ەكىنشى رەت ۇيىمداستىرىلعان بيزنەس-يدەيالار سايىسىنا 190-نان اسا جوبادان ءوتىنىش كەلىپ ءتۇستى, ونىڭ 170-ءى جارىسقا قاتىستى. جاستاردى كاسىپكەرلىككە باۋلىپ, تىڭ يدەيالاردى ىزدەگەن سايىس بيىل «ءىت», «عىلىم جانە تەحنولوگيا», «الەۋمەتتىك جوبالار», «تۋريزم», «اگروبيزنەس» باعىتتارى بويىنشا ۇزدىك ستارتاپتار انىقتالىپ, 25 ء–ى اقتىق كەزەڭگە ءوتتى. ولار ءساۋىردىڭ 27-ءسى كۇنى جارىستىڭ اقتىق كەزەڭىندە كاسىپكەرلەردەن قۇرالعان قازىلار القاسىندا قورعاپ, جۇلدەلى 1 ميلليون 750 مىڭ تەڭگە ءۇشىن تالاساتىن بولادى.
- وتكەن جىلى 127 جوبا جۇلدەلى ءۇش ورىن ءۇشىن تالاسقان بولاتىن. بىراق, ول كەزدە باعىتتاردىڭ ارتۇرلىلىگىنە بايلانىستى قازىلار القاسىنا ۇزدىك جوبالاردى انىقتاۋ قيىن بولعان ەدى. سوندىقتان بيىل بەس باعىتقا ءبولۋدى دۇرىس سانادىق, دەيدى زياتكەرلىك مەكتەپتىڭ ديرەكتورى ەرمەك پايزوۆ.
قاتىسۋشىلار «الەۋمەتتىك جوبالار» نوميناتسياسىندا بەلسەندىلىك كورسەتتى. 53 جوبانىڭ ىشىنەن بەس جوبا عانا ىرىكتەلىپ الىندى. ال «اگروبيزنەس» نوميناتسياسىنا 40, «تۋريزمگە» - 35, «عىلىم جانە تەحنولوگياعا» 45 ءوتىنىش كەلدى. ال «ءىت» نوميناتسياسىنا 21 جوبا قاتىستى.
بايقاۋ ءۇش كەزەڭنەن تۇرادى. قاتىسۋشى ەڭ الدىمەن جوبانىڭ ماڭىزدىلىعى, سۇرانىسى, تيىمدىلىگى تۋرالى پرەزەنتاتسيا دايىنداپ, www.caspianstartup.kz سايتىنا تىركەلۋى مىندەتتەلدى. ال ەكىنشى كەزەڭدە بايقاۋدىڭ قازىلار القاسى كەلگەن جوبالاردىڭ ىشىنەن ەڭ ۇزدىك 25 جوبانى تاڭداپ, اقتىق كەزەڭگە جولداندى. ىرىكتەۋدەن وتكەن قاتىسۋشىلار بيزنەس-جوبالارىن كاسىپكەرلەر مەن قازىلار القاسىنىڭ الدىندا قورعايدى. ءار نوميناتسيانىڭ جەڭىمپازىنا 350 مىڭ تەڭگە بەرىلەدى.
- «Caspian Startup-2019» - تاماشا جوبا. قازىرگى تاڭدا ستارتاپ –بيزنەستىڭ جەتەكشى باعىتتارىنىڭ ءبىرى. بۇل جاستاردىڭ ءوزىن-ءوزى كورسەتىپ, جوبا ۇسىنۋىنا تاپتىرماس مۇمكىندىك. شاراعا قاتىسقان ءار كاسىپكەر بالالارعا كەڭەس بەرىپ, بىرنەشە جىلدىق تاجىريبەسىمەن ءبولىسىپ قانا قويماي, جوبالارىن جۇزەگە اسىرۋعا اتسالىسا الادى. سول سەبەپتى مۇنداي جارىسقا بيزنەسمەندەردىڭ كوپتەپ قاتىسۋى ماڭىزدى, دەيدى قازىلار القاسىنىڭ مۇشەسى, «Prestige» جيھاز سالونىنىڭ نەگىزىن قالاۋشى يرينا بەلياەۆا.
ستارتاپ جوبالار بايقاۋىنا «MKS Logistics» جشس, «Mediana» ءىت-كومپانياسى, «EXPO&WOMEN», «ەۆروۆوياج» تۋر اگەنتتىگى, «تەتيس» جشس دەمەۋشىلىك ەتۋگە نيەت ءبىلدىردى. ال ماڭعىستاۋ وبلىستىق ءبىلىم باسقارماسى, «Mangystau» تەلەارناسى, «اتامەكەن» كاسىپكەرلەر پالاتاسىنىڭ, ماڭعىستاۋ وبلىستىق فيليالى بايقاۋ سەرىكتەستەرى اتاندى.
سونىمەن قاتار, جارىس قاتىسۋشىلارىنىڭ كاسىپكەرلىككە ىنتاسىن ارتتىرا ءتۇسۋ ماقساتىندا وبلىستىڭ بەلدى بيزنەس-ترەنەرلەرى مەن كاسىپكەرلەرى ارنايى شەبەرلىك ساعاتتارىن وتكىزدى.
