كەزدەسۋدە ساۋدا-ەكونوميكالىق, ينۆەستيتسيالىق ىنتىماقتاستىقتى ودان ءارى دامىتۋ, ەكىجاقتى تاۋار اينالىمىنىڭ كولەمىن ۇلعايتۋ ماسەلەلەرى تالقىلاندى. سونىمەن قاتار, ءداستۇرلى جانە بالامالى ەنەرگەتيكا, اتوم ونەركاسىبى جانە عىلىم, قورعانىس-ونەركاسىبى كەشەنى, اۆياتسيا, اۋىل شارۋاشىلىعى, قازاقستاندىق ەكولوگيالىق تازا ءونىمدى ەكسپورتتاۋ سالالارىنداعى ءوزارا ءتيىمدى ىنتىماقتاستىقتى تەرەڭدەتۋ پەرسپەكتيۆالارى قارالدى.
ەكى ەلدىڭ ۇكىمەت باسشىلارىنىڭ پىكىرىنشە, ەكىجاقتى تاۋار اينالىمىنىڭ قازىرگى كولەمى ىنتىماقتاستىقتىڭ ۇلكەن الەۋەتى بار ەكەنىن كورسەتەدى.
«ءبىز قازاقستاندى ەلەۋلى ەكونوميكالىق ناتيجەلەرگە قول جەتكىزىپ جاتقان ەل دەپ سانايمىز. ەكىجاقتى قارىم-قاتىناس ورناتقانىمىزعا وتە قۋانىشتىمىز», — دەپ ماجارستان پرەمەر-ءمينيسترى ۆيكتور وربان, بىرلەسكەن جۇمىس كەلەشەكتە كولەمدى ۇلعايتىپ, ءوزارا ءىس-قيمىل قۇرىلىمىن كەڭەيتۋگە جانە اۋقىمدى جوبالاردى ىسكە اسىرۋعا جول اشاتىنىنا سەنىم ءبىلدىردى. — ماجارستان الداعى ۋاقىتتا دا قازاقستانعا اشىق بولىپ, ەكونوميكالىق ىنتىماقتاستىق مۇمكىندىكتەرىن ىزدەۋدى جالعاستىرادى».
پرەمەر-مينيستر ا. مامين قازاقستان مەن ماجارستان اراسىنداعى سەنىمدى قارىم-قاتىناستار ەكونوميكالىق ءوزارا ءىس-قيمىلدى دامىتۋعا قولايلى جاعداي جاسايتىنىن اتاپ ءوتتى.
«ماجارستان – قازاقستاننىڭ ماڭىزدى ساۋدا-ەكونوميكالىق سەرىكتەسى. ەكى ەل اراسىنداعى ءوزارا ءىس-قيمىلدىڭ ودان ءارى كەڭەيە ءتۇسۋىن قۇپتايمىز», — دەپ ا. مامين, ماجارستان كاسىپكەرلەرىن قازاقستاندا ينۆەستيتسيالىق جوبالاردى ىسكە اسىرۋعا بەلسەنە قاتىسۋعا جانە ءوزارا ءىس-قيمىلدى دامىتۋدىڭ جاڭا فورمالارىن بىرلەسىپ ىزدەۋگە شاقىردى.
قازاقستان مەن ماجارستاننىڭ ۇكىمەت باسشىلارى ەكى ەل اراسىنداعى ءوزارا ساۋدا مەن ينۆەستيتسيالىق ىنتىماقتاستىقتى كەڭەيتۋگە مۇددەلى ەكەنىن راستادى. نۇر-سۇلتان قالاسىندا بيىل 29 ساۋىردە 100 ۆەنگر بيزنەسمەنىنىڭ قاتىسۋىمەن وتەتىن قازاقستان–ماجارستان ستراتەگيالىق كەڭەسىنىڭ وتىرىسى ساۋدا كولەمىن ودان ءارى ۇلعايتۋدىڭ جانە تاۋار اينالىمىنىڭ قۇرىلىمىن كەڭەيتۋدىڭ جاڭا قۇرالدارىن انىقتاۋعا جول اشادى.
