتاماسىز ەتۋ. ەلباسىنىڭ سەنىمدى كومەكشىسى, ۇزەڭگىلەس سەرىگى, الەمدىك ساياساتتىڭ اۋجايىن جاقسى تۇسىنەتىن, ەل مۇددەسى جولىندا قاجەت شەشىم قابىلداي الاتىن ساياساتكەر رەتىندە قاسىم-جومارت كەمەل ۇلى ەلباسىنىڭ ستراتەگيالىق باستامالارىن جالعاستىرىپ, حالقىمىزدى ءبىر ماقسات, ءبىر ءمۇددەگە جۇمىلدىرا الاتىنىنا سەنىمدىمىز.
ءماجىلىس دەپۋتاتى, Nur Otan پارتياسى فراكتسياسى توراعاسىنىڭ ورىنباسارى يرينا ارونوۆا ءوز ءسوزىن «بۇگىن ءبىز ەرەكشە سەزد وتكىزىپ وتىرمىز» دەپ باستادى.
– بۇگىنگى وقيعا قازاقستان تاريحىنىڭ جاڭا بەتىنە جازىلارى انىق. ويتكەنى ول ەلىمىزدىڭ بولاشاق تاعدىرىن ايقىندايدى. تۇڭعىش پرەزيدەنتتىڭ ءوز وكىلەتتىگىن مەرزىمىنەن بۇرىن توقتاتقانى ميلليونداعان قازاقستاندىقتاردى تولعاندىرعان وقيعا بولدى. الايدا بۇل وقيعا ەلباسى سيپاتىنىڭ تاعى ءبىر كۇشىن كورسەتتى.
تۇڭعىش پرەزيدەنت ارقاشاندا حالقىمەن بىرگە بولىپ, ءوزىنىڭ دانا شەشىمدەرىمەن ءبىزدى قولداپ وتىراتىنىنا سەنىمدىمىن. ونىڭ ەڭ دۇرىس جانە بىردەن ءبىر تاپقىر شەشىمدەرى قازاقستاننىڭ كوركەيە تۇسۋىنە ءالى دە قىزمەت ەتەتىن بولادى, – دەدى ول.
ەلباسىنىڭ «ەلدىڭ ەڭ باستى ساياسي كۇشى بولۋ دەگەنىمىز – بۇل باسقارۋ ەمەس, قىزمەت ەتۋ» دەگەن ءسوزىن ەسكە العان ي.ارونوۆا, بۇل سوزدەر بارلىق نۇروتاندىقتاردىڭ نەگىزگى لەيتموتيۆى بولاتىنىن اتاپ ءوتتى.
– تاۋەلسىزدىك جىلدارىندا ءبىز بۇرىن مۇلدە اتالماعان بيىك تابىستارعا قول جەتكىزدىك, ءبىزدىڭ پارتيامىز ەلدەگى نەگىزگى ساياسي كۇشكە اينالدى. ول كوپشىلىك حالىقتىڭ پارتياسى اتاعىنا دا قول جەتكىزدى. سونىڭ ءبارى پارتيا كوشباسشىسىنىڭ حالىق اراسىنداعى زور بەدەلىنىڭ ارقاسىندا بولدى, – دەدى.
سونداي-اق ول 90-جىلدارى ەلباسىنىڭ قوستاناي وبلىسى ديقاندارىمەن كەزدەسكەندە ايتقان: «جەر قانشا كەرەك بولسا, سونشا الىڭدار! مەنىڭ سەندەرگە ودان باسقا قازىر بەرەتىنىم جوق», دەگەن ءسوزدەرىن ەسكە الىپ, ونىڭ ارقاشاندا حالىقپەن جاقىن بولعانىن ەسكە سالدى.
ءسوزىنىڭ سوڭىندا ي.ارونوۆا ەلباسىنىڭ ۇسىنعان كانديداتۋراسىن نۇروتاندىقتاردىڭ ءبىر كىسىدەي قولدايتىندىقتارىنا سەنىم ءبىلدىردى.
ال سپورت ارداگەرى, وليمپيادا چەمپيونى, قازاقستاننىڭ ەڭبەك ەرى جاقسىلىق ءۇشكەمپىروۆتىڭ ايتۋىنشا, قالاسى نۇرعا, دالاسى جىرعا تولى مەملەكەتىمىزدىڭ مەرەيى ۇستەم, كەلەشەگى كەمەل ەكەنى بارشاعا ايان.
– ۇلى دالا ەلى – ەلباسىنىڭ پاراساتتى شەشىمى, ەرەن ەرلىگىنىڭ ارقاسىندا الەمدەگى قارىشتاپ دامىعان 50 مەملەكەتتىڭ ءبىرى رەتىندە ەڭسە تىكتەدى. كۇللى الەم قازاقستاننىڭ الەۋەتىن مويىندادى. الەۋمەتتىك-ەكونوميكالىق احۋالى زور ەكەنىنە سەنىم ارتتى. تۇڭعىش پرەزيدەنتىمىزدىڭ قاشاندا پاراساتتى شەشىم شىعاراتىن اسقاق تۇرپاتى مەن قابىلەتىنە ەل بولىپ سۇيسىنەمىز. 19 ناۋرىز كۇنى پرەزيدەنتتىك وكىلەتتىكتى توقتاتۋدى ۇيعاردىڭىز. وسىناۋ اسىل ويىڭىز التى الاشتىڭ جۇرەگىن تولقىتقانى جاسىرىن ەمەس.
ەل پرەزيدەنتى قاسىم-جومارت كەمەل ۇلى ءسىزدىڭ ۇلى جولىڭىزدى جالعاستىرۋدى مۇرات ەتىپ, ارنالى ىستەردى ءارى قاراي ىسكە اسىرۋ تۋرالى جالپى حالىققا ۇندەۋ جولدادى. 9 ماۋسىم كۇنى پرەزيدەنت سايلاۋىن وتكىزۋ تۋرالى شەشىم قابىلدادى. بۇل دەر ۋاقىتىندا قابىلدانعان, وتە دۇرىس شەشىم بولدى. ويتكەنى ەل تۇراقتىلىعى مەن ءارى قاراي دامۋىنداعى نەگىزگى مىندەتتەردى ۋاقىت كۇتتىرمەي جالعاستىرۋىمىز قاجەت, دەپ اتاپ ءوتتى ەڭبەك ەرى.
ج.ۇشكەمپىروۆ كوك بايراعىمىز كوك جۇزىندە جەلبىرەگەن كۇننەن بۇگىنگە دەيىن ۇلى ىستەر جاسالعانىنا, سونىڭ ءبىرى رەتىندە قىدىر دارىعان «جەر ءجانناتى جەتىسۋ» جەرىندەگى جەتىستىكتەرگە دە توقتالدى.
– اگرارلى ايماق سانالاتىن الماتى وبلىسىندا 2 ميلليوننان استام حالىق بەيبىت تۇرمىس كەشۋدە. ولاردىڭ 80%-ى اۋىلدىق جەردە تۇرادى. ءبىزدىڭ وبلىس قازاقستاننىڭ باسقا ايماقتارى سەكىلدى سان سالا بويىنشا ەل ەكونوميكاسىنىڭ ارتۋىنا ايرىقشا ىقپال ەتۋدە.
الەۋمەتتىك-ەكونوميكالىق دامۋ كورسەتكىشى دە جوعارى. قانت قىزىلشاسى, جۇگەرى, كارتوپ ءوندىرۋ ءىسى بويىنشا كورسەتكىشىن جىلدا جاڭارتىپ جاتىر. سول سەكىلدى سپورت سالاسىندا جەتىسۋ جەرىنەن شىققان ساڭلاقتار الەمدىك, حالىقارالىق, رەسپۋبليكالىق ءدۇبىرلى دودالاردا قورجىندى التىنعا تولتىرىپ كەلەدى. ءماسەلەن, 2018 جىلى 637 سپورتشىمىز جەڭىس تۇعىرىنان كورىندى. كوك تۋىمىزدى كوككە جەلبىرەتتى, – دەدى ول.
ءسوزىنىڭ سوڭىندا ج.ۇشكەمپىروۆ پارتيانىڭ وسى ءبىر داۋلەتتى, ساۋلەتتى باعىتىن ءارى قاراي جالعاستىرۋ قاجەتتىگىنە توقتالىپ, بۇل ءۇشىن پارتيا ۇسىنعان كانديدات – قاسىم-جومارت توقاەۆتى ءبىراۋىزدان قولدايتىنىن ايتتى.
كەلەسى ءسوز كەزەگى ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆكە بەرىلدى.
– مەملەكەت تاۋەلسىزدىگىن العاننان بەرگى ۋاقىتتا ەلىمىزدە تەڭدەسسىز وڭ ءوزگەرىستەر جاسالدى. قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ جاڭا ءارى دامىعان قازاقستاننىڭ ىرگەسىن قالادى. زاۋىتتاردىڭ توقتاپ, ازىق-ت ۇلىك تاپشىلىعىن سەزىنگەن 90-جىلدارى بولعان ءۇلكەن داعدارىستى وتكىزدىك. ول جىلدارى جەكەمەنشىك جانە جەكە كاسىپكەرلىك دەگەن ۇعىم دا قالىپتاسپاعان بولاتىن, – دەگەن ا.مىرزاحمەتوۆ ودان ءارى ەلباسىنىڭ ينۆەستورلارعا جايلى, اشىق ەكونوميكالىق ساياسات جۇرگىزۋىنىڭ ارقاسىندا ەل ەكونوميكاسىنا 300 ملرد اقش دوللارىنا تەڭ ينۆەستيتسيا قۇيىلعانىن اتاپ ءوتتى.
– ءبىز قازىر الەمنىڭ باسەكەگە قابىلەتتى 50 ەلىنىڭ قاتارىنا ەندىك. ەندى دامىعان 30 ەلدىڭ قاتارىنا ەنۋ ستراتەگياسى جۇزەگە اسىرىلىپ جاتىر, – دەدى.
ا.مىرزاحمەتوۆ ەلدە جۇرگىزىلىپ جاتقان ەكونوميكالىق رەفورمالاردىڭ دۇرىستىعىنا توقتالىپ, ولاردىڭ ۇتىمدىلىعىن سارالاپ بەردى ءارى شاعىن جانە ورتا بيزنەستىڭ جەدەل دامىپ كەلە جاتقانىن قاناعاتپەن اتاپ ءوتتى.
– ءبىزدىڭ ماقسات – شاعىن جانە ورتا بيزنەستىڭ ءىجو-دەگى ۇلەسىن 50 پايىزعا جەتكىزۋ. بۇل ەلباسىنىڭ بيزنەستىڭ الدىنا قويعان ناقتى تاپسىرمالارىنىڭ ءبىرى. بۇگىنگى تاڭدا قازاقستاندا بيزنەسپەن 1,2 ميلليون ادام اينالىسۋدا. ولار 3 ميلليوننان ارتىق جۇمىس ورىندارىن اشتى, – دەگەن ول ءسوزىنىڭ قورىتىندىسىندا بىلاي دەدى:
– بۇگىن قازاقستان رەسپۋبليكاسىنىڭ پرەزيدەنتى سايلاۋىنا پارتيا اتىنان كانديدات ۇسىنىلىپ وتىر. كاسىپكەرلىك قاۋىمداستىعى تۇڭعىش پرەزيدەنت – ەلباسى نۇرسۇلتان نازارباەۆتىڭ ستراتەگيالىق باعىتى جالعاسا بەرەتىنىنە سەنىمدى. بۇل – ەكونوميكانى مودەرنيزاتسيالاۋ, الەۋمەتتىك-ەكونوميكالىق تۇراقتىلىق پەن بەيبىتشىلىك. بيزنەسكە ەڭ الدىمەن تۇراقتىلىق پەن ەرتەڭگە دەگەن سەنىمدىلىك كەرەك. بۇل ايقىن ەكونوميكالىق جاعدايدا عانا قالىپتاسادى. سوندىقتان پارتيا اتىنان ۇسىنىلاتىن كانديداتتىڭ ەلباسى باستاعان باعىتتى ءارى قاراي جالعاستىراتىنىنا سەنىمدىمىز.
ءوز كەزەگىندە رەسپۋبليكالىق «ايقىن» گازەتىنىڭ باس رەداكتورى نۇرتورە ءجۇسىپ ەل ومىرىندەگى ەڭ جاۋاپتى كەزەڭدە جينالىپ وتىرعاندارىنا نازار اۋداردى.
– ەلباسىنىڭ پرەزيدەنتتىك وكىلەتتىگىن ءوز ەركىمەن توقتاتۋ تۋرالى اقىل مەن پاراساتقا تولى شەشىمىن ساياسي ساراپشىلار «بيلىك ءترانزيتىنىڭ قازاقستاندىق ۇلگىسى» دەپ باعالاپ جاتىر. كەز كەلگەن ساياساتكەر ءۇشىن مۇنداي شەشىم قابىلداۋ – ۇلكەن ماسەلە, – دەي كەلىپ, تۇڭعىش پرەزيدەنت – ەلباسىنىڭ تاريحي شەشىمدەرىنە توقتالىپ ءوتتى. سونىڭ ىشىندە قازاقستاننىڭ جاڭا دامۋ جولىن تاڭداپ, ناقتى رەفورمالاردى جۇزەگە اسىرعانىن, اتا-بابامىز ارمانداعان تاۋەلسىز قازاقستاندى ءوز قولىمەن قۇرعانىن, سارىارقانىڭ توسىنە بايتاق استانا سالعانىن, شەكارامىزدى شەگەندەپ, ەل ىرگەسىنەن شي دە, شۋ دا شىقپايتىن قىلعانى ايتىلدى. سونىمەن بىرگە ەلباسىنىڭ قازاق دەگەن ۇلتتى ايداي الەمگە تانىتقانىن, بۇۇ تورىنەن قازاقشا ساڭقىلداپ ءسوز سويلەگەنىن, جۇزدەگەن ۇلت پەن ۇلىس وكىلدەرىن بىرىكتىرگەنىن ايتتى. ۇلتتىڭ رۋحىن كوتەرۋگە ارنالعان «مادەني مۇرا», «رۋحاني جاڭعىرۋ», « ۇلى دالانىڭ جەتى قىرى» باعدارلامالارىنا توقتالا كەلىپ, «جوعىمىز تۇگەندەلدى! تاريحىمىز, كونە مادەنيەتىمىز, ۇلتتىق رۋحىمىز قايتا جاڭعىردى!» دەگەن ول, ۇلتتىق ءباسپاسوزدىڭ دە قالىپتاسىپ, قازاقستان جۋرناليستيكاسىنىڭ تاۋەلسىزدىك تۇسىندا ايتارلىقتاي شىڭدالعانىن اتاپ ايتتى. «ەلباسىمىزدىڭ بارلىق باستامالارىنىڭ ءمانى مەن ماڭىزىن حالىققا جەتكىزۋ, ءتۇسىندىرۋ, ناسيحاتتاۋ جولىندا باق وكىلدەرىنىڭ ەڭبەگى وتە زور. اقيقاتتى جوقتاعان, اتالى سوزگە توقتاعان ەلمىز. بۇگىنگى قازاق جۋرناليستيكاسى – قوعامداعى تاتۋلىق پەن تۇراقتىلىقتىڭ, بەرەكە مەن بiرلiكتiڭ ۇيىتقىسى. اسىرەسە, قازاقتىلدى باسىلىمدار ۇلتتىق تاۋەلسىزدىكتىڭ شىنايى جاناشىرلارى بولدى. قينالعانعا – دەمەۋ, مۇڭايعانعا مەدەت بولدى. ءبىر زاماندا ناپولەون: «جۋرناليستەر – كۇڭكىلدەك, سىنشى ءارى كەڭەسشى. مىڭداعان جاۋ اسكەرىنەن گورى, جات پيعىلدى ءتورت گازەتتەن كوبىرەك قورقۋ كەرەك», – دەگەن ەكەن. ءبىزدىڭ ۇلتتىق جۋرناليستيكا ەشقاشان جات پيعىلدى بولا المايدى! ەلدىك پەن مەملەكەتتىك يدەيا, ۇلتتىق تاۋەلسىزدىك ماسەلەلەرى باستى باسىمدىق بولا بەرەدى», – دەدى ن.ءجۇسىپ.
ءسوزىنىڭ قورىتىندىسىندا كەزەكتەن تىس پرەزيدەنت سايلاۋىن وتكىزۋدى بۇكىل قازاقستان حالقى قولداپ وتىرعانىن ايتقان ول:سەزد ۇسىنىپ وتىرعان كانديدات قاسىم-جومارت توقاەۆ ەلگە – تانىمال تۇلعا. ءبارىمىز جاقسى بىلەمىز. قازاق مادەنيەتىنە, ادەبيەتىنە, ونەرىنە شىنايى جاناشىر جان. ەلدە, حالىقارالىق دەڭگەيدە قۇرمەتى مەن ابىرويى بار ازاماتتىڭ قازاق مۇددەسى ءۇشىن ادال قىزمەت جاسايتىندىعىنا سەنىم مول», – دەدى ول.
بۇدان كەيىن دە بىرنەشە ادام ءسوز سويلەپ, ەلباسى ن.نازارباەۆ ۇسىنعان قاسىم-جومارت توقاەۆتىڭ كانديداتۋراسىن قولدايتىندىقتارىن ءبىلدىردى. جارىسسوزدەر اياقتالعان سوڭ بۇل ۇسىنىس داۋىسقا سالىنعاندا بارلىق دەلەگاتتار ق.توقاەۆتىڭ كانديداتۋراسىن ءبىراۋىزدان قولدادى.
ودان ءارى قازاقستان رەسپۋبليكاسىنىڭ پرەزيدەنتى, 9 ماۋسىمدا بولاتىن كەزەكتەن تىس پرەزيدەنت سايلاۋىندا Nur Otan پارتياسىنىڭ اتىنان تۇسەتىن ۇمىتكەر ق.توقاەۆ ءسوز الدى.
قاسىم-جومارت توقاەۆ وزىنە زور سەنىم ارتىپ, Nur Otan پارتياسى اتىنان قازاقستان پرەزيدەنتتىگىنە ۇمىتكەر ەتىپ ۇسىنعان ەلباسىنا شىن جۇرەكتەن العىس ايتتى.
– مەملەكەتىمىزدىڭ نەگىزىن قالاعان ۇلى تۇلعانىڭ ماعان ارتقان جاۋاپكەرشىلىك جۇگىن بۇكىل بولمىسىممەن سەزىنەمىن! سوندىقتان سەنىمگە سەرت بەرىپ, ۇلكەن ءۇمىتتىڭ ۇدەسىنەن شىعۋ ءۇشىن بار قاجىر-قايراتىمدى جۇمسايمىن. پارتيا ءتوراعاسى, ەلباسى 19 ناۋرىز كۇنى ءوزىنىڭ تاريحي ۇندەۋىندە: «تاۋەلسىز قازاقستانىمىزدى, ورتاق وتانىمىزدى, ماڭگىلىك ەلىمىزدى ساقتاي بىلىڭدەر» دەدى! ءاربىر قازاقستاندىقتىڭ جۇرەگىنە جول تاپقان بۇل ءسوزدەر مەنىڭ دە بويتۇمارداي بۇلجىماس ۇستانىمىم بولادى. قازىرگى اۋمالى-توكپەلى زاماندا قۇبىلامىزدان جاڭىلماۋ ءۇشىن ءبىزدىڭ باعىتىمىز ايقىن! بايتاق ەلىمىزدى بەكەمدەپ, بولاشاعىمىزدىڭ باعدارىن بەكىتىپ بەرگەن ەلباسى اماناتى ءبىزدى بيىك بەلەستەرگە جەتەلەيدى. كەشەگىنى ۇمىتپاي, كەلەشەكتى ۇلىقتاۋ – كيەلى ءتاۋەلسىزدىك الدىنداعى باستى پارىزىمىز! – دەدى.
سونداي-اق ق.توقاەۆ سايلاۋدا جەڭىسكە جەتكەن جاعدايدا تۇڭعىش پرەزيدەنتتىڭ ستراتەگيالىق جولىن, اتاپ ايتقاندا, الەۋمەتتىك ساياساتىن, بەس ينستيتۋتتىق رەفورماسىن,«100 ناقتى قادام» ۇلت جوسپارىن جانە وزگە دە اۋقىمدى باستامالارىن جالعاستىرۋدى وزىنە پارىز سانايتىنىن اتاپ كورسەتتى.
ءسوزىنىڭ سوڭىندا ق.توقاەۆ تاريحتىڭ جاڭا تاراۋىن باستاعان قازاقستان تاعى ءبىر ماڭىزدى كەزەڭنىڭ الدىندا تۇرعانىن ايتا كەلىپ, «وسىنداي اسا جاۋاپتى ساتتە ەلباسىنىڭ سەنىمى, پارتيانىڭ قولداۋى ماعان ەرەكشە كۇش-قۋات بەرەدى! مەن ءداستۇر ساباقتاستىعىن ساقتاي وتىرىپ, يگىلىك جانە ادىلەت جولىن تۋ ەتىپ, قارقىندى دامۋدى جالعاستىرۋعا بار كۇشىمدى سالامىن!» – دەدى.
اقان بيجانوۆ,
فيلوسوفيا, ساياساتتانۋ جانە ءدىنتانۋ ينستيتۋتىنىڭ ديرەكتورى:
– تۇڭعىش پرەزيدەنتىمىز ن.نازارباەۆ ءوزىنىڭ پرەزيدەنتتىك وكىلەتتىگىن ءوز ەركىمەن توقتاتقاننان بەرى العاشقى پرەزيدەنت سايلاۋىنا Nur Otan پارتياسى ءوزىنىڭ كانديداتۋراسىن ۇسىندى. ءبىزدىڭ مەملەكەتىمىزدىڭ ىشكى جانە سىرتقى ساياساتىنىڭ بولاشاعى ءبىزدىڭ بۇگىنگى ۇسىنعان كانديداتىمىزدىڭ ءىس-ارەكەتىنە تىكەلەي بايلانىستى.
جالپى تاريحتا «ءبارىن دە كادرلار شەشەدى» دەگەن ءسوز بار عوي. سوندىقتان ءبىزدىڭ ۇسىنعان كانديداتىمىز ەلدىڭ بولاشاق دامۋىن قامتاماسىز ەتىپ, بارلىق بيىك ارەنالاردا ەلدىڭ مۇددەسىن قورعاي الاتىن بولۋى كەرەك. وسى تۇرعىدان العاندا قازىرگى پرەزيدەنت قاسىم-جومارت توقاەۆتى بارلىق تالاپتارعا جاۋاپ بەرە الاتىن تۇلعا, لايىقتى كانديدات دەپ سانايمىن. ءبىز ول كىسىمەن بىرنەشە جىل بويى سەناتتىڭ قابىرعاسىندا بىرگە قىزمەت ەتتىك. سول كەزدە ونىڭ جوعارى دەڭگەيدەگى مەملەكەتشىل, ءىرى تۇلعا ەكەندىگىنە ابدەن كوزىمىزدى جەتكىزگەن بولاتىنبىز.
تۇڭعىش پرەزيدەنتىمىز – ەلباسى نۇرسۇلتان نازارباەۆ سەزدە ونىڭ ءبىراز قىرلارىن اتاپ بەردى. سونىڭ ىشىندە ديپلوماتيالىق قىزمەتتىڭ بارلىق قىر-سىرىن مەڭگەرگەنىن دە ايتتى. ال ءبىزدىڭ بولاشاق مەملەكەت باسشىسىنا وسى ونەر قاجەت ەكەنى بەلگىلى.
بەرىك ابدىعالي ۇلى, ساياساتتانۋشى:
– بۇگىن قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ Nur Otan پارتياسىنىڭ كەزەكتەن تىس ءحىح سەزىندە قاسىم-جومارت توقاەۆتىڭ ايقىن ساياسات جۇرگىزۋدىڭ قانشالىقتى ماڭىزدى ەكەنىن بىلەتىنىن, ءاربىر ىسكە ۇلكەن جاۋاپكەرشىلىكپەن قارايتىنىن ايتىپ, زور سەنىممەن الداعى وتەتىن پرەزيدەنت سايلاۋىنا پارتيا اتىنان كانديدات رەتىندە ۇسىندى.
Nur Otan پارتياسى – حالىقتىڭ ءال-اۋقاتىن كوتەرۋگە باعىتتالعان الەۋمەتتىك باعدارلامالاردىڭ باستاماشىسى. وسى پارتيانىڭ اتىنان سايلاۋعا تۇسەتىن قاسىم-جومارت كەمەل ۇلى ەلباسىنىڭ ستراتەگيالىق جولىن جالعاستىراتىن لايىقتى كانديدات دەپ سانايمىن. ول – حالىق اراسىندا تەرەڭ ويلى, تازا ادام رەتىندە تانىلعان, ءوزى قىزمەت اتقارعان سالالاردا جاعىمسىز ءسوز شىقپاعان, الەمدىك ساياساتتا بەدەلى بار بىلىكتى مامان. حالىقارالىق دەڭگەيدەگى ساراپشىلاردىڭ پىكىرى وسىعان سايادى.
ەلباسىنىڭ جولى – ەگەمەن ەلىمىزدىڭ دامىپ-وركەندەۋىنىڭ, تىنىشتىعى مەن تاتۋلىعىنىڭ ايشىقتى كورىنىسى. وسى ىنتىماعىمىز بەن بىرلىگىمىزدىڭ نەگىزى – ساباقتاستىق. سوندىقتان ەلباسىنىڭ سەنىمدى ءىزباسارى قاسىم-جومارت توقاەۆتىڭ كانديداتۋراسىن سەزگە قاتىسقاندار ءبىراۋىزدان قولدادى. بۇل شەشىمدى ەرتەڭ سايلاۋ كەزىندە حالىق تا قولدايدى دەپ ويلايمىن.
اسقار نۇرشا, الماتى مەنەدجمەنت ۋنيۆەرسيتەتىنىڭ مەملەكەتتىك ساياسات جانە قۇقىق جوعارى مەكتەبىنىڭ دەكانى:
– Nur Otan پارتياسىنىڭ كەزەكتەن تىس ءحىح سەزى پرەزيدەنت سايلاۋىنىڭ الدىنداعى ماڭىزدى وقيعا بولدى. سەبەبى بۇل سەزدە ەلىمىزدەگى باستى پارتيانىڭ اتىنان تۇسەتىن كانديدات ناقتىلاندى. پارتيانىڭ تاڭداۋى – ەلباسى نۇرسۇلتان نازارباەۆتىڭ قاسىم-جومارت توقاەۆقا بىلدىرگەن زور سەنىمى, جۇكتەگەن ۇلكەن جاۋاپكەرشىلىگى.
قاسىم-جومارت توقاەۆ قازاقستان پرەزيدەنتىنىڭ مىندەتىن اتقارعان العاشقى كۇنىنەن باستاپ ءوزىنىڭ باستى ۇستانىمى ادىلەتتىلىك ەكەنىن, ونسىز قوعام ەشقاشان دامىمايتىنىن ايتتى. بۇل ءوز كەزەگىندە ىلگەرىلەۋگە, قازاقستاندى باسەكەگە قابىلەتتى ەل رەتىندە العا جىلجىتۋعا جول اشادى. ال ونىڭ نەگىزى – ساباقتاستىق, تۇراقتىلىق, ەلباسى ساياساتىن جالعاستىرۋ.
Nur Otan پارتياسىنىڭ بۇل تاڭداۋىن مەن دە قولدايمىن. ق.توقاەۆ شىن مانىندە حالىقارالىق ساياسي الاڭدا بەدەلى بار مەملەكەت قايراتكەرى, تاجىريبەلى مامان, بىلىكتى ساياساتكەر. ەلباسىنىڭ ستراتەگيالىق باستامالارى – ەلىمىزدى وركەندەتۋدىڭ, حالىقتىڭ تۇرمىسىن جاقسارتۋدىڭ ايقىن باعىت-باعدارى. وسى جولدان اينىمايتىن ق.توقاەۆ ەل كۇتكەن ءۇمىتتىڭ ۇدەسىنەن شىعادى دەپ سەنەمىن.
مۇحتار ەركەتاەۆ,
نۇر-سۇلتان قالالىق قوعامدىق كەڭەسىنىڭ حاتشىسى:
– ءبىزدىڭ پارتيا ەلدەگى تۇراقتىلىق پەن تىنىشتىقتىڭ نىعايا ءتۇسىپ, ەلدىڭ ىرگەسى ودان ءارى نىقتالعانىن قالايدى. ول ءۇشىن مەملەكەت باسىنداعى ادامنىڭ سەنىمدى, بىلىكتى بولعانى كەرەك. وسى ورايدا مەن الدىمەن پرەزيدەنتتىڭ حالىق اتىنان سايلانۋى دا وتە دۇرىس شەشىم بولدى دەپ سانايمىن. بۇكىل ەلدىڭ اتىنان مالىمدەمەلەر جاريالايتىن تۇلعانىڭ حالىقتىڭ قولداۋىنا يە بولعانى دۇرىس قوي. مىنە, بۇگىن ءبىزدىڭ كانديداتىمىز بەلگىلى بولدى. قاسىم-جومارت توقاەۆ تۇڭعىش پرەزيدەنتىمىزدىڭ سەنىمدى سەرىگى, قازاقستاننىڭ تاۋەلسىزدىك العان شاعىنان باستاپ ونىڭ جانىندا بىرلەسىپ قىزمەت ەتىپ كەلەدى. وزىنە جۇكتەلگەن بارلىق مىندەتتەردى ابىرويمەن ورىنداعان. حالىق ول كىسىنى تەك جاقسى جاعىنان بىلەدى.
ارينە, بارلىق ساياسي پارتيالار مەن قوعامدىق ۇيىمدار دا ءوز كانديداتتارىن ۇسىنادى عوي. حالىق سول ۇمىتكەرلەردىڭ ىشىنەن لايىقتىسىن تاڭدايدى دەپ سەنەمىن.
ومىرزاق وزعانباەۆ,
رەسپۋبليكالىق ارداگەرلەر ۇيىمى ورتالىق كەڭەسى توراعاسىنىڭ ورىنباسارى:
– سەزدە وتە ماڭىزدى شەشىم قابىلداندى. ول قازاقستان قوعامىنىڭ بىرلىگى مەن تۇتاستىعىنىڭ دالەلىندەي بولىپ ءوتتى. سەزد ءبىراۋىزدان ەلىمىزدەگى ەڭ جوعارعى لاۋازىمدىق قىزمەتكە سايلانۋعا ەلباسى نۇرسۇلتان نازارباەۆتىڭ ۇسىنىسىمەن قاسىم-جومارت كەمەل ۇلى توقاەۆتىڭ كانديداتۋراسىن قولدادى.
بۇل شەشىم وتە دۇرىس بولدى دەپ ەسەپتەيمىز. ويتكەنى ەلىمىزدە تۇراقتىلىق ورناتقان بۇرىنعى ساياساتتى بۇل ادام جالعاستىرا الاتىنىنا سەنىمدىمىز. ەلىمىزدە رۋحاني جاڭارۋدىڭ, جالپى جاڭعىرۋدىڭ باستالعان شاعىندا مەملەكەت باسىنا وسىنداي جاڭا تۇلعانىڭ كەلگەنى ورىندى.
قاسىم-جومارت كەمەل ۇلى ەلىمىزدىڭ قالىپتاسۋىنا, حالىقارالىق بەدەلىنىڭ ارتۋىنا ەلباسىنىڭ سەرىگى رەتىندە ولشەۋسىز كوپ ەڭبەك ءسىڭىردى. ونى حالقىمىز جاقسى بىلەدى. مەن حالقىمىزعا باياندى بەيبىتشىلىك, باقىتتى تۇرمىس, سەرپىندى دامۋ تىلەي وتىرىپ, وزدەرىنىڭ لايىقتى كوشباسشىسىنا اداسپاي داۋىس بەرۋىن تىلەيمىن.
